السلام عليكم ورحمة الله وبركاته
-----------------------
ده تاج وصلنى وبصراحة مش عارفه يعنى بس عاجبنى لان كنت حابة اقول حاجات والتاج ده سبب فى تحدثى
المهم
التاج وصلنى على الجيميل باسم واحد اسمه احمد رفعت
1- اسمك الحقيقى والمستعار؟
والله هبة سيد هى الناس مش مصدقة ولا ايه :D
المستعار محدش يعرفه غير ناس من العيلة اسم جميل بس دلع عشان كده مش بقوله يعنى
2-هل عملتى حاجة ندمتى عليها؟؟
لا الحمدلله لان بفكر كويس وبعرف اتصرف ازاى وامتى وازاى وبعرف مين يستاهل ومين مش يستاهل فتصرفاتى محكمة
3-بتتخذى قراراتك بعقلك ام بقلبك ام بالاتنين؟؟
الاتنين ..عقلى عشان المنطقية وبدرس الموضوع من كافة الواحى ام قلبى برجعله لكن مش من حيث العاطفة فى الاولوية
ولكن برجعله فى انه دليل اى مؤمن والحمدلله بيدلنى
4-اصعب مواقف فى حياتك؟؟
والله فى كتير ..بس فى الاول والاخر بقول الحمدلله رب العالمين
يعنى يجوز اقرب موقف كان من كام يوم دخلت المطيخ بحضر سحور فماسكة سلك مواعين بايد وبشد بايد
لاقيت جسمى كله اتنفض نفضة زى الفل..اتارى السلك كان داخل فى فيشة كهربا وربنا سبحانه وتعالى ستر
صعب فى ايه ؟؟ فى انى فى كل مرة اشوف الموت بعينى عشان اتعلم معملش اى شىء غلط او اغضب ربنا
5-قضية الاخلاص للرب والاخلاص للصديق..رايك فيهم ايه؟؟
الفرق كبير طبعا..الاخلاص للرب شىء والاخلاص لاى مخلوق شىء اخر
يعنى الاخلاص لله بيكون ناتج عن رضا الله على العبد وحبه ليه وكما مقدار اسراع العبد فى ارضاء ربه بكل الطرق
الاخلاص للمخلوق ده امر طبيعى انك انسان بتحب وتكرهه وتخلص وتوفى وتوعد وده امر واجب حتى لو كان صاحبتى مش حلوة من جوه
:D
نسيت بالنسبة للاخلاص فى العمل ..فى ناس بتقول ان الواحد مش يعلن عن اعماله الخيرية لانها لازم تكون بنية مخلصة لوجه الله
و انا بقول انى بروح الحصرى والحصرى محتاج ناس تتطوع للتدريس..واذا كان معنى ذلك الاعلان بيبطل فعل المؤمن من خير لعدم اخلاصه فاعتقد محدش استغفر الله ربنا عشان يحكم على نوايا واخلاص غيره لربه
وفى الحتة دى ابن الشيخ الشعراوى بيقول لوالده ليه هتعلن فى الصدقة الفلانية قاله عشان الناس تعمل زينا
وفى صدقات مخفية وصدقات معلنة عشان غيرك يقلدك ومش يحبط
ومعنى كده ياجماعه رسالة للايتام وبنك الطعام المصرى والناس اللى بتنشر ليه غير مخلصين لله بقى
كل اللى هقوله ربنا يهدى الجميع ان شاء الله :)
6- صادفك بنت شايفة نفسها او ولد شايف نفسه؟؟
اه كتير بس البنات اكتر من الولاد من وجهة نظرى لان البنات بتحب تتنطط على اللى قدامها وتبين نفسها اوى
قليل فى الولاد ..بس صادفنى شخص زى اللى كنت حكيت عنه بتاع عزيزى دى :D
والله حتى الا بضحك على الكلمة فكرنى بحمادة هلال لما كان هيغمن عليا فرامز جلال بيقوله مالك بيقوله دى بتقولى ياجميل
قام رامز بيقوله امال لو قالتلك بحبك هتعمل فينا ايه ..هههههههههههههه
فى ولاد يا اما مش بتصدق نفسها او مش بتعرف تتعامل صح مع الجنس اللطيف
7- هتختارى شريك حياتك بناء على ايه؟؟
ان شاء الله هختاره على اساس دينه واخلاقه ..شكله وامكانياته المادية اخر حاجة بالنسبة لى حتى لو معندوش شقة هستحمله شوفتوا لدرجة ايه؟؟
لسبب انا ممكن اخد واحد بيقول قال الله والرسول وهو اصلا غير مؤهل لكده ولا بيعمل بيه
ويبقى حلو اه حلاوة طحينية يعنى :d
لكن دمه يلطش ويبقى جلنف زى ما بيقولوا ومش عاطفى وقليل الذوق ..يعنى راجل ملل بصراحة ومش يتعاشر
ولو اخدته على فلوسه يبقى على راى المثل يا واخد القرد على ماله يروح المال ويفضل القرد على حاله :d
8-بتعرفى ازاى تحددى مدى منطقية وعقل شريك حياتك وتعامله؟؟
اكيد ان شاء الله لما اقعد معاه وهتكلم لان اسئلتى فظيعه والحمدلله بعرف احدد اذا كان راجل هايف ..راجل بيعرف يتعامل وسياسى فى كلامه ..يعرف يضحك عليا بالكلام ومش يزعلنى هو ده الراجل الصح من وجهة نظرى ..اللى يحسس شريكة حياته ان ليها اهمية قصوى فى حياته من الاخر مش يبقى راجل شاطر فى شغله بس لان ده سورى بيسموه حمار شغل :D
لازم يكون ليه تعاملات كتير مع الناس عشان يعرف يعامل مراته ازاى
بس
9-هل انتى راضية عن نفسك؟؟
لا طبعا لانى حاسة حتى الان مش كل انجازاتى حققتها و ده بيزعلنى جدا
كفاية كده كتير اوى وو اظن اجاباتى كافية اوى :D
السلام عليكم ورحمة الله وبركاته
