نادى المهندسين

السلام عليكم ورحمة الله وبركاته

*********************

ازيكم ياجماعه ؟؟؟عاملين ايه؟؟

كل ثورة يوليو وانت طيبين ياحلويين :D

اولا: التعليقات

-----------

*بائعة الورد*

هو تم مناقشة الموضوع على قناة المحور ببرنامج 90 دقيقة

لاستغرابهم لوجود حوالى 61 حكم بالاعدام خلال شهر واحد فقط

نورتينى يافندم بمدونتى المتواضعة

:D

*محاسن صابر*

انا زعلانة جدا جدا ...دخلت عندك مش عارفه اكتب اى تعليق

ومتزعليش ياقمر من اى كلام بايخ من الزائرين لان الموضوع ده

مش اظاهر عندك بس ..ده عندك وعندى وعند اخرين

الله يكون فى عونك يابنتى

نورتينى ياعسل :D

ثانيا:موضوع النهاردة وهو نادى المهندسين

&&&&&&&&&&&&&&&&&&

انا اصلا مش كنت هتكلم فيه لان موقع نقابة المهندسين يعتبر مستوفى كل شىء

بس هتكلم عنه بشكل عام ..هو نادى عادى خالص بس اللى بيفرق غيره عن النوادى الاخرى

انه نادى رياضى اجتماعى للسادة الاعضاء المهندسين واسرهم فقط

هل بقى ينفع غير المهندسين يدخلوه باشتراك اعلى الله اعلم

مساحته حوالى 30فدان او 38 فدان

تم افتتاحه بشكل تجريبى كان فى 26/5/2009

يعنى مسموح للاعضاء واقاربهم الدخول عادى جدا ولكن بدفع تذكرة

حتى يتم دراسة الاشتراك المناسب واللى يساعد على تكملة اجزاء مهمة وذات اهمية بالنادى

ده غير اعتبارات اخرى للمهندسين ومستقبل اسرهم

وتجريبى لان لسه مش كمل ولم يتم افتتاحه من قبل الوزير ورئيس مجلس الادارة..الخ

بالنسبة للدفع: المهندس اللى معاه كارانية العضوية بيدخل مجانا لكن اولاده

و زوجته حتى لو معاهم كارانيهات العضوية فلازم يدفعوا تمن الدخول حوالى 5ج للفرد

اما الاقارب 10 ج للفرد

بالنسبة للنادى : موقعه ممتاز لانه على مدخل اكتوبر الرئيسى وله اكثر من بوابة

وبيكون على شارع المحور وشارع جمال عبد الناصر

النادى من الداخل: فيه مسجدين صغيرين الى حين يتم بناء مسجد كبير

وباراجولات وحمامين سباحة صغير وكبير وحمام السباحة الكبير امامه مدرج

للمتفرجين وسوف يتم باذن الله انشاء حمام سباحة بحجم هذا الحمام بمقدار ثلاث اضعاف

للاتمام البطولات فيه ..فى ملاعب تم كرة القدم وتنس وطائرة وسلة وخماسية ..الخ

مكان للعب الاطفال ..مكان حول حمامات السباحة لاستمتاع الاعضاء بالمنظر

كافتيريات فى عدة اماكن مختلفة ...مكان على هيئة فيلا

وده بيضم بداخله قاعة للزوار وجيم بالاسفل بيضم احدث الاجهزة الرياضية SportsArt Fitness

وساونا ومساج ومجهز بحمامات واماكن لارتداء الملابس واماكن لحفظ المتعلقات

وبداخل هذا المبنى مطعم ذو مأكولات شهية بصراحة انا عن نفسى جربتها قبل ما ابتدى الدايت:D

ويقال المطعم ده بيتقلب لقاعة فرح عادى يعنى

بس طبعا بشكل مؤقت لان هيتم برضو عمل قاعة فرح كبيرة تضم 500 فرد

مش عارفة نسيت حاجة ولا لا

؟؟

بس هو يمكن الغريب واللى شوفته اكتر من مرة ملاحظات يعنى

فى ناس طلاب واسر من نواحى جامعة مصر وغيرها كانوا حبوا يدخلوا النادى

لكن مش نفع لانهم غير مهندسين ولازم يكون ليهم حد ومشترك بالنقابة عشان يدخلوا

تانى شىء اغرب رغم وجود كافة الطبقات بكافة انواعها الا ان معظم الاخوان هناك ليه

مش اعرف؟؟ هل لان اكثر الطبقة دى مهندسين مش اعرف برضو؟؟

بس بجد الكل يتمثل فى الاحترام والادب ولو فعلا حصل موضوع دخول اعضاء

من خارج المهندسين ممكن الموضوع يرخم لان العدد هيبقى كبير وهتبقى مفتوحة اى حد يدخل

و ده من وجهة نظرى مش هيبقى حلو

بسسسسسسس كده

يلا السلام عليكم ورحمة الله

حول عقوبة الاعدام

السلام عليكم ورحمة الله

***************

بالنسبة للتعليقات ..انا بصراحة مش بلحق اعلق بمدونتى فبعلق فى موضوع جديد

محاسن صابر:انا بجد من كلامك بعتبرك اخت واكتر بس مش كبيرة لانى بحس من

كلامك ومشاعرك انك صغيورة :D

ولى الشرف ان يكون لى اخت زيك

موناليزا: ربنا يباركلك يابنتى وييسرلك الحال ..طبعا كله نصيب وخير

وربنا يرزقنا بالصالح ان شاء الله

نورتينى

صدفة جميلة: طبعا انا ضيفت حضرتك ووضحت كل تعليقات لكن الناس برضو عاوزة تعرف

بالنسبة للفستان هو كان حشمة ويمكن لانى متعودة انزل رسمى فى الاماكن الرسمية

فيجب ارتدائه ..رجوعى لوحدى لان عارفه وقوف العربيات وحش بابا اتحايل عليا

وانا رفضت انه يوصلنى...الاغنية اللى انا حطاها موضحة انى مش بتحدث عن الموسيقى

ولا المغنى حتى انا بتكلم عن مضمون الاغنية من احداث وصراعات موجودة بالفعل

على ارض الواقع مش عارفه نسيت حاجة ولا لا؟؟؟

موضوع النهاردة بقى حول عقوبة الاعدام

اكيد الكل سمع الحوارات اللى على المحور

اولا : الاعدام هو بيعتبر حرمان من حقوق الانسان لان الدولة هى اللى بتطبق حكم الاعدام

على الانسان ..تمام

طبعا منظمة العفو الدولية بتتعارض مع القانون ده وبتتطالب بعدم تطبيقه

فى كافة انحاء العالم ماهما كانت الجريمة وما فعله المذنب!!!

المعروف اننا بمصر بنطبق الشريعة الاسلامية لكن احنا بنطبق القانون الفرنسى مع جزء لا بأس به

بيتفق مع الشريعة الاسلامية

فى قانون الاعدام لو ولى الدم حتى عفا واخذ دية بيطبق برضو الاعدام

بيقال لان القانون شقين :شق مدنى وشق جنائى

فالشق الجنائى اوك يتم التفاهم فيه المدنى لا لانه خاص بحماية المجتمع من عدم رجوع تكرار

مثل هذه الجرائم ثانية ومن ثم يتم الاعدام

ربنا سبحانه وتعالى قال :

بسم الله الرحمن الرحيم

يا ايها الذين امنوا كتب عليكم القصاص الحر بالحر والعبد بالعبد والانثى بالانثى

فمن عفا له من اخيه شىء فاتباع بمعروف واداء اليه باحسان ذلك تخفيف من ربكم ورحمة فمن اعتدى بعد ذلك فله عذاب أليم ولكم في القصاص حياة يا أولي الالباب لعلكم تتقون

صدق الله العظيم

المفروض لما ولى الدم يعفى يبقى الموضوع انتهى ومش يبقى فى اعدام

بس فى حالات الاغتصاب لا ارجح ذلك

لان لو الغى قانون الاعدام نهائيا مثلما لغى فى ثلثى العالم

اذن هيلغى فى حالات الاغتصاب ايضا..و ده من وجهة نظرى غير مقبول

لان كده ممكن الرجالة الصيع بمعنى اصح تستهبل وتقولك مفيش اعدام

وايه يعنى لما اكون اكتر من فرد معايا ونقوم بالموضوع ده

ويتقسم بقى علينا الحكم

طيب والبنت او الست اللى هيتسببوا فى ضياع مستقبلها؟؟؟

لذلك لا ارجح الغاء حكم الاعدام نهائيا

ويطبق فى الامور اللى بتسبب للاخرين ضرر فادح ولايمكن تعويضه بديه او عفو

طبعا حصل ارتفاع فى الجرائم وبالاخص القضايا اللى بتندرج تحت حكم الاعدام

عام 2008

لزيادة البطالة ..الفساد المنتشر بالمجتمع نتيجة لنقل ثقافات خاطئة

وسلبية من مجتمع غربى مفتوح يتمثل فى العولمة القائمة الى مجتمع شرقى

مغلق مقيد بالعادات والتقاليد والاخلاق النابعة من تعاليم الدين والسمات الشرقية

....الخ

فأنا بصراحة كامواطنة من الشعب و رغم كل الظروف اللى بيمر بيها الجميع

الا انى ارجح بعد الغاء قانون الحكم بالاعدام ونصه من قانون العقوبات

وان شاء الله المرة اللى جاية هتكلم عن نادى المهندسين

بمدينة 6 اكتوبر بشكل عام

السلام عليكم ورحمة الله وبركاته

يوم الجمعه بدأ اعادة الحسابات

السلام عليكم ورحمة الله

***************

معلش البوست ده طويل شوية

اولا: الرد على التعليقات

انا ودماغى * اشكرك ياقمر على ردك وتعليقك بمدونتى ...نورتينى

بالنسبة للفرق بين نادى اكتوبر ونادى المهندسين

انا مش دخلت نادى اكتوبر خالص لكن اتعرفت على شخصية جميلة جدا فى نادى المهندسين

مشتركة باكتوبر والمهندسين والصيد

المهم بسألها الفرق قالتلى ان التراك بنادى اكتوبر حوالى 400متر وعلى شكل مربع او مستطيل

اما بنادى المهندسين 650متر وبيلف حوالين النادى من جوه فبتبقى شايفة الناس واللى على حمام السباحة

واللى بيلعبوا تنس وخماسية...الخ

الحاجة بقى اللى شوفتها من وجهة نظرى حلوة وبتميز نادى المهندسين عن اكتوبر

ان المهندسين للمهندسين بس

عائلات عائلات

اما نادى اكتوبر فمن بدأ انشاءه وهو كان بيوزع استمارات على كل الاحياء

وكل الافراد من بداية 100ج حتى وصوله الان الى حوالى 45000ج للمصريين

و60000ج لغير المصريين او 900 ج اشتراك سنوى مؤقت

انا عايش ولكن* الله يكرمك يافندم نورتنى

هو البنت والولد وكل اللى بشوفه وبسمعه يعقد اصلا

تقول لشخص غض البصر يقولك لا اصل انا شاب ..طيب افرض ياعم الشاب ربنا اختارك وبيحاسبك عن اعمالك هتقوله اصل

انا كنت شاب!!!!!!!؟؟؟؟؟؟

ربنا يهدى الجميع

محاسن صابر* اشكرك يا بنتى على شعورك النبيل وسؤالك عنى وبتكبرى نفسك ليه اختك الصغيرة قال

:D

الله يكرمك على كلامك ياعسل

موناليزا * نورتينى ياعسل ...بالنسبة للتيست فمش هقدر اقوله لسبب ولنفرض جيه شخص يعرفنى على الحقيقة

وبيتابع المدونة وشاف كل التيست وفهم الليلة هياخد احتياطه

واللى هحب اكشفه فيه سواء فى اخلاقه ودينه واهله وكل ده مش هيبان الا بقى لو مواقف اثناء الخطوبة

واضطر انى افركش وتتحسب عليا خطوبة

بس اوعدك لما فعلا الاقى حد يستاهل ونجح ان شاء الله هكتب التيست :D

سقراط* هههههههههههههههههه

جيش الله يكون فى عونك ...لا مش تستغرب دى مجرد حاجات كده متاخدش فى بالك

بكرة تشوف وتسمع وتصدق

:D

ثانيا بوست النهاردة بقى غريب شوية

اامبارح الجمعه يعنى صليت الفجر وجيت انام نسيت اقرا الكرسى والايات ولا ايه معرفش

المهم النهار شقشق وعينى غفلت ونمت

المهم شوفت حاجة غريبة بدعى بحاجات كده وبعدين شوفت سحب كتير بوضوح

وفيها علامات مش فهمتها واول ما جيت اقول يارب لاقيت انا بجسمى بروحى بتسحب من البلكونة لجوه الشقة

فبدأت افتح عينى فى الحقيقة لكن مش عارفة افوق وفتحت وصحيت نفسى باعجوبة فشوفت زى عين بنى ادم بصة لى بفتح جامد مش لاقيت حاجة

نفضت وقرات قران ونمت وشغالة كوابيس بقى

المهم صحيت كان عندى فرح زميلى وزميلتى بالدفعة جهزت الفستان السوارية والشوز وكله.. عايزة اروح اوجب ولو ربع

ساعة وامشى بس المشكلة قلبى مش مرتاح للخروج فى اليوم ده !!!

و لاغيت مواعيدى كلها الجيم والكورس ...طب وبعدين انزل ولا لا

المهم جهزت نفسى 6.30 كنت فى الشارع لبست الفستان وفوقه العباية السوداوالنظارة الشمس

ركبت الجيزة برضو مش مرتاحة ...فاتصلت بشيماء الجارحى انا جيت العريش اجيلك لان انتى مش جهزتى

لان وقوفى بالشارع صراحة بهدلة للى زى حالاتى

طلعت شقتها فماماتها استغربت انى مش اتخطبت فبتقولى انتى ماشاء الله كويسة ايه سبب وقوفك فى الموضوع ده

لما حكيت تفاصيل كتير قالتلى بالمنظر ده مش هتجوز هههههههههه

المهم نزلت من هناك عمالة افكر طيب هو انا غلطانة انى مش تمسكت بفلان زى ما تمسك بيا

طيب هو انا غلطانة فى تقديرى

طيب هو انا كنت بنظر للرجال على انهم اشياء غريبة عايشة بس للافتراء على النساء

فضلت بصراحة مش تفكير بس لكن تأنيب ضمير ..خوف انى اكون افتريت على اشخاص فعلا يستحقوا التقدير

المهم

استنينا بالشارع اتارى صاحبة شوشو معاها العنوان بتاع الفرح

فضلنا ساعة فقولت مبدهاش بقى اتصلت بزميلى قولتله تعرف العنوان قالى تقريبا فى الشارع كذا عند كذا

طبعا انا رغم كل ده واكتئابى الشديد الا انى لازم ابقى بشوشة و بضحك فى وجوه الناس

صاحبة شوشو جت

ولسه بندخل الشارع طبعا انا لابسة عباية سودا فكانت لازم تتخلع

هى كانت بكابسين وانا بفتحها شيماء اتخضت

الشارع من ورانا وعلى بعد مش قريب الرجالة وعربية عروسة امامنا

فقولتلها مينفعش انى ادخل على الناس بالاسود هيزعلوا او يفهموا غلط

المهم طلعت الفرح اسلامى وبما انى بصراحة مش بحب ولا الاغانى الاسلامية ولا غير الاسلامية

فمش كنت متجاوبة معاهم لكن ممكن اسقف ابتسم وخلاص

الساعة جت 10 خدت بعضى وجريت ومالاحقتش حتى البس العباية نزلت بالفستان تحت هو حشمة اصلا بس ملفت

جريت برضو وانا مخضوضة

وقفت ساعة فى الجيزة ومالاقتش ولا عربية لاكتوبر

ولازم اوصل هروح فين واجاى منين

لبست العباية عشان محدش يضايقنى كفاية القرف اللى بشوفه فى كل خروجة

وروحت ميدان لبنان كان 11.30

وصلت البيت 12.15

بصراحة طول الطريق خوف وكرب ومضايقة وخايفة من اللى حواليه

مش عارفه عمالة افكر افكر ومش نمت حتى الان حتى أذان الفجر

هل انا غلطانة فى تفكيرى ولا تجاربى فى الحياة قليلة؟

هل الناس فعلا مش بتاخد بنوايا البشر ولا بتاخد بالمنظر والمظهر وبس؟

هل هفضل كده معقدة الامور فى الشغل والجواز ولا جيه الوقت اللى لازم افكر فيه صح وانطلق وبجدية؟

هل الجواز فعلا حب واستقرار ولا دى مجرد لحظات فى الخطوبة وفى اوائل الحياة الزوجية وبيدفنها فيما بعد كلا

من الزوج والزوجة فى قلب سودته الايام؟

الناس كلها فكرانى معقدة

لكن اللى محدش يعرفه انى نفسى فعلا الاقى شخص احبه جدا

شخص يحترمنى ويحسسنى بأنى انسانة استحق التقدير

شخص متدين مش يقول كلام ومش يطبقه

شخص يراعى اهله عشان يراعنى

شخص يتقى ربه عشان يجعل له مخرجا

انا بحب الحنان والعطف زى اى بنى ادمة لكن مش ممكن اتزوج شخص

انا اللى اقوله بحبك او يكون مجرد من المشاعر الادمية

الراجل اللى يقبل على نفسه يرتبط ببنت واتنين وتلاتة لمجرد انها بتطلب منه ده

من وجهة نظرى زى البنت اللى كل يوم تحب واحد شكل عشان قالها كلمة فيها حب او اعجاب

الاتنين من وجهة نظرى واحد

و عموما يا جماعة انا لو لو لو فعلا لاقيت حد محترم اكييييد مش هرفضه ابدا

ومستعدة اطلب من شخص يجيى يتقدملى كمان بس اذا كان فعلا يستحق ذلك

معلش انا طولت بس الكل بيعاتبنى اصحابى والناس وانا بكرهه ان اكون فى موضع انتقاد

يلا السلام عليكم

حاجات تفقع المرارة

السلام عليكم ورحمة الله وبركاته

*************************

ازيكم جميعا؟؟ وكييف احوال الناس؟؟

بالنسبة للى كل اللى علق بالمدونة محاسن وموناليزا وسقراط واحمد

اشكركم جميعا على تعليقاتكم وزياراتكم لمدونتى المتواضعة

لا يا سقراط انا مروحتش حتى الان لدكتور متخصص لان اكثرهم قالولى لازم منظار

وبصراحة المنظار صعب ...ربنا يسهل ممكن اسأل واروح مستشفى الجنزورى

اخبارى بقى : 1- مش بقيت بقعد بالبيت كتير لانى بنزل جيم وبتاع فى نادى المهندسين بعد ما تم

افتتاحه باكتوبر

2-بنزل حاليا كورسات

3-بعمل تيست للى بيتقدموا لى ومحدش يحسبنى بهزر

الخ

موضوع النهاردة بقى هو عن مجموعة من المواقف الغريبة اللى شوفتها

اولا: بالنسبة للشغل فى ظاهرة جديدة يقولك لو عاوز تشتغل فى شركة بترول يبقى 20000ج

او 30000ج على الطرابيزة

لو بنك يبقى 50000ج

طيب هى دى رشوة ولا عشان دخول المكان ولا ايه

؟؟؟؟

ووالله ما بهزر

ثانيا: واد وبنت واقفين تحت فى الشارع .. البنت المحترمة اللى المفروض تكون كده

واقفة امام الولد وماسكة وش الولد وقلة ادب ولا محترمة اللى فى البلكونات ولا اصحاب المحلات

ولا المارة فى الشارع

الولد اتكسف وانا قولت هيضربها او يهزقها...لا ده خدها ودخل شارع جانبى !!!!!

تحيا مصر

ثالثا: زيادة النظرات المحرمة بالشارع من قبل الرجال للنساء والغريب بقى

انى امشى بالشارع الاقى رجالة بتتضرب جرس السيارة ويقولولى اركبى مع العلم ببقى

رايحة اشترى حاجة من قدام البيت ولابسة ازدال!!!!

والانقح انهم عندهم عربيات يعنى قادرين ماديا ..طيب ليه مش تتجوز وتحترم نفسك

ولا هى قلة ادب وخلاص؟؟؟

رابعا: كل يوم اسمع مشكلة شكل لسيدات حديثة الزواج ...فى ايه؟؟؟

تقولك انا حبيته وهو حبينى فاتخطبنا ورغم شهاداتى ومستوايا الوظيفى

رجح جلوسى بالبيت وقولتله امرك

بعد كده خلفت منه ومبقاش يصرف عليا واهلى قادرين ماليا واهله

ورغم ذلك اهلى شالوا الليلة كلها

حتى بعد زواجى وفى الاخر مش بيصرف حتى على بنته

ونزلت تشتغل فى مكان اقل بكتييييييييير من اللى كانت وصلاله

ليه؟؟؟ عشان نسيت كل ما حصلت عليه واللى اتصرف على دراستها بالالوفات

وفى الاخر تم الطلاق بعدين سنتين

طيب ده حرام ولا حلال....استهبال الرجالة!!!!!!!!

وده اصلا معقدنى انا فى اختيار عريس عدل ومحتاسة بجد وقولت لو خلاص بقى

يبقى هشييل الفكرة من الاساس وانتبه لنفسى شوية و ده طبعا من كتر اللى بشوفه وبسمعه

وياريت واحدة او اتنين دول ناس كتير

خامسا: نفسى بجد كتب الجامعة تتغير من ورق اللحمة اللى فيها وتقلب حتى ورق فراخ

:D

والشغل الاكاديمى بقى ده يتغير اللى هيجيبلنا تخلف قريب والا بقى لو كمان الدبلومات والماجستير

والدكتوراه كده

سادسا:ناس تقول اوباما وناس تقول مايكل جاكسون

يا جماعة اوباما محدش يحكم على وجهه الاخر الا لما يثبت صحة كلامه اللى قاله للعالم الاسلامى

ومش يمكن الوجه الاخر ده للغير مش لينا ؟؟؟

بسم الله الرحمن الرحيم

ولقد خلقنا الانسان ونعلم ما توسوس به نفسه ونحن اقرب اليه من حبل الوريد

صدق الله العظيم

ربنا عالم بقى بالعباد واحنا ملناش غير الظاهر فقط لا غير

ونأخذ بالنية السليمة حتى يثبت العكس

اما عن مايكل جاكسون بصراحة رغم انه غربى والله اعلم اذا كان اسلم كما قيل من عدمه

الا انى كنت بحترمه لانه احترم الاسلام كدين سماوى

ولانه عاش طفولة بائسة بسبب كراهية ابيه له وعانى الكثير فى عمليات التجميل

لان والده كان بيسبه ويدعى له بالاسود لانه شبيه بالزنوج

الله يرحمه ويرحمنا جميعا

واظن الموت مفيش فرح فيه وناس تقول ده كافر وبتاع

الله اعلم بعباد الله وكيف كانت اخرته

لان رغم ما كان يفعله الا انه قدم الكثير من التبرعات للمرضى وخصوصا للاطفال

لانه محب للاطفال وذلك بمقدار 750 مليون دولار

الا انه توفى وهو مدان ب 500 مليون دولار

ربنا يرحمنا جميعا .. و ارجو الا لا نتسرع فى الحكم على الاخرين

يجوز واحد من وجهة نظرك سافل وفيه العبر لكن بينه وبين ربه شىء اخر

بجد حاجة تفقع المرارة وبما ان معنديش غير مرارة واحدة فربنا يستر عليها

والسلام عليكم ورحمة الله وبركاته