اثباتات قرآنية ..وليس خزعبلات

السلام عليكم

دعيتوا ليه فى ليلة 27 ولا ايه النظام ؟؟ كله هيبان هيبان انا عن نفسى مش مستعجلة بالدعاء

كل سنة وانتم كلكم طيبين العيد خلاص قرب مش على الابواب لالا ده فتح الابواب والشبابيك كمان

:D

اولا : من يومين تقريبا حصلت حاجة غريبة كده اتكتب فى مدونة زميل

دعايا عن مدونتى باللينك كمان وكلام اصلا مش عارفه اقول ايه بس ربنا يهدى

الناس بجد مفيش حل غير الدعاء بالهداية

بس للتوضيح* الحمدلله مدونتى مش محتاجة دعاية والموضوع اللى بلاقيه بيهم الناس

ببعته على الجروب ومن هناك بيدخلوا المدونة

او ببعت رسايل بالفيس بوك للى اعرفهم غير كده مبيحصلش

واذا دخلت اى مدونة بيبقى بالجيميل بتاعى والله محرجة هبعت على الخاص

بس ومش عارفة اقول ايه تانى

موضوع النهاردة بقى قسمته على مرة جاية كمان

البعض بيقول ان لا وجود للجن ولا للسحر كلها خزعبلات وخرافات

قبل ما اقول اى شىء هحكى قصص هامة جدا

القصة الاولى: لناس اعرفها لكن من بعيد

هى اسرة فات على قضائها بالموت قرابة 25 سنة قبل ما اتولد اصلا

لان مصادر موثوق فيها جدا حكت لى الموضوع

الاسرة دى تتكون من اب وام واربع ابناء منهم 3 بنات وولد وحيد

كانوا عايشين فى سلام واغنياء جدا وبيسكنوا فى فيلا بجنينة كبيرة فى شارع

شهير جدا بالمعادى وحتى الان الشارع ده مشهور بالبيت ده

المهم الاب جامد وعنده حب استطلاع راح اشترى كتاب فى تحضير الارواح

واغلق على نفسه باب غرفته وحضر وياريته ما حضر

لان الاب مع الاسف حضر ارواح شريرة دون معرفة مسبقة ( جن يعنى) ومع الاسف

معرفش يصرفهم

فلبسوه ومات فى الحال واصيبت زوجته بالجنون وتوفيت البنات خلال 8 ايام

اللى ماتت بمستشفى المجانين واللى موتت نفسها وفضل الولد الوحيد ولم يعرف حتى الان اين هو؟؟

المهم الناس فى الشارع بدأول يسمعوا صوت تكسير اطباق وافراح

بالاخص ليلا وطلبوا اقارب اصحاب البيت

فاتضح ان البيت كله اتسكن بالجن واليعوذ بالله

وحتى الان محدش عاوز يشترى البيت ولا يجيى جنبه حتى

دى اول قصة دالة على وجود الجن الوارد ذكرهم فى القرآن الكريم

بسم الله الرحمن الرحيم

( وما خلقت الجن والانس الا ليعبدون )

صدق الله العظيم

*********************************************************

القصة الثانية : عن وجود السحر

زمان قبل ما التحق بالجامعه كان بيجى برنامج للشيخ عبد الله شحاته

ومصر كلها كانت بتسمعه اكيد

المهم فى احدى الحلقات اتصلت واحدة وقالتله ياشيخ انا ذهبت لزيارة البيت الحرام

تقريبا مشافتش الكعبة او حطيت ايدها على الكعبة حست بنار

مش متذكرة بالظبط عشان مفتيش لانه من زمان الموضوع ده

المهم

قالها انتى كنتى بتعملى ايه فى حياتك ؟؟؟

قالتله انا كنت بعمل اعمال وبحطها فى افواه الموتى بالمقابر

بس توبت

طبعا الشيخ هزقها وقطعوا الخط لان ربنا لم يقبل توبتها

لانها اذيت ناس ملهومش اى ذنب وماهو ما يطلق عليه بالسحر الاسود

بعد شهرين تلاتة الست دى توفيت

فابنها كلم الشيخ على الملاء وقاله والدتى توفيت

اللى حصل بقى ان الابن والناس راحوا يوصلوها لمقبرتها

ولكن كان هناك اشخاص اخرين فى انتظارها

وطلبوا من الابن ومن معه ترك الخشبة

فالابن اصر انه يدفنها بنفسه قالوله انت كده وصلت الامانة

امشوا ومحدش يلتفت وراه

المهم مشيوا الابن سمع صراخ وصوت انفجار بينظر الابن عشان يعرف ايه اللى بيحصل لامه

جنبه وشه بجسمه اتحرق

وعندما طلب من الشيخ كيف يشفى قال له ادعى ربك

ودى تانى قصة بتؤكد على وجود سحر وان الله لايقبل توبت الساحر لان الساحر بيكفر بالله

وطبعا السحر مذكور فى القران

طيب

بالنسبة بقى لموضوع السحر اللى بيتفك فجأة والنصيب والمكتوب عند الله سبحانه وتعالى

هشرح بمثال:-

فيما قبل قولنا السحر ماهو الا تخيل وخدع بصرية لااكثر ولا اقل

لو فرضنا ان (م) المفروض يتزوج من (ه) ولكن واحد غير ( م) ولنفرض (أ) عايز يتزوجها بأى شكل

يقوم رايح لساحر ويقوله اعملى سحر محبة عشان (ه) دى تموت فيه

المهم ( أ) بالفعل يتزوج من (ه) وبعد سنتين اطلقت كرهته وسابته

وتزوجت من (م) بعد عام واحد من طالقها

اللى حصل هنا ايه؟؟؟

ربنا كاتب للاخت (ه) فى السماء انها هتتجوز (م) بعد ثلاث سنوات

فلما (أ) عمل السحر ده ربنا اعطاهله فترة لان نصيبها كده كده مكتوب بعد تلات سنوات ل( م)هنا بقى

النصيب الموضوع كله بمشيئة ربنا اتظبط من فوق ولا ساحر هينفع فيه ولا بتاع

عشان كده جاءت الاية الكريمة :-

بسم الله الرحمن الرحيم

( لايفلح الساحر حيث أتى )

( ان الله سيبطله)

صدق الله العظيم

انا تعبت على الاخر وياريت تدعولى لاحسن عندى زكام حتى البنات مش عارفه اكلمهم بالتليفون

يلا سلامو عليكووووووووو

الاجابة....الاستجابة...التلبية

السلام عليكم ورحمة الله وبركاته

انا جييييييييييييت :D

نمبر وان:_______________ادعولى كتير كتير وبالذات يوم الجمعه وان شاء الله اذا ربنا تمم الموضوع

وفيه خير هعلنه للجميع

نمبر تو:___ هتكلم المرة القادمة عن الفرق بين الدجل والشعوذة والعلاج القرآنى وتصنيف من يقوم بهذه العلاجات

سواء نصب او علاج حقيقى بالقران وبنعرف ازاى؟؟؟

هوضح للناس ان فى فرق بين الخزعبلات اللى اصلا بتتعمل فى افلام الرعب والخيال العلمى

وبين الحقائق اللى مثبتة قرآنيا

لان فى مس وفى جن وفى سحر وفى اعمال ومذكور فى القران واللى يقول غير كده يبقى مقراش فى الدين كويس

نمبر ثرى: هو موضوعنا النهاردة عن الاجابة والاستجابة والتلبية

قال الله تعالى : ( واذا سألك عبادى عنى فانى قريب اجيب دعوة الداع اذا دعان فليستجيبوا لى )صدق الله العظيم

اول حاجة هتكلم فيها: معنى الاية الكريمة

ربنا هنا بيقول للعباد اللى كلفهم بتكاليف وواجبات انا هو قريب منكم ادعولى استجب لكم

لو تكلمنا عن الاجابة و الاستجابة و التلبية هنلاقى الثلاثة مختلفين تماما

لان الاجابة هى ان ربنا قالك تعالى وادعى وانت روحت ودعيت هنا الاجابة

اما الاستجابة هو ان الله سبحانه وتعالى يقول لك لبيك عبدى

واخيرا التلبية هو تحقيق الدعوة للشخص الذى دعى

وهنا لو اتكلمنا عن الاجابة هنلاقيها ثلاثة

عاجله

آجلة ليوم القيامة

بتشييل اى سوء عن العبد

والاجابة وتلبيتها بتختلف حسب الخير اللى ربنا يراه للعباد فهو عليم بأمور العباد

فاذا لقى فيها خير فيعجل بالاجابة ويلبيها او يجعله خير فى امر اخر له

واذا كانت غير ذلك فيجعل بدعائه قصرا فى الجنة ....الخ

او يشييل عنه اى سوء او اذى يلحق به فى الدنيا

فياريت الناس تتدعى للخالق بأدب وعدم استعجال فى تلبية الدعاء

طيب ما معنى فانى قريب

؟؟؟؟؟

ربنا قريب من العباد فى حالتين

لو عبد عاصى الله قريب منه بعقابه وعذابه للعبد ده

لو عبد قايم بواجباته ربنا قريب منه هنا برحمته

قوله الحق : ( ونحن اقرب اليه من حبل الوريد )صدق الله العظيم

حبل الوريد يتمثل فى حياة الانسان فعند انقطاعه تكون نهايته

ومعنى الاية هنا ان الله قريب من العبد والعبد قريب منه فهنا الانسان حى وعايش سعيد

اما الشخص اللى بعيد عن ربه مثل الشخص الذى قطعت شريانه

انا كنت عاوزة اتكلم عن اسلام العقيدة

واسلام الايمان

واسلام التقوى

واسلام الاحسان

واسلام لوجه الله

بس نخليها فى اى مرة جاية ان شاء الله

السلام عليكم ودعوااااااااااااااااااتكم

دى نقرة ودى نقرة

السلام عليكم ورحمة الله وبركاته

-اخباركم ايه فى وجود ضيفنا الكريم ؟؟؟ ماذا انتم الان تفعلون؟؟؟

-آسفة والله انى مكتبتش الموضوع كما وعدت بيه 1/9 لان كنت لسه بظبط هعمل ايه برمضان

ووقت السحر والمغربية والدعاء والقرآن الله المستعان بالاضافة الى انى لسه بمتحن امتحانات ال ICDL

والحمدلله رتبت وقتى ولاقيت وقت فاضى فبدأت ادخل النت واتابع تانى.

-والله يكرمكم تدعولى بالشفاء العاجل لان يكاد صوتى راح خالص نتيجة احتقان شديد ومأثر معايا اوى

-مش قادرة اذكر اى شعور تجاه الناس لما رمضان دخل وبدات اقعد مع نفسى كده قعدت احاسب نفسى على حاجات

غريبة انا ايه اللى خلانى اسأل على فلانة وهى اصلا محسسانى انى انا متكبرة

وليه اسأل على فلان وهو اصلا مش طايقنى

فبتكلم فبقول يارب انا عارفه ومتيقنة ان اجرى هاخده وموجود بل مضاعف

بس لغاية امتى هفضل اسمع واشوف حاجات مترضنيش من الناس ..ومع ذلك بضحك واقول لا ده الشيطان عايزنى اقاطعهم

وغير الكلام اللى يحرق الدم اقول مش مشكلة بس الواحد ليه طاقة ربنا يريحنى بجد

موضوع النهاردة بقى ممكن يزعل الكل بس دى حقيقة ولازم الكل ياخد باله منها

بحس على طول ان معظم الناس بتفرض رايها وتنصح غيرها وهى اصلا غير مؤهلة للنصيحة

او بالاصح مش بيطبقوا النصيحة اللى بيقولها للناس وكل واحد فيهم يقولك

الحــــــــــــــــلال بين ...والحــــــــــــــرام بين

طيب هو الحرام ده احنا بس اللى بنعمله واللى بينصحونا هما اللى بيعملوا الحلال بس!!!!!!!!!!!!!

على كده بقى احنا جهنم وبئس المصير

نفسى الناس تتغير من جواها ..نفسى بجد المكان المظلم ينور وينضف من اللى فيه ..ونبطل نعيب فى حد

ممكن يكون افضل منى ومنك ..المصيبة السودة ان اكتر من نصفنا بيصلى لكن بيصلى فض مجالس

يعنى مبيصليش بقلبه ..ما انت لو بتحب ربنا وبتحترمه بحق

تنفذ التكاليف اللى انت واجب عليك تنفذها

واحد شاف واحد مبيصليش ااااااه ياكافر

والله طيب ده ممكن يصلى قبل ما يختم حياته وتحسب له وتقبل

وانت ياللى صليت طول حياتك منتش عارف ربك قبل صلاتك ولا لا

وهو حد فينا عارف صلاته واعماله مقبولين ولا لا

احنا بنقوم من الصلاة وبنقول يارب تقبل

لاحول ولا قوة الا بالله

وياعينى ياعينى على الفشر والكدب والخمسميت مليون وش

والله والله تبقى بنت او ولد على النت او تليفون او فى مكان ما

ابصلهم وببقى هاين عليه اضحك لانهم مش فاهمين انهم واقفين قدامى ووشهم التانى والتالت مكشوفين

هتخبى ايه ما خلاص مبقاش فى حاجة يستاهل انها تستخبى او يتبكى عليها

افعل يا ابن ادم كما شئت كما تدين تدان

حتى الغش وصل للغة العيون ولغة القلوب ده مش غش فى اللبن بس

ياساتر للدرجة دى الناس ضميرها مات

للدرجة دى فى ناس عايشة وجواها كده ايه ده اعوذ بالله

واحد اقوله عيب حرام بنات وسجاير وقرف انت ايه مش بنى ادم

يقولى ما البنات عايزة كده

امال لو قولتلك على اللى بيطلبونى من اهلى فى البيت

اقوله لو هما خلعوا بُرقع الحياء انت كمان تساعدهم على كده

ترضى لاخواتك البنات يطلبوا الرجالة قالى اخواتى البنات محترمين واللى تعمل فيهم كده اقتلها

وعامة بصلى كل الفروض فى مواقيتها ومش عارفه ايه

دى نقرة ودى نقرة

والله ياخويا

والله مش عارفه الولاد حصلهم ايه ولا البنات ولا السيدات

اعوذ بالله بجد

ده انا لو حبيت شخص وبموت فيه والله فى سماه لو اطويت السماء ومحيت الارض بما فوقها وتحتها وما بين طباقتها

ما يحصل انى انزل من قيمتى عشان اروحله واقوله اصل بموت فيك

ده مليون واحد زيه واحسن منه

واى بنت خلقت ومعاها بٌرقع الحياء والحياء شعبة من شعب الايمان فازاى افقدها

يا ناس مش كل حاجة فى حياتنا الاكل والشرب والجواز والفلوس

فى حاجات اسمى الدين والشرف والسمعه والكرامة

ده اكتر من نصفنا مش لاقى ياكل اللقمة ونايمين على الارصفة ده انتم عددكم فى صلاة الفجر مش مساوى لعددكم فى صلاة الجمعه

وعايزين ربنا ينصر الامة

ربنا مش بينصر تنابلة السلطان ربنا بينصر عبد بيشقى ويتعب ويبنى ..الخ

مش بقولكم بطلوا حب بس الحب بحساب

الحب لما ينشأ بين بنت وولد

يااما وسيط يروحله وميلمحش كمان يشوف دوره ايه

؟؟؟؟؟

يا اما حد من اهلها؟؟؟؟؟

لكن لما البنت تقول بنفسها

الراجل هيعمل ايه ؟؟؟؟؟؟ بجد انا هطق

ولا البنت عندها حياء ولا هو راجل عشان يقبل وضع زى ده

سورى يعنى لان يا حاجة من اتنين

يقبل ويبقى منظره زبالة يعنى

يا اما هيتلاعب بمشاعرها ويسيبها وفى الحالتين

شخص لا يحترم

ومفيش حاجة اسمها دى نقرة ودى نقرة

لكن فى حاجة اسمها دين بيطبق ومنهج متبع

ولما يبتدى كل واحد وواحدة يخرجوا عن شعبة من شعب الايمان

يبقى لازم تبقى فى وقفة

لان الموضوع سمعته من ناس كتير وكده بقى بكرة هلاقى البنات واخدة اهلهم ورايحين للرجالة يطلبوهم

البنت لازم تكون عزيزة النفس ولها كرامة

ده شيماء الجارحى نفسها وانا بدردش معاها تقولى نعم اللى ميجييش فى غيره يا امى

ههههههههههههههههه

يعنى محدش يخاف من العنوسة او السعى وراء بما يدعى بالحب الزائف

وان شاء الله بعد العيد هتكلم فى موضوع كويس بس ربنا يسهل للعباد كده ونستعد

سلامو عليكو