بوست عااااااجل

بسم الله الرحمن الرحيم

السلام عليكم جميعا

معلش بوست عاجل ورجاء التدقيق فى كل كلمة بقولها

دلوقتى انا مكانتش عاوزة اقول بشكل حقيقى سر من اسرار اغلاق حسابى بالفيس بوك والجروب الياهو

واللى هيليهم اغلاق اى محادثة شات والقرار ده اتخذ مسبقا وتم الاسترجاع فيه بس معتقدش

المرة هتكون فيها رجوع لانى خلاص بقى اى حد كان بيعوزنى فى اى شىء كمساعدة

كنت بقوم بواجبى على اكمل وجه

حد بيتعب بتصل وسال حد محتاج دعاء او تهنئة كنا بنهىء وانا لما برقد مش بلاقى حد جنبى

بل بالعكس قدامى بيكلمونى بلطف من ورايا بيذموا فيه بجد عمرى ما شوفت كده

لذلك قررت انى ابعت لكل الناس اللى عندى بالمدونة ووالناس اللى اعرفهم بالغاء حساب ايميلاتى

ايميل hoba ، themoon ، ..etc

والكلام ده فى خلال يومين عقبال ما ابلغ الناس بالايميل عن طريق الرسائل

ويا سبحان الله احمد فوزى كان قلبه حاسس قالى شكلك هتقطعى فجأة وده شكله اللى هيحصل فعلا

مش علشان شىء بس انا بتعب نفسى كتير جدا قصاد كلمة شكر ومش بلاقيها

بل بلاقى عدم راحة من الاخرين مش بيستريحولى اصلا

وبيقال ذلك فى غيابى كالعادة يعنى هما عادة ولا هيشتروها

ربنا يهدى الجميع

بس حقيقى هتجنن واعرف السبب

وان شاء الله اللى يعوز اى شىء يبعتلى على الجيميل وانا تحت امركم فى اى استفسار او اى شىء اقدر اساعد بيه

وبعتذر على انى نزلت بوست كتير خلال الاسبوع ده

وفى بوست نزلته فى مدونة http://paradise-heba.blogspot.com

عن اهداف المدونة ويارب المدونة تعجبكم وتابعوها زى دى

يلا السلام عليكم ورحمة الله وبركاته

عن تذبذب السوق وتضارب المستثمرين

السلام عليكم

الواحد قاعد بلطجة بقى عقبال مانشوف الاوضاع ونترقبها لان سوق العمل مش زى الاول بجد

عاوزة اعلق على كام حاجة كده قبل ما ندخل فى الموضوع بتاع النهاردة

*****************************************

نمبر وان الاسد ياجماعه شكله هيفترسنى هل هو جعان فعلا ام مسعور يفترس دون التهام فريسته

ياخواتى الحقونى ههههههههههه قال يعنى جعان اظاهر ان الحقيقة بتجوع الناس عرفتوا ليه سميت

الدنيا بالغابة

خبرت الملكة وبتقول طالما خلاص هيعقد قريبا على كروانة يبقى ملهاش لازمة الرسايل اللى تحرق الدم

لان بكده يبقى معندوش قلب او بمعنى اصح مشاعيره طلعت شعرية بالبقدونس هههههههههه

ولو اتعزمت على فرحه مش هتروح طبعا لانها لو راحت هتعمل حاجة من اتنين

يا هتتخطب لاى حد عشان ترد كرامتها والموضوع اصلا مش مستاهل

يا هتولع فى الكوشة وهما فيها

:D

فبلاش افضل ويبعد عنها باقواله المحرقة للدم لانه بجد شكله عاوز يخليها تموت نفسها

وانا طبعا ياجماعه بناءا على رغبة الملكة ترسل له اغنية جميلة جدا

http://www.4shared.com/file/56982642/4953b333/__online.html?dirPwdVerified=40b5d3a

بوم بوم تيكا بوم

***************************************

****فى حاجة والله ياجماعه غريبة اوى فى ناس بتبعت مواصفاتها والله وارقامها للزواج

بيجيلى فى ايميلات اظاهر موضوع انى هختار تبعا للدين انتشر فى وسط ناس اعرفهم

والايميلات شغالة ترف ربنا يسهل بقى ادعولى انا مفعوسة فى وسط ايميلات اد كده

وناس رجالة مسئولة وشخصية والله ياجماعه محدش يستهيفنى او يقول ايه اللى على طول بتتكلم عن الزواج

والعرسان دى بس حقيقة فى وسائل حلوة انا كنت تايهه عنها وليه متكونش فعلا حلوة الواحد يختار المواصفات كانك بتفصل فارس احلامك

على مزاجك الخاص بترسم لحياة عاوزة تعيشيها من غير قلق وهيبقى مفيهاش هنا احراج لان اتنين بيدوروا على مواصفات بعض

عكس اتنين ممكن حد فيهم مبيدورش على التانى

وايه يعنى اختار من غير ما اروح للبنى ادم نفسه مش عيب ولا غلط طالما هو كمان بيدور عليه

انا بطبعى بحب اللى يدور عليه وانا بالفعل هدور عليه غيرى لا

والناس طباع شوفوا الموضوع ده وابعتولى ردود بالفكرة

والحمدلله فى حاجات بترتب من بعيد الخالق بيجعل للاشياء سبب

ونعمة ان فى اختلاف فى البشر ولولا كده مكانش حد خرج برة كهفه

**************************************

نمبر تووو استفسار ........لو حد عارف امتى ميعاد وايه الورق اللى نقدمه فى الدبلومات عشان مش بنزل الجامعة

وشكلى هضطر انزلها

نمبر ثرى المدونة الجديدة معمولة للثواب مش اكتر ولا اقل لايقاظ النفس البشرية بس

نمبر فور واحدة صاحبتى زعلانة انى مسحت مجانينو وكانت عوزانى والله اعملها كارتون وتوصل زى قصة هارى بوتر

هههههههههه قولتلها لا عشان الاسد هيفترسنى ومبقاش ليها لازمة خلاص

موضوع النهاردة بقى

ملاحظاتى فى عالم البورصة:-

السوق طبعا طالع نازل وفى مرحلة تذبذب ممكن توصل لاسبوع او شهرين على الاقل

ومحدش عارف الاسباب اللى بتؤدى الى زيادة قوة البائعين اللى بيمثلوا الدب وقلة قوة المشترين

اللى بيمثلوا الثور وده لاحظته بناءا على اساسيات هو ان الكل بياخد التحليل الفنى فى الحسبان اكتر من الاساسى وده

خطأ شنيع لان لما المحلل الفنى يطلع على قناة.... ويقول ولو بملامح وجهه السوق هيهبط

كل اللى بيسمع واللى مبيسمعش هيروح بايع كل اسهمه ولو بخسارة خوفا من مراكز الخطر

ده غير الناس اللى بتضارب والمضاربة فى حد ذاتها خطر كبير على المستثمر وعايزة ذكاء فنى ومالى معا

واللى متوقع حصل النهاردة فعلا المؤشر case 30

كسر 9200

ووصل من 9543نقطة

الى 9192 نقطة

وبقينا فى الموجه الرابعة تقريبا من نظرية اليوت وبكده كسر نقطة الدعم الاولى المحددة

وعشان يقوم السوق هيحصل تذبذب

ويشد نفسه بمقاومة فى الموجه الخامسة وربنا يسهل والسوق هيبقى تمام

نكمل بعدين لاحسن تعبت

سلام

قوقعة هبة سيد ( دماغها يعنى)هههههه

السلام عليكم

هالووووووووووووووو دعواتكم ليه فلة بجد

والله والله والله والله انى احبكم فى الله

مدونة جديدة عملتها بقلب وتفاؤل

http://paradise-heba.blogspot.com/

اللينك معناه انى بتمنى الجنة

من الاخبار السارة

اولا : الحمدلله نجحت فى اول مديول ويندوز وجيبت 92 فى ظل ضغوط شخصية جامدة جدا

ثانيا: عرفت من تعليقات بمدونة مجانينو ان الاسد خلاص اختار شريكة حياته بس مش الملكة يا جماعه

وطالب انى استر عليه فى الاحداث هههههههههههههههه

وكاتب خلى الملكة تشيلنى من دماغها قال يعنى هو يستاهل اوى يتحط فى الدماغ

يا سيدى ربنا معاك ويوفقك واذا كان على الملكة هقولها تفوت امرها لله وربنا يرزقها بواحد افضل منك

ثالثا: انى خلاص فرحانه وهعيش بحرية والدى ووالدتى سمحولى بانى اخرج واحضر ندوات واشوف اصحابى البنات واجمعهم

واول خروجة ليه هتكون انى هقضى يوم الجمعه مع اصحابى بنادى اكتوبر

رابعا: سمعت ان فى الحصرى عملوا سوبر جيت كاموقف كده فبفكر اروح اسكندرية مع بنات اصحابى يوم اللى كانت فى حقوق

واللى كانت بطب بيطرى وانا ادارة وهنعيش كل لحظة فى حياتنا بالطول والعرض

خامسا: هنزل موضوع طحن طحن هيفطس الناس من الضحك المرة اللى جاية بجد بجد مواقف تحدث ل هبة سيد

على مدار اربع سنوات فى جامعة القاهرة

سادسا: ادعولى فى موضوع الشغل لانى بجد دماغى حلوة ولو دخلت فى مجال الشغل هنجز كتير جدا وربنا بجد بجد

كاتبلى انى هوصل لدرجة ان فى ناس مش هتتخيل انى هوصل بالسرعة دى

وبناء على ما سبق تقرر الاتى :-

رقم واحد فكرة الزواج تؤجل لشهر سبتمبر لحين الحصول على المواصفات المطلوبة والمتوافقة مع اخلاق وادب ودماغ هبة سيد

:D

رقم اتنين الشغل ثم الشغل ثم الشغل ثم الزواج

ولانى طلبت من والدى انه ميصرفش عليه ولا مليم ولا فى جهازى ولا فى زواجى وان اكون معتمدة على نفسى فى كل شىء

رقم تالتة بناء عن مخططات مستقبلية اتضح ان اكثر الرجال يفكرون بالعقل الانانى المزواج فهكتب فى عقد قرانى

اذا تزوج فلان عليه اكون مستردة لكل حقوقى مع الخلع منه

رقم اربعة انا قفلت حسابى بالفيس بوك وبعت رسالة لزميلى اللى ماسك الجروب الياهو عشان يحذف عضويتى

ومسحت مجانينو بكده هبقى ريحت ناس كتير عشان حاسة من تعليقاتهم انى مش بريحهم

وزى ما هما مش عاوزين يعرفوا عنى حاجة انا ببادلهم نفس الشعور

رقم خامسة : بناء عليه تقرر انى هشارك فى لعبة رياضية معينة بحبها جدا تبع مركز شباب اكتوبر لان اشتراك نادى اكتوبر ولعة

رقم ستة بقى واخيرا : انى فى خلال شهر ان شاء الله هتغير فى الشكل وفى الاسلوب ازاى بقى خليها مفاجاة ممكن اصحابى يشوفوها

بالعين المجردة فى شهر سبتمبر

ووعدت ناس بالدفعة بكده

:D

صحيح مش واحد زميلى ومش هقول اسمه اعترف بالحقيقة الغائبة ههههههههههههههههههههه

وياريتنى ماعرفتها

ويلا بقى فول استوب

سلام

وز بط فارخة حمامة نسر صقر وكل انواع الطيووووووووور

ادعولى ):

السلام عليكم

اخبار الجميع ايه؟؟؟؟

انا اسفة جدا فى انى مكتبتش بوست بمدونة مجانينو اليوم

عندى تقلبات فى حياتى وقرارات بتتخذ من جانب من بالبيت وقرارت بيحاولوا اصحابى البنات انهم يشاركونى

فيها هى مش شغل بس الصراحة

بس ربنا يستر

فكل اللى طلباه من الناس بجد هى انها تدعيلى جامد

والله العظيم انا بتكلم بجد مش هزار يمكن حالتى النفسية لو تلاحظوا ان كتاباتى قلت وحالتى اثرت على المدونة

يمكن مش هقدر اذكر اسباب اللى اتاثرت بيها نفسيتى بس لو حصل اللى مكانش لازم يحصل اكيد هقول فى المدونة

قدر الله ماشاء فعل ومفيش حد بيختار نصيبه

يعنى الواحد بيدعى اللى فى دماغه يقرب ويحصل بيقول خيرلو حصل محصلش بيقول خير برضو

وربنا يسهل الحال

واتمنى من الجميع انهم لا ينسونى من دعائهم اذا كانوا بيعزونى ويحترمونى فعلا

): ): ):

سلام

انا لست مغرورة....!!!

السلام عليكم ورحمة الله وبركاته

عاملين ايه كلكم ؟؟؟ الدنيا بجد صعبة فى كل شىء

الحمدلله الذى لا يحمد على مكروه سواه

ربنا يعلم انى والله بكتب ولا قدامى ورق ولا حضرت شىء ولا شايفة قصادى اصلا

بس فى كام حاجة حصلت خليت ناس اعرفهم قلبوا عليه وفى البيت عندى الموضوع ساب تأثير

بس لكل واحد وجهة نظر

اللى حصل انى الحمدلله رب العالمين زيى زى اى واحدة فى سنى بيجلها عرسان

الشىء الطبيعى ان ليه عدة مواصفات بقييس عليها الشخص اللى هقبل انى اكمل حياتى معاه

بجانب طبعا الاستخارة عشان تكون العملية واضحة ومتكاملة

اللى حصل ان كان واحد واتنين من اللى اعرفهم بدون ذكر موقعهم اتقدمولى بنفسهم

دون وسيط فعملية التحدث معاهم كانت اصعب

لانى مهما وصلت من جرأة فى التحدث مش هقدر اقول مواصفات اللى عوزاه

فى وشهم

عشان الاحراج بالنسبة ليهم ولازم براعى اللى قدامى

اللى حصل عند عدم القبول ان انا خلاص بقى بقيت انسانة مغرورة وكلام من هذا القبيل

ليه اتهم بالغرور يعنى ؟؟؟؟

لدرجة ان والدى تجرأ وسألنى بيقولى هو فى حد فى حياتك مثلا ولا مستنية حد وهو مش معترض

فطبعا بعيدا عن ابى الناس كلها اصلا اى واحد بيجى لواحدة يبقى لازم تتجوزه

وده طبعا بالنسبة ليه شىء مرفوض

لسبب :

الحمدلله اللهم لا حسد يعنى مفيش اسبوع يعدى الا لما يكون فى واحد واتنين بيطلبونى

اذن فى رجالة ومش قليليين مثلما قيل

ومنهم ناس قالولى انتظرينا بس سنتين والله انا مستعدة تلاتة واربعة كمان

بس مع الاسف مفيش توافق

اولا: الدين الناس بتحسبه صوم وصلاة بس وده مش حقيقى

ثانيا: الاخلاق

ثالثا: الطموح ياترى نفسك توصل لايه وهتوصل ازاى لو انت محلك سر

الله حقى هل ده يبقى غرور

وانا والله عمرى ما عيبت على اى حد

بس النظرية اللى بتبعها هى ازاى انقى صح من بين كل دول

اصل مش هتجوز كل يوم مثلا

ووالدى معترض على الاستخارة فى الجواز

قالى كل واحد فيه عيب ومفيش حد كامل يبقى مش هتخلصى وهتعنسى

وحصل ضغط فى البيت انى اتخطب كا نوع من التعارف وبعد كده اقرر

وزميلى كريم من فترة الله يسامحه راح كبر الموضوع فى دماغ والدتى

ويقولها اه وتستنى ليه ما تتخطب وربنا يوفقها ياهبة متضيعش وقت

وقت ايه بس هو احنا هنضرب بعض فى خناقة :D

انا ليه تخطيط معين عاوزة شخص فى كذا وكذا ده حقى وانا حرة فيه

ومش معنى كده انى اروح لحد بعينه واقوله اخترتك وهتجوزك

لالا مليش فى الحوارات دى صراحة

لو حد فعلا موجود بيبان من كلامه انه مهتم ولا لا

او على الاقل يتكلم بنفسه

لو كارهنى وخلاص بقى الواحد بيحس ان مفيش قبول من الطرف الاخر وانتهى الامر

وببتدى اشوف حالى طالما هو اصلا بايع القضية زى ما بيقولوا

ولو ليه نصيب فى حاجة هشوفها والاستخارة اولا واخيرا هى استشارة الرحمن

اظن دى استشارة ما بعدها استشارة

ولازم ياجماعه يكون فى توافق روحى وفكرى لو مفيش تبقى الجوازة دى فاشلة الصراحة

وعامة لو انا فعلا مغرورة يبقى وكيلى ربنا

وانا مش زعلانة من القول ده بالعكس انا بحب اعرف راى الناس

بس مش معنى عدم قبول يبقى اتهم بالغرور

ودى مجرد وجهة نظرى و راى يجب ان تحترم

وربنا يسهل محدش عالم يمكن ربنا يكرمنا ساعتها وهتعرفوا انا مغرورة ولا لا

بس

بالنسبة بقى لمجانينو هحاول انزل الحلقة التالتة يوم الجمعه ان شاء الله

بالنسبة ليه انا مضغوطة شوية عشان بحاول ادور على شغل وبتدرب وربنا يستر بقى

دعواتكم انا مش ماشية غير بدعاء الناس

يلا السلام عليكم

هبة سيد والحقيقة الغائبة

اجمل صيف فى حياتى،صيف بلا معاصى

السلام عليكم ورحمة الله وبركاته

عاملين ايه كلكم؟؟؟؟

هتكلم فى كام نقطة سريعة كده قبل الدخول فى موضوع النهاردة

اولا: مش عارفه اقول ايه على الراجل بالضبط لو مثلته بالحيوان هنقول حرام لان الحيوان على الاقل

عنده شعور وحرام انى امثل بشر بحيوان

فى برنامج عم يتساءلون اليوم بيتحاكوا عن مشكلة تعدد الزوجات

فواحد من الناس بتتصل وبيقوله مراتى عوزانى اطلقها عشان هتزوج عليها

مش من حقها ومش عارفه ايه وربنا قال الطلاق ابغض الحلال عنده الطلاق

طيب بذمتكم ده بنى ادم معندهوش ريحة الدم ولا لا؟؟

لما اتزوج فتاة عندها شعور واحساس وبكل بساطة عايز اتجوز عليها وبرضو

تبقى هى معايا وهى طلبت الطلاق تبقى انت راجل عديم المشاعر والاحساس

الرجالة بتاخد من كتاب الله اللى على مزاجهم فين حق المراة

ولن تعدلواااااااااااااااااااا

ربنا بعد ماقال مثنى وثلاث ورباع واكمل الايه انهى بلن تعدلواااااااااا

اذن ربنا عالم ان الزواج باخرى لاسباب معينة

وربنا مقالكش ياعم العريف روح اتجوز عشان العنوسة قال هتحلها يا جبان

طيب ادى فلوس للشباب تتجوز لا ده واحد اصلا مش محترم وبيتلكك

قال يقولون شرع الله

ومن افترى على الله كذبا

انا كان هاين عليه اكسر التليفزيون النهاردة

مش عاوز تدى مراتك حريتها عشان خايف هى تتجوز مش عشان يعدل ويحس انه مش هيظلمها

مفيش راجل عادل اصلا وده لانه تزوج باخرى كل امراة بتحاول تحنن قلب

زوجها عليها يقوم غاضب على التانية

اياكم والنساء فان كيدهن عظيم

حسبى الله ونعم الوكيل

ثانيا: طبعا بعتذر لناس انا مش عارفه مين بالضبط بعد ما رجعت من المصيف

الموبايل بتاعى اتفيرس ومبقتش اعرف مين بيتصل بيه حتى الرسايل معلقة ومبتوصلش

فمعذرة للى اتصل او بعت

ثالثا: متوقع انى لم اكمل مدونة مجانينو 2280 مش عارفه يمكن زهقت او حسيت

ان الدنيا مليانة مشاكل وحاسة باحساس غريب اوى ان الكل بيستهبلنى

ليه معرفش المصيبة انى بحس بكل شىء وبمشى برضو فى نفس الطريق

واسيب الكل يستهبلنى مش عارفه بس دى مش طيبة قلب لا ده هبل

رابعا: بالنسبة لجروب ادارة والمنتدى والكلام ده كله

والله اتكلمت مع محمد راشد وقالى مفيش فايدة الناس نايمة خلاص

وانا حاسة فعلا مفيش روح

فانا عملت جروب بالفيس بوك لاقيت الناس ابتديت تتفكك اكتر من كده

هضطر اسفا انى اسلم الجروب لمحمد حسين

ومش هستمر فى اى نشاط تابع لدفعتى تماما ولا اجتماعات ولا مقابلات

ولا ايميلات وهنسحب بعضويتى من جروب الياهو

لان بجد احنا كدفعة مبنتجمعش الا فى حفلة حلوة فى فطار حلو وكمان لازم اننا نموت نفسنا

عشان يتكرموا علينا ونتجمع لا انا بشر برضو

مع العلم ده مش تهديد بس بقول على اللى فى دماغى

ندخل بقى فى موضوع النهاردة

ايه ياترى العنوان اللى فوق ده

ده شعار الرحلة اللى انا روحتها يوم السبت اللى فات

الموضوع بدأ ازاى دخلت يوم الاربع على النت لاقيت شيماء الجارحى

وانا بكلمها بتقولى ماتيجى ده فى مصيف وكده وشوفنى النظام عندك ايه وبلغينى

طبعا ماما كانت رافضة لانى اصلا مبروحش رحلات

على طول قاعدة فى الكهف بتاعى ومبشوفش برة الا فى المناسبات

المهم كلمة منى كلمة من بابا وماما

تقررت الموافقة

وطبعا الجروب اللى طالع كله بنات وده طبعا اللى خلانى اجرى واتشجع اكتر

وبالفعل تبادلنا الاتصالات بينا يوم الجمعه وعلى علم ان الشاطىء مش هيبقى فيه

اى ذبابة حتى الملابس اللى روحت بيها انا وشوشو دالة على ذلك :D

نمت الساعة11.30 بليل وصحيت 4 الفجر صليت وبابا وصلنى بالعربية لشارع العريش

وركبت سوبر جيت مع الناس كلها

المهم انا مش متعودة على الخروج مع جروب واتضح ان اكثر البنات اخوان

قولت اااااااااه الفسحة باينة من اولها

ومنكرش انى اكتئبت فى الاول وشكلى بان عليه

حتى شيماء حسيت بس انا حاولت اتوه وابين انى سعيدة جدا

انا طبعا مقصدش شىء بالاخوان ولكن بحس فى تعاملهم انهم جاديين جدا

وانا بطبعى بحب الجد لوقته والفسح والضحك والفرفشة فى الوقت التانى

المهم الاتوبيس طلع عرفنا اننا مش طالعين اسكندرية احنا طالعين فين فايد

وبدأنا باذكار الصباح والقرآن الكريم وبعد ماخلصنا بدات ناس تتعرف عليه

لوحدهم من غير ماحتى انا اقدم على التعارف بس بطبعى عندى قبول شديد

اى حد بيكلمنى كأه يعرفنى من عشرين سنة

هههههههههههه

فلاقيت الفسحة ابتديت تحلو وجهة نظرى ابتديت تتغير

قامت شيماء واعلنت عن مسابقى مضمونها 10 افراد يكونوا جروب للتعارف

والمطلوب ان كل فرد يعرف عن كل الافراد ادق المعلومات الشخصية

وهتبتدى المسابقة فى نقطة العودة

واحنا ماشيين فى الطريق طلعوا الدفوف وايييييييييييييييه

هههههههههههههههه

شوية ولاقيت طفل بيعيط وانا بكره فى حياتى اشوف حد بيعيط وبالذات الاطفال

فبقوله مالك ياحبيبى ؟؟ ماماته قالتلى اخوه عبد الرحمن ضربه

فبقوله طب اسمك ايه قالى عمر

قولتله عمر وتتضرب برضو ميصحش يعنى انت المفروض تقفلها فى ساعتين وربع:D

ماماته قالتلى اصل عمر غلبان فقولتلها ربنا يخليهولك وسكت

ولاقيت اطفال كتير اسراء واروه ويوسف

وخلاص وصلنا بالاتوبيس فهننزل فواحدة بتصحى ابنها مش عاوز يصحى

بقولها حد ينام دلوقتى قوم يا ابنى

قالتلى عمر بيحب ينام كتير هههههههههه

فبقول لشيماء الجارحى انا هسمى الاتوبيس ده عمر للسياحة

ههههههههههههههههههه

والله خوفت اسأل السواق على اسمه يقولى عمر برضو دى بقيت حكاية

المهم دخلنا الفيلا ومنظر البحر روعه روعه روعه بجد وهضبة صغيرة فى عرض المية

والجنينية فى الفيلا دخلنا غيرنا هدومنا على طوال

لسه هنخرج من الاودة الحقوا مراكب صيادين عليها شابين ووولد صغير

طبعا محدش نزل الا لما هما مشيوا لاننا مكناش عاملين حسبنا يعنى

وطبعا وبكل فخر هبة سيد مبتعرفش تعوم اصلا

قعدت مع الاخت اسراء واروه والاخ عمر على الشاطىء

كنت بعوم على الرمل هههههههههههههه

وشيماء الجارحى سايحة من الضحك عليه وتقولى يابت تعالى اعلمك

اقولها شكرا

وكل شوية تتدخلنى جوه اخرج اجرى برة على الشاطىء هههههههههه

واللى يضحك بجد الكل بيعوم لجوه انا الوحيدة اللى بعوم لبرة

ههههههههههههههههه

اقولها ياشيماء البحر ليه ملايكة البحر فبتقولى انتى خوافة

قولتلها خوافة خوافة من خاف سلم والاعمار بيد الله

اتاريها بتعوم على ظهرها قولتلها عومى عادى زى الناس قالتلى لا

قولتلها كمان مش محترفة وعاوزة تعلمينى

يالهوى يالهوى

فقعدت على الشاطىء كل شوية تجيب واحدة وتوصلها للشط فى ايه ياجماعه

؟؟؟

شيماء تقولى بعلمها شرقت وشربت ميه

طبعا ضحايا شيماء الجارحى وصلوا لاربع خمس افراد والبقية تأتى

انا ضحكت وقولتلها هفضحك فى المدونة :D

عشان مطولش بس

النهار عدا واتجمعنا فى بارجولا وسمعت احلى كلام عن رسول الله صلى الله عليه وسلم

وعملت اتصال بحد كده على العصرية محدش رد

وقعدت مع شيماء الجارحى وغيرنا ومشينا على 7 كده

ووصلنا 9.30

بس طبعا طول الطريق بعد اذكار المساء شيماء عملت فيه حتت مقلب

قعدت تقولى عاوزة اقولك على حاجة بس خايفة انك تزعلى

قولتلها قولى يابت قعدت تقولى كلام قولتلها حصل امتى الكلام ده

وازاى طبعا نمت على الكرسى والضغط ضرب فى دماغى

قولتلها خلاص خير قدر الله ماشاء فعل

وتقولى ياريتنى ماقولتلك

بس عشان انتى صاحبتى ولازم تعرفى

بقولها مقولتليش ليه على الكلام ده من يومها

المهم نزلت من الاتوبيس مش شايفة قدامى

واتخنقت واول ما وصلنا شارع العريش بتقولى انا عملت عليكى حوار

واول واخر مرة اعملها فيكى

عشان اعرف حاجة واتاكد منها عليكى قولتلها حرام عليكى

تعبتينى انا صدقت وانهارت نفسيا ساعتها

وهى سايحة من الضحك عليه

ولا داعى لذكر الموقف

اللى استفدته من الرحلة بقى

ذكر الله سبحانه وتعالى فى هذه الاماكن الجميلة وعدم ارتكاب معاصى فيها

تشهد عليه يوم القيامة

غيرنا بيروح المصايف عشان يتباهى بالبيكينى امام الشباب

والحمدلله مكانش فى شباب اصلا هناك ولما بنشم خبر عن بعد الكل كان بينسحب من الشاطىء على الفيلا عدل

كنا بنذكر الله فى البحر والبر صلينا جماعه قصر

تحدثنا عن احاديث الرسول صلى الله عليه وسلم

ياجماعه الا بذكر الله تطمئن القلوب

فعلا اجمل صيف فى حياتى صيف بلا معاصى

والسلام عليكم ورحمة الله وبركاته

يلا سلام

هبة سيد والحقيقة الغائبة

الوصول للقمة وتقديم التنازلات

السلام عليكم ورحمة الله وبركاته

عاملين ايه ؟؟؟ طبعا انا بشكر كل اللى دخل وعلق بمدونتى وليه الشرف طبعا فى مرورهم الكريم

بس فى حاجات كده هعلق عليها :- الباحث عن الحقيقة حاسس ان شخصيتى غريبة انا هقول سبب الاحساس ده

دلوقتى انا بتكلم بشكل بسيط جدا وعام وسلس وقد تكون اكثر المدونات بتمشى باللغة العربية الفصحى

بس انا بجمع بين العامية واللغة
نقطة اخرى مش معنى انى تكلمت عن الروحانيات يبقى بحضر مثلا

:D

واذن تعد شخصيتى غريبة لا انا قراتى متعددة وفى مجالات شتى فى حاجات بتوضع محل الصدق

وحاجات لا

شيماء الجارحى من الناس المقربة ليه جدا يعنى قد تكون تعرف ادق التفاصيل فى حياتى عن غيرها

وعارفه انا بفكر ازاى ولو سكت يبقى فى ايه ورا سكوتى بحب ايه بكره ايه عايشة ازاى

كده يعنى فكلمتها فى اكتر من موضوع فهى بتعترف ببعض منها والبعض الاخر لا

او بالاصح مش بتحب تقرا ولا تتدخل فى مجالات معينة زى المذكور اعلاه

بس طبعا انا مش زعلانة من الباحث عن الحقيقة بس حبيت اوضح فقط

بالنسبة لصاحب مدونة برقش مدونتك جميلة اوى انا زرتها بس لسه متركتش تعليق فيها

انا من زمان اعرف انهم بيقولوا على ملك الموت عزرائيل يمكن الاسم خطا بس تعود

سامحنى فى هذه الغلطة

وميرسى لمرورك وميرسى ايضا لمرور مستر ديفيد وكل الناس اللى علقت

واتمنى ان موضوعاتى تكون عجباكم

ثانيا:-ربنا كرمنى الحمدلله وفتحت مدونة جديدة بعنوان مجانينو 2280 عجبت ناس كتير اوى اوى

وهى فى نظرى متقلش اهمية عن مدونة حياتى مضمونها عبارة عن قصص حقيقية بس هيتم عرضها

باسماء وهمية وكمان قد تكون مثل صياغة الف ليلة وليلة فى الكتابة وليس عدد الحكايات بها

وهدرج فى نهاية كل قصة دروس مستفادة

http://maganeno2280.blogspot.com/

ثالثا:- حد بعتلى سؤال على الجيميل بيقولى اى من سور القرآن بتساعد فى الكشف المنامى

او اللى بيستعينوا بيها بجانب الاستخارة

بصوا هو عن تجربة والله على ما اقوله شهيد جربت مرة الايات القصيرة

قبل امتحان علم الادارة كنت محتارة فى شخصيتن بالكتاب الدراسى جيين بالامتحان

قرات بنية الكشف ولما استلقيت على السرير عرفت ان فلان جاى كان شوفت حاجة قدامى كده

فى ناس بيجيلها الكشف فى المنام وناس فى اليقظة وناس بالاحساس وناس ربنا لسه ممنش عليهم بذلك

برضو سورة يس قلب القرآن الكريم هى سورة مباركة تقرأ بنية اى شىء

والحمدلله برضو جربتها كانت فى شخصية قلقانة عليها جدا

قرات وكان نفسى اعرف طريقها فى اى اتجاه والحمدلله فى منامى ربنا ورانى طريقها

الحمدلله الذى لايحمد على مكروه سواه

طبعا عشان محدش يقول هبة سيد بتخرف انا الكلام اللى قولته فوق انا جربته بنفسى

ومش شرط كل واحد هيعمل زى ماقولت ربنا هيبعتله على طول

فى حاجة اسمها صلة العبد بربه لو صلتك جامدة وكويسة الحاجات دى هتبقى سهله اوى

وعشان نبقى واضحين الغيب نوعان غيب مطلق وده الذى يعلمه الله عز وجل وحده

وغيب نسبى وهو ان الله سبحانه وتعالى يعطى بعض من علمه الى بعض من خلقه والدال على ذلك

الحاجات الناتجة واللى بنشوفها فى

الاستخارة والرؤى والله اعلم

الحمدلله محبش اقول حاجة وافتى فيها طالما معنديش علم بيها

ندخل بقى فى موضوع النهاردة

الوصول للقمة وتقديم التنازلات

ايه الاسم الكئيب ده يا ساتــــــــــــــــــــــر

فى ناس كتير عندهم طموح واهداف عالية جدا ونفسهم يوصلوا ليها

بس المشكلة فى المعادلة اللى قدامنا دى

لو انا مثلا نفسى اكون سيدة اعمال او مديرة او رئيسة قسم ياترى هوصل ازاى؟؟؟

بالمعادلة دى :-

تعب + دماغ + فلوس + واسطة + كورسات + تمسك بالدين= المنصب ( الطموح / الاهداف المرغوبة ) بس

طيب التعب والدماغ والكورسات يعتبروا فى متناول الجميع

طيب مشكلة الفلوس والواسطة وتمسكنا بالدين واش دخل الدين فى موضوعنا دلوقتى

هقول حالا

الواسطة امرها سهل مفيش بشر كده كده ربنا هيبقى واسطتتك فى الحالتين

بس لازم تكون نيتك حلوة عشان ربنا يقف جنبك

طيب الفلوس هنربطها بالدين

دلوقتى انا مثلا عاوزة اخد كورس ب10 الآف جنية

طيب مش معايا ولا مليم طيب هعمل ايه دلوقتى ؟؟؟؟؟؟؟

هشتغل طيب قدامى يا شركة واخد اقل من الالف يا بنك واخد اكتر من الالف

طيب والربا؟؟؟؟؟؟؟

قولت طيب ما اقول سامحنى يارب واشتغل فى بنك وبعد كده اتوب

عشان اوصل لهدفى بس او احلل ما حرمه الله

طيب فى قناة الناس قالوا البنوك حرام بس لو الرجالة اشتغلوا فيها يبقى هما مضطرين

وفى الحالة دى مش حرام لانهم مسئولين عن اسر

والبعض قالك لا حرام برضو لان القروض بياخدوا عليها فوائد جامدة

وانا اش عرفنى المرتب اللى هاخده من الفايدة دى كانت فى اى مشروع

وهل المشروع اللى صرفت عليه البنك محلل ولا محرم

وناس تقولك ده البنوك ده اقتصاد بلد وده حقيقى البلد قائمة على البنوك

فا طبعا حصل جدال وعشان كده اخذت بقول

واجتنبوا الشبهات

لانى بنت ومش مسئولة فمش هبقى مضطرة اوى يعنى

المشكلة بقى فى تقديم التنازلات:-

اى حد فينا لو اتنازل عن جزء من مبدأه يعتبر البدأ كله انهار لان المبدأ لا يتجزأ

ونلاحظ اكتر الناس اللى بتوصل تقولك مفهاش حاجة لو اقدم تنازل واحد فى سبيل انى اطلع درجة

وهو ميعرفش انه طالما قدم اول تنازل هيقدم فيما بعد عدة تنازلات

ده نتيجة للطموح الزائد واى بنى ادم بيذوق طعم المال والجاه بيتعمى عن انه يوصل ازاى

ممكن يوصل باى طريقة سواء مشروعة او غير مشروعة

طيب نتكلم على ازاى اننا نتخيل هدفنا ونحطه فى حلم عشان نقدر نحققه

دلوقتى ماشى حياتك قدامك على شكل فيلم وحط نفسك بطل فيه

وشوف نفسك لو تعبت وفكرت واخدت كورسات واكثر طاعة لربك

شوف نفسك ماشى ازاى وهتبقى ايه

بالنسبة بقى للناس اللى ملهاش اهداف او اهدافهم ليس لها قيمة

يسألوا نفسهم سؤال واحد فقط

احنا عايشين ليه وعشان ايه

ومن هنا هيقدروا يحددوا اهدافهم

اشوفكم المرة القادمة وهتكون حلقة حلوة اوى هتكلم فيها

عن الاحساس والمشاعر

يلا سلام

هبة سيد والحقيقة الغائبة