المفاجأة....شخصية العدد

السلام عليكم ورحمة الله وبركاته

محدش يستغرب انى كتبت بوست بسرعة كده بس لانى ان شاء الله الفترة اللى جاية هريحكم بقى منى ومش هتشوفونى

فترة الله اعلم بقى

طبعا انا بحترم راى الناس كلها اوى بس استغربت ان الكل علق على الميل والشات ومفيش كومنتات

بس انا فهمتها لوحدى

للتوضيح بس : يا جماعة الفئتين عجبنى فيهم حاجات ونقدت فيهم حاجات يعنى الاخوان جزء من الشعب لكن الحكومة بعتبرها

الشعب كله ليه بقى لانها هى اللى بتتحملنا كلنا بما فينا الاخوان

وشيماء بتقولى انتى بتقولى انك اخوان

تؤ تؤ تؤ تؤ تؤ

انا مش اخــــــــــــــــــوان انا فكرى فقط متطبع زى الاخوان لكن الحمدلله بختلف عنهم كتير لانى بطبعى التسامح وبكره الظلم وبحب العدل

ولان كل اغراضهم سياسية عشان كده مفكرتش فى يوم من الايام انضم ليهم

لان واحدة حبت انى انضم ليهم بالكلية وشوفناها بتغش فى الامتحان قولتلها ادى اول حاجة مطبقتش اللى الرسول قال

من غشنا فليس منا

عاوزنى اسمع كلامها بمناسبة ايه ان شاء الله انا كده ابقى افضل منها ولكن عمرى ما سخرت من حد

بس اللى اقصده واللى بقوله للمرة المليون اللى عاوز ينصح حد يشوف نفسه الاول

يقول الله تعالى فى كتابه العزيز

( أتأمرون الناس بالبر وتنسون انفسكم )

وطبعا كلامى لايعنى انى بهاجم الاخوان فهم بشر و نحن جميعا ليسوا بملائكة

وزى مافى الحلو فى الوحش

ربنا يهدى الجميع

دلوقتى بقى هبتدى احكى عن الشخصية المفاجأة وياترى شوفت الشخصية دى فين واتحاورت مع الشخصية دى ازاى؟؟؟

طبعا اكتريت شغلى outdoor فروحت شركة كبيرة ليها اسمها فواحد قابلنى عند البوابة ماسك امن هناك

بيقولى انتى عاوزة مين قولتله انا جاية لفلان الفلانى فقالى وانتى خارجة تعالى عشان اكلمك قولتله تحت امرك بس اخلص البيزنس واحجزلى

مقعد واجاى اتكلم معاك طبعا هو اد بابا بل اكبر منه كمان فكان سنه وادبه مشجعنى على انى اتكلم معاه

عملت فى الشركة اللى فيه النصيب وخرجت بيقولى شكلك شخصية مهمة

قولتله الله يحفظك

فبيقولى والله شكلك واصل ومختفية كده

حلفتله انى خريجة وكمان بتدرب فى الشغل لسه مستقرتش

قالى بس باين من ملامحك الذكاء وقوة الملاحظة وحاسس انك هتوصلى

بس بينى وبينكم كلامه جذب اذنى وشدنى واحد شغال مدح فى شخصيتى والله وناس كتير بس الفرق انهم يعرفونى وده لا فا بناء على شكلى

بيحكم عليه

فقوله انا قولتلك انا مين انت مين بقى؟

قالى انتى متعرفنيش انا يحيى المهدى بطل من ابطال ايلات

قولتله يا نهار ايه الصدف السعيدة دى بسسسسسسسسسس

هاخدك صورة لوحدك وصورة انا وانت مع بعض ضحك وقالى طبعا شىء يشرفنى ومعنديش مانع

فبقوله بس صورتك مشوفتهاش فى فيلم ايلات فقالى الحقيقة والفرق بين الفيلم والعملية الحقيقية لايلات؟؟؟؟؟؟؟؟؟؟؟

قالى ايلات الميناء الاسرائيلى الوحيد على البحر الاحمر وكان فيه جزئان ميناء تجارى وميناء حربى

وكان هناك اربع سفن كبيرة للبحرية الاسرائيلية اكبرها بيت شفيع وبيت يم وصدر القرار باننا نضرب السفن دى واننا

ندمر الميناء الحربى والعملية دى تمت على مدار سنة كاملة الرجالة راحوا تلات مرات هناك فى المرة الاولى

تم تلغيم الرصيف والميناء من خلال الضفادع البشرية ورجال الفرقة الانتحارية بتاعتى واخر السنة رجعنا

تانى وضربنا الميناء والسفينة الثانية واغرقناها فالفيلم اخرجته المخرجة انعام محمد على اختزل العمليات التلاتة

وخلاها عملية واحدة علشان الوقت وعلشان توصل رسالة مختصرة للجمهور والعالم وكمان لو عملت الفيلم اجزاء كان

من الممكن لا يلقى نفس المكاسب اللى حققها فيلم واحد فسألته بقوله صورة حضرتك مشوفتهاش فى نهاية الفيلم

عند عرض الشخصيات

قالى احنا كنا 40 نفر وهى عرضت 11 نفر بس اللى قاموا بعملية ايلات الاخيرة ومحطتش الفرق الاخرى

اصحاب العمليتين التانيين

وطبعا خدت منه المقالات وصورة ليه وقولتله هنزله عندى بالمدونة

وقالى يا هبة انتى شرفتينى وفرجنى على صور ليه مع الممثلين ولاعبى الكورة والعرب

وقالى ان لغاية دلوقتى اسرائيل عاوزة تغتاله وطلبوه فى اسرائيل عشان يتحاوروا معاه لكنه رفض بشدة

الذهاب لاسرائيل

بسسسسسسسسسسسسس كده

ياريت بقى حد يدعيلى كده كويس والله انا من كتر التفكير دماغى تعبت جدا

لانى بفكر فى اكتر من اتجاه ومش فى موضوع الشغل بس

فعليه ضغط جامد ربنا العالم بحالى

طبعا هتقولوا هى هبة دى لازم فى كل بوست تطلب الدعاء

اهى حاجة بسيطة وياريت ماتبخلوا عليه بيها

يلا سلام

هبة سيد والحقيقة الغائبة

على فين يا دنيا موديانى؟؟؟؟؟؟؟؟؟

السلاااااااااام عليكم ورحمة الله وبركاته

ازيكم ياجماعة عاملين ايه؟؟؟؟؟ميرسى لكل الناس اللى علقت على المدونة واللى بعتولى ايميلات مهولة

والله اللى بيشجعنى اكتب الآراء الكتير اللى بتوصلى على الميل والكومنتات

اولا: طبعا انا عارفه الناس كلها اعصابها متدهورة من ارتفاع الاسعار وكمان الاضراب وكمان الاضراب اللى اثر بشكل سلبى

على المحلة الكبرى وده نتيجة للهتافات وايقاف الانتاج والاعمال التخريبية من الجانبين الشعب والامن لان المفروض

كان الكلام ده ينعالج بحكمة وكل شىء يدار اول باول ولحظة بلحظة مش بعد ما مالطة تخرب نحاول فى ايجاد حلول

ده مش منطق وده يمكن السبب فى تخلف البلد دى واللى مأخرنا كده

* على فكرة انا مختلفة مع الكل وعجبنى موقف الاخوان جدا وعلى فكرة فكرى اخوانى لكن عمرى ما انضمت ليهم والكلام ده من فترة كبيرة مش من دلوقتى هى المشكلة كلها ان فى منهم ناس بتظلم اوى وناس مسيطرة بس

وعدم تدخلهم ده عجبنى لان لو دخلوا فى الاضراب كان الدم هيزيد

وكمان الاعمال التخريبية اللى حصلت كانت الحكومة هتقول هما اللى عملوها وده طبعا غير صحيح لعدم مشاركتهم فيها

ولان الشعب كان ثاير لوحده

* الحكومة فى نقاط عجبتنى ونقاط لا

اللى عجبنى انهم اوقفوا المهزلة دى لان لو الشعب سيطر على الحكومة من السهل دخول التيارات الخارجية ومن ثم حدوث

الاستعمار والبلد مش ناقصة يعنى دى نقطة اظن انها الوضع واضح فى فلسطين والعراق

وكمان داخلين على حرب مياه بسبب الانفجار السكانى والدول كلها عاوزة تحط ايديها على النيل

فلازم تكون دماغنا اكبر من كده ناخد حقوقنا اه تخريب وايقاف الانتاج لا مش فى صالح الفرد ولا المجتمع

ولا الدولة

اللى معجبنيش بقى فى الامن هو وقف المهزلة بطرق عنيفة غير انسانية وقتل ناس دون ادنى ذنب بالاضافة الى اعتقال

طلاب جامعات وثانوية عامة

منهم اللى خد افراج ومنهم على ذمة التحقيق 15 يوم ودول ليهم مستقبل حرام بجد يعنى مش الاسعار بس اللى باظت كمان الموارد البشرية

عليه العوض ومنه العوض

وعظيمة يا مصر يا ارض اللواء

ثانيا:من الحاجات اللى لفتت نظرى اوى هو ان الاخوان نفسهم يعملوا حزب زى الحزب الوطنى ويترشحوا فى المجالس

المحلية هما طمعانين فى الحكم وياريت محدش يقولى لا

طيب ياترى لو فى يوم مسكوا البلد دى هيعاملوا البشر ازاى؟ساعتها البنات مش هتخرج من البيت ويتنقبوا وهيعاملوهم

معاملة الجوارى وهيتبهدلوا على حق ده اللى انا سمعته

طبعا هو شىء جميل الانتقاب والقعاد فى البيت لكن مش هنعمل زى اللى كان عاوز يلبسنا الطرابيش

ماهو مش حكم قراقوش يعنى

من وجهة نظرى اللى عاوز يصلح اللى فى البلد لازم يشقى ويتعب عشان يوصل وينظف نفسه وبعد كده يصلح من غير

الاضراب او الانتقام من الحكومة

والكلام ده للاخوان وغير الاخوان عندنا مشكلة الاسعار اشتروا الحاجة واضربوا اسبوع الاسعار هتنزل لكن ضرب وتخريب لا

ثالثا: بالنسبة لموضوع الزواج والمشاركة هو الواضح من الايميلات اللى وصلتنى ان اهل العروسة هما السبب

ياجماعة الاهالى ليهم تفكيرهم ازاى؟؟؟؟؟؟؟

اكترهم فى مجتمعنا ماشيين بالمثل ده

بيقوله مالك مغليها قاله ما انا دافع دم قلبى فيها

فبيقولك كل ما تدفع اكتر فى العروسة كل ما يتاكدوا من حبك ليها وكمان هتحافظ عليها لانك تعبت عقبال ما وصلت

لموافقتها وموافقة اهلها وضمان بانك مش هتتنازل عنها بسهولة فى يوم من الايام

ده رايهم انت بقى كفيل بانك تغييره بطريقتك وبرضو نعمل اللى علينا ونسعى ربنا مش بيخيب امل حد ابداااااااااااا

ومن وجهة نظرى الانسان اللى مش صريح

كلنا نغنى له ياحلو بانت لبتك اول ما دابت قشرتك تحرم عليه محبتك وراح اتوب عن سكتك ههههههههههههه

هى اغنية مش ولا بد بس معناها ماشى مع الموضوع

وصحيح فى حاجة كانت تعبانى وكان نفسى اقولها سالت كريم زميلى من فترة كده فبقوله لما حد بيعجب بحد وغرضه كويس

ياترى بيقوله؟؟

قالى طبعا وششششششششششششش

ولا بيحتاج وسيط ولا حد يروحله وقالى غير كده تبقى ابتساماته على نظراته لامحل لها من الاعراب

ودى رسالة عبر الاف ام يا اخوانا بنوصلها للناس :D

وعامة زميلتى شيماء الجارحى هتغطى الموضوع ده عندها بالمدونة

رابعا:موضوع النهاردة عن التدريب بقى اللى حصل باختصار شديد انى وانا رايحة ادفع اشتراك النت هفنى عقلى وقولت اشترى جرنان وعمرى ما جبت الاهرام وجبته

فلاقيت اعلان جنب AUC in egypt

مكتوب U.I.C وبالرغم انه مفهوش اغرئات الا انه لفت نظرى

اتصلت لسه بتكلم ادونى كود وقالولى انترفيو الساعة 11.30 يوم الاحد

روحت ومليت الابليكشن ودخلت الانترفيو وكان فل اوى بس طبعا لا اعلم الشركة اصلا بتشتغل فى ايه؟؟؟؟؟

ودخلت مرحلة ري انترفيو

والحمدلله نجحت وبالصدفة البحتة شوفت مصطفى محمود زميلى وسلمنا على بعض

طبعا اتعرضت لمواقف بايخة مع العملاء منهم اللى بيتعبلى دماغى

ومنهم الذوق ومنهم اللى كان راسم على خطوبة ولله الحمد بفلسع على الفور

واطلب مننا فى الفترة الاخيرة تعاقدات بس لناس غرب منعرفهوش اما القرب لو قدمنها بتكون خدمة وبسعر مخفض

وكل ما اقول يارب تعاقد يطلع بداله عريس نفسى اعرف مين بيقول مفيش رجالة فى البلد هههههههههههههه

اللى استفدته من الشغل بقى :

1- بصحى الصبح بدرى وبنام بدرى وده صحى جدا

2- ادانى ثقة وجراة زيادة

3- معرفة الطبقات والشرائح الموجودة بالمجتمع

4- انواع العملاء وكيفية التعامل معاهم

5-التخطيط فى العمل بشكل منظم

6-المسئولية الحقيقية فى اطار الشركة

7-بحس بكيانى واثبات ذاتى

8-بناء مستقبلى ....الخ

واحد زميلى بيقولى هو باباكى نزل من السفر فقولتله اه قالى يارب يقعدك من الشغل وبالفعل بوظلى تقرير كان مفروض

يتقدم للشغل بس انا قومت باللازم من غير ماهو يعرف

فى ناس كتير بتسعى عشان اقعد فى البيت ليه معرفشى

ان شاء الله المرة الجاية هتكلم عن الشخصية المفاجأة اللى قولت عليها

واذا ربنا اراد واستقريت بالعمل هعمل بوست بعنوان : اشراق غد جديد فى دنيا الاعمال

ان شاء الله هتبقى هادفة جدا وهتكلم فيها عن حاجات كتير

معلش للاطالة

يلا سلام

هبة سيد والحقيقة الغائبة

المشاركة فى الحياة الزوجية ..وجمعية لتزويج الشباب

السلااااااااااااام عليكم ورحمة الله وبركاته

ازيكم يا جماعة عاملين ايه ؟؟؟؟ وشو اخباركم؟؟؟؟؟؟؟؟

معلش لغيابى ده والله بس انا بحاول ادخل يوميا ولو دقتقتين اشوف رسايل وكده وبخرج على طول

ودلوقتى بقى هنعرض النقاط اللى هنتكلم فيها المرة دى واللى هيتأجل المرة القادمة

اولا:موضوع شياطين الانس والجن والرؤى والاحلام مؤجل عشان انا عندى امثلة كتير وموضوعات فيه متنفعش توضع بالوقت الحالى

ثانيا:فى مفاجأة جامدة مووت بعد البوست القادم ( موضوع فى منا ميعرفش حقيقته وهيكون نازل مع البوست

الشخصية المفاجاة وهى شخصية العدد ) ربنا يسهل

ثالثا: هنتناول موضوع بتاع النهاردة وهو بيتكلم عن المشاركة فى بناء اسرة وحياة زوجية سعيدة و عيوب تأخر الزواج بالنسبة للشباب والفتيات

احم احم ....اولا لازم ارحب بالزائرة الجديدة موناليزا وبقولها ياريت متكونش اخر زيارة ليكى ببلوجى

وبلوجك روعة بجد

- دكتور كريمى فينك من زمان انا موجودة والله بس انشغالات هحكى عليها المرة اللى جاية ان شاء الله

ارواح ايه بس اللى بحضرها مكانش بقى ده حالى هههههههههههههههههههه

البوست بتاعك نااااااااار وياريت تقولى رايك فى بوست النهاردة بتاعى بقى

-شوشوو وحشانى مووت ..انتى الوحيدة اللى فاهمة دماغى فى الدفعة دى

موضوع النهاردة بقى

انا طبعا ليه بعض البلوجات اللى بكون زائر دائم ليها

حتى لو مشاركتش فيها بالراى فقرأت بمدونة زميل ليه بالدفعة بيتكلم عن واحد صاحبه عاوز يتجوز وبيدور على عروسة

وكده يعنى قام زميلى عقده وقاله الدهب هيوصل ل200 جنية يبقى مفيش شبكة

والخشب زاد 300 جنية يبقى مفيش عفش والشقق ولعت والبنزين ولع يبقى مفيش عربية ...الخ

طلعت بالموضوع ده بنقطتين:1) الاخ اللى بيدور وعاوز يخطب ده شاب مثالى هقول ليه

عشان بيفكر صح الارزاق على الله وهو بيسعى ومعتقدش ربنا هيخيب امله والبنات ارزاق ممكن اذا خطب

وشها يبقى حلو عليه وتلعب البلية معاه ويبقى من اصحاب رؤوس الاموال مش بعيد على ربنا يعنى

وبالتاكيد لو حاطط واحدة معينة فى دماغه وراح اتقدم وهى متقبلاه ومحترم يعتبر الموضوع اتحل ومنتهى على خير

يبقى بلاش عقد بقى لان الظروف وحشة عند الكل

2) الزميل العزيز انا مستغربة الصراحة ان واحد كلامه كله حكم والكل بيقرأ مدونته والبعض متخذوه قدوة وقدامه هدف

انه يكون رجل اعمال فى مجال التسويق خلال 15 سنة فى احدى الشركات الكبرى ويروح يقول لصاحبه متتجوزش انت مش

قد الجواز

على فكرة الكلام ده ميصحش يطلع من واحد هداف لان اصحاب الاهداف عندهم امل وصبر ممدود وهما

اللى بيبثوا الامل فى نفوس الاخرين ( انت محبط اوى اوى نصيحة لله وللوطن انظر للدنيا بشكل تانى وصدقنى هتدعيلى ) البنات كلها مش زى بعض فى القنوع وفي المتمردة

وكل واحد ليه رزقه

* المشاركة فى بناء اسرة وحياة زوجية سعيدة:-

دلوقتى احنا عارفين ان الدنيا غلاء ومفيش فلوس كل حاجة بقت غالية اوى وبتزداد اضعاف

فالمفروض القلب على القلب رحمة والطمع يقل ما جمع ولا البت تستهبل على العريس ولا الواد يستهبل على العروسة

الاتنين يتفاهموا ويشتغلوا ويساهموا بشكل مساوى

المفروض اننا منعقدش الامور لازم نكون بساط وناس قنوعة عشان كلنا نعيش بالشكل اللى احنا عوزينه

القناعـــــــــــة كنز لا يفنى ده انا اعوذ بالله من كلمة انا بقول اذا ربنا اراد واتخطبت يعنى فى يوم من الايام بشاب فى سنى

هقعد اربع سنوات خطوبة لاكثر من سبب:-

1)ان شاء الله اعمل position و salary ممتازين يساعدنى ويساعد فى بناء اسرة مستقبلية مرتاحة

2) انه هو كمان يشوف حياته ويبنى اسم ليه فى المجتمع و position و salary ويساعد معايا

الحياة احنا اللى بنخليها كئيبة واحنا اللى بنخليها لذيذة

على فكرة كلامى ده عادى انا لسه والله ما خطبت لاحسن بلاقى حاجات غريبة على الميل

بس الخوف من الضمير مش هقدر احط حارس على قلب اللى هتخطبله

لان فى حالات بيحصل اختلاف بعد الاربع سنوات وبيسبها واول ما سمعت كده كنت هعدل الخطة بس قولت الناس مش زى بعضها

* عيوب تأخر الزواج

خلينا صرحاء وجرأه اوووى

ادى اخرة عدم الزواج النتائج كانت كالتالى :-

1) زيادة جرائم الاغتصاب فى مصر بنسبة كبيرة

2)انحراف الشباب والبنات عن طريق الانحطاط الاخلاقى وعدم تمسكهم بتعاليم دينهم والعادات الشرقية

3)التحرش والمعاكسة بجد بجد انا شوفت ناس فى غاية قلة الادب حسبى الله ونعم الوكيل

انا نزلت اسبوعين تدريب معاكسة يا نهاااااار ايه قلة الادب دى حتى المنتقبة مش عاتقينها

رجااااااااااااااالة عاوزة الحرق ( فى صنف من الرجالة بجد قذر سورى فى الكلمة بس كان لازم اللفظ يتقال ) والحمدلله ساقية الصاوى

عاملة حملة ضد الكلام ده

* كان ليه اقتراح قبل ما اقفل الموضوع ده

بفكر اعرض على حد كبير اننا نعمل جمعية لتزويج الشباب والفتيات الغير قادرين ماديا

وده من خلال مساهمة رجال الاعمال والناس اللى عندهم استعداد فى القيام بتعدد الزوجات بدل مايتجوز

على مراته ام عياله وطمع وزوغان عين

ويتلكك بانه بكده بيحل مشكلة العنوسة والاستهبال العلنى

يجوز شاب فى اول حياته ويكسب ثواب

وان شاء الله هشوفكم المرة القادمة على خير وبسلام ومتنسونيش من دعائكم

يلا سلام

هبة سيد والحقيقة الغائبة