رسالة اعتذار للجميع

السلام عليكم ورحمة الله وبركاته

اولا : بشكر نونا اختى وشوشو حبيبتى على تعليقاتهم الجميلة واللى البلوج من غيرهم ميبقاش ليه روح

واتمنى زياراتكم الدائمة للبلوج

ثانيا: بجد بجد بجد بجد بقدم اعتذارى بالعربى والانجليزى والهيروغليفى وبكل لغات الدنيا

انى مش بكتب بقالى فترة وانا دخلت كتبت دلوقتى كلمتين فى السريع لانى تقريبا بجاى البيت على النوم

ان شاء الله هكمل الموضوع بتاع ( شياطين الانس والجن و الرؤى والاحلام )لآحقا

وهنشوف ايه ياترى الحاجات الجديدة اللى بتخلينى اغيب عنكم كتير اوى كده

وياترى هستمر فى اللى ماشية فيه ولا لا

العلم عند الله تعالى

وايه اللى بيحصلى واللى هيحصلى باذن الواحد القهار

اتمنى من الجميع الدعاء الدائم وخاصة فى هذا الاسبوع والاسبوع القادم بأكمله لانى بجد مرهقة جدا

جداااااااااااااااااااا

رجاء بجد دعاء يكون بذمة كده وبنية حلوة بأن ينور الله بصيرتى وطريقى الى ماهو خير

وكملوا بالدعاء باللى فى نفسكم بقى

ههههههههههه

يلا سلام بقى

هبة سيد والحقيقة الغائبة

شياطين الانس والجن والرؤى والاحلام

السلام عليكم ورحمة الله وبركاته

اولا: بالنسبة لتعليقات اختى ومعتز يا جماعة الموضوعات اللى بكتبها بتكون فى متناول الجميع وسهلة ومش صعبة

لكن هى فيها نوع من الجرأة المعقولة والمعتدلة اللى فى شخصيتى اصلا وعشان اجيب من الآخر بقى اى حد بيعجب بيه

بيقى السبب فى شخصيتى اصلا والله اعلم بالاضافة الى جوانب اخرى يعلمها الله

والجرأة زى ما قولت ليست جُرم ولكنها موهبة اعطاها الخالق بعض من الخلق وليس الكل فانها ميزة وليس عيب

العيب فى الوقاحة وليس الجرأة وانا غير مسئولة كليتا عن تفسير غيرى للكلام بوجه اقبح فهذا يعود لنواياهم وبيئتهم

التى نشأوا بها

ثانيا:موضوع النهاردة ان شاء الله هقسمه لحلقات كل بوست حلقة مستقلة والكلام اللى فيه حقيقى واتعرضتله واتعرض له غيرى بالفعل

وهذا شىء عادى جدا من الممكن بل اكيد ان كل انسان يتعرض له بشكل عارض او دائم وهو عن ( شياطين الانس والجن والرؤى والاحلام )

بالاضافة الى حوار على شكل مناظرة بينى وبين فتاة تتدعى انها كانت تحمل الاسلام دينا لها وارتدت وتنشر دعواها

الموضوع جامد ويارب يعجبكم

الحلقة الاولى:الحلقة دى هتكون بسيطة جدا وهتضم تعريفات بسيطة وربنا يسهل لو عرفنا نأخذ جزء آخر لفعلت باذن الله

يقول الله تعالى : (وخلق الجان من مارج من نار ) صدق الله العظيم

وفى تصنيف الجن

قال رسول الله ( ص) : (الجن ثلاثة اصناف : صنف لهم أجنحة يطيرون فى الهواء ، وصنف حيات وعقارب ،

وصنف يحلون ويظعنون)

معنى يحلون ويظعنون : اى يقيمون ويرتحلون

والجن تخاف من الانس واكثر خوفا من الانس نفسه وليس الانسان فقط لدية عين الحسد حيث انه يمكن ان يحسد الجن انسيا

والجن منه المسلم والانصارى واليهودى فمنهم المؤمن والعاصى والتقى والفاجر

وبعضهم يأكل ويشرب ويموت وينكح والبعض الآخر لا

ويستطيع الانسان ان يؤثر على قرينه حتى يسلم قال رسول الله (ص ) : ( ما منكم من أحد الا وكل به قرينه من الجن وقرينه من الملائكة

قالوا : واياك يارسول الله؟ قال : واياى ولكن الله أعاننى عليه فأسلم فلا يأمرنى الا بخير ).

دى حاجات بسيطة كده لان الموضوع واسع اصلا والحمدلله تبحرت فى قراءة كل ما يخيل للقارىء ههههه

بالنسبة لشياطين الانس والله اعلم دول اصلا جواهم استعداد يعنى النفس بتكون ضعيفة وعندها استعداد فى فعل الشرور والفحشاء

ويتلذذون بفعل الشر و الآذى واليعوذ بالله

ويمكن دول اشد بالنسبة لى من شياطين الجن

لانى شوفتهم على مدار سنين حياتى من الصغر للكبر وتعاملات وبالذات البنات واللى محدش يعرفه انى بالرغم من انى بنت الا انى

بكره خلفتهم اصلا لكن الذكور والاناث نعمة من الله تعالى يجب حمدالله عليها

بالنسبة للرؤى والاحلام:قد روى عن النبى (ص) :انه قال ( الرؤيا ثلاثة : فرؤيا بشرى من الله تعالى ، ورؤيا من الشيطان ، ورؤيا يحدث

بها الانسان نفسه فيراها).

يعنى ايه يعنى فى رؤية ربنا بيبعت للناس رؤيا مبشرة وايضا تحذيرات ...الخ للمؤمنون ورؤيا من الشيطان اى حلم ودى بيدخل فيها وبتبقى

كوابيس واضغاث احلام ورؤيا اخرى بتحدث نتيجة تفكير الانسان بعقله فى اليقظة وتخزن الاحداث بالعقل اللاواعى

ومن ثم تحدث الرؤية فى المنام

اصدق الرؤيا: بالاسحار والقائلة واللى كانت مجربة بالنسبة ليه اذا رأيت رؤية قبل الفجر وصحيت على الآذان ( وقت السحر )

من آداب صاحب الرؤية : ان لايقصها على حاسد وذلك ان يعقوب عليه السلام قال ليوسف : ( لا تقصص رؤياك على اخوتك فيكيدوا لك كيدا )

وقد روى ان النبى (ص)قال : ( من كذب فى الرؤيا كلف يوم القيامة عقد شعيرتين )وفى دعاء

الحمدلله كنت بقوله فترة ونسيت هههههههه لانى الحمدلله بقرأ وانا نايمة كل السور الصغيرة وجزء من سورة يس

فكنت بنسى اقول الدعاء وهو ( اللهم انى اسألك رؤيا صالحة صادقة غير كاذبة نافعة غير ضارة حافظة غير ناسية )والكلام ده لما تكون فى

الذهاب الى مضجعك يا اخى الفاضل

معلش هكمل المرة اللى جاية بس الحلقة اللى جاية هتكون جامدة مواقف حدثت بالفعل وو الله يعلم ان كل كلمة بقولها وبكتبها

فيها كل الصدق وحدثت لانى سوف احاسب على هذا الكلام يوم القيامة

آراكم فى الحلقة القادمة ان شاء الله

كونوااااااا معانااااااا

مع

هبة سيد والحقيقة الغائبة

الجرأة والوقاحة

السلام عليكم ورحمة الله وبركاته

اييييييه دنيا

ازيكم كلكم واخباركم ايه واخبار الحياة معاكم ايه ؟؟؟؟؟

اولا: طبعا الكل مش فاضى اليوم مفهوش وقت وبيخلص بسرعة حتى كنت بقرأ احد المدونات

فصاحب المدونة كان بيتكلم عن الوقت والصحة مفيش حد بياخد باله منها غير صاحبها ده حقيقى عشان كده

بقيت بتمشى كتير وبعمل رجيم وبطلت الحلويات اللى موديانى فى داهية ودى كانت الجزء التانى من الخطة

وصحتك فى العلبة دى هههههه

ثانيا: ان شاء الله هنزل فى مدونة تعليم التجويد والقرآن الكريم النهاردة التفخيم والترقيق والله المستعان

تعالوا بقى نشوف موضوع النهاردة هو جامد جداااا وطبعا كالعادة كلكم متعودين انى ادعم الموضوع باسانيد ومواقف وآراء

كونوا معانا

موضوع النهاردة عن الجرأة والوقاحة وياترى فى فرق بينهم؟؟؟؟؟؟

وياترى وجهة نظر الناس ايه ووجهة نظرى ايه والمواقف اللى اتعرضتلها كان شكلها ازاى؟؟؟؟؟؟؟

فى الاول عاوزين نتكلم بصراحة كده هل الجرأة شىء مطلوب ولا شىء يجب رفضه ؟؟؟؟؟؟

ياترى الجرأة ليها حدود ومنوعة ولا نوع واحد وليها حدود؟؟؟؟؟؟؟؟؟؟؟؟؟

هل الجرأة تلقى على صاحبها صفة البجاحة والوقاحة أم ان الوقاحة نوع مستقل ليس له اى صلة بالجرأة؟؟؟؟؟؟

كل دى اسئلة بتتطرح نفسها وسوف يتم الاجابة عليها من خلال الموضوع بتاع النهاردة

كنت قرأت مقال للدكتور / عمر الفاروق بجامعة قطر وهو بالفعل جاوب على اسئلة من النوع ده

وقال فيما معناه

ان الجرأة بشكل عام يرى الناس انها القدرة على فعل شىء دون خجل من الناس وبشكل مختلف عن الآخرين

وبيقولوا ان اللى بيحمل صفة الجرأة ده شخص قوى وبيقدم على فعل الشىء دون الخوف من احد

وقيل ان الجرأة بيكون بمدى السلوك وللجرأة انواع:

1) هناك جرأة زائدة عن الحد

2)هناك جرأة معقولة ومعتدلة

3)هناك جرأة فى غير مكانها

4)هناك جرأة فردية

5) هناك جرأة عامة

6) هناك جرأة مفيدة

7) هناك جرأة ضارة

8) هناك جرأة ايجابية

9) هناك جرأة شاذة

تعالوا شوفوا بعض المواقف اللى اتعرضتلها ووجهتها ازاى بجرأتى المعقولة والمعتدلة

الموقف الاول:حصل موقف كده انى ونورة كانت اول سنة لينا فى الجامعة المهم بنقعد على كراسى نتيجة للازدحام القوى

فا شخصية رايحة جاية وترمى السلام ومبردش ترمى كلام ومبردش

فقومت اخرج اشترى حاجة قام قايلى انتى رايحة فين المفروض اقولوله انت مالك بس ممكن يطول ويعجبه حوار الكلام

عملت ايه انا بقى؟؟؟؟؟

حدفت الكشكول على الكرسى بتاعى بس حدفته جامد يعنى معناها عدى اليوم على خير

ومن ساعتها بقى فى احترام متبادل

شوفتوا الجرأة بأدب عملت ايه

الموقف التانى:كنت لسه ساكنة جديد باكتوبر فكان عندى محاضرات بالليل كالعادة فالمهم ركبت اكتوبر حصرى على الرغم انى لازم

اركب لليلة القدر فقولت طالما مفيش مواصلات نركب ونبقى نتصرف فى الحصرى

اتارى كل اللى ركب لحظى السىء نزلوا هايبر والسواق قال ايه مش همشى من ناحية هايبر عشان

فى لجنة والرخصة والهم الازلى ده واضطر الى ان يسلك طريق الشيخ زايد طبعا انا لوحدى فى العربية

والطريق اللى ماشيين فيه كحل فكنت بنظر للقمر فى منتصف السماء لان نوره الوحيد فى الطريق

فالسواق بيقولى بكل وقاحة انتى مش خايفة منى واحنا لوحدنا

طبعا انا ميتة فى جلدى فابتسمت بسخرية قولتله واخاف ليه فمسافة وهو بيبص فى المراية باندهاش

كنت قرأت عليه اية الكرسى

ملحوظة اية الكرسى زى ما جربتها على شياطين الجن جربتها على شياطين الانس ايضا ومجربة

المهم وهو بيبص باستغراب قولتله عارف انا مش خايفة ليه بص فوق وانت تعرف

طبعا الاية شتت تفكيره و ببركة الاية جعلت فى عينى نظرة الهيبة

وببص لاقيت نفسى عندى الحصرى بقدرة قادر

والراجل وانا نازلة قالى روحى الله يسهلك

هههههههههههههه جبتله العصبى

ومواقف كتير اوى بس كفاية كده

الوقاحة بتدل على شخصية ضعيفة ونفوس خربة وسلبية وبتضر صاحبها واللى حواليه بالاذى

اما

الجرأة تعبير عن شخصية ايجابية قوية نافعة له وللاخرين

فبقول للكل انه لازم ادراك المعنى والتطبيق

يعنى من ليس لديه قدرة على الجرأة لا يعتبر جرأة الاخرين جُرم او خروجا على الآداب وخلى بالكم دى موهبة

وبكده يبقى فى فرق شاسع بين المفهومين الجرأة والوقاحة

سورى للاطالة وكونوا معانا فى الموضوع القادم

هيكون حلو وشيق الجن والرؤى والاحلام

وحاجات هتتطلع لاول مرة على الساحة

كونوااا معاناااا

والسلام عليكم ورحمة الله وبركاته

هبة سيد والحقيقة الغائبة

تعدد الزوجات ورأى الدين والناس

السلام عليكم ورحمة الله وبركاته

اهلا بيكم معانا من جديد وموضوع جميل طحن ان شاء الله هتكلم عنه بما يمليه عليه ضميرى هو عن تعدد الزوجات

وهنشوف رأى الدين والناس ورأيى الشخصى ورايكم قريبا بميلى او بالمدونة

قبل ما ادخل فى الموضوع فى كام نقطة كده عاوزة اوضحها واقولها

اولا: الحمدلله بدأت اول حاجة من الخطة وهو انى اكمل دراستى للتجويد بمسجد الحصرى بعد ان توقفت لاسباب الانشغال

واشياء اخرى فالحمدلله حضرت امبارح يوم الجمعة يعنى كان الصبح وصليت الجمعة وجيت وبصراحة الشرح فل الفل وربنا يارب

نكون كلنا من السفرة الكرام البررة

لقول الرسول -صلى الله عليه وسلم -(الماهر بالقرآن مع السفرة الكرام البررة )اللهم آآآآآمين

لان حفظ القرآن وتعلمه وتدبره ليس للتفاخر امام الناس بحفظه ولكن لتثبيت ايماننا وتنوير قلوبنا ورؤية المعجزات الآلهية التى وضعت

فى القرآن الكريم وللاحساس بالاطمئنان دائما ونزع الخوف من قلوبنا

ثانيا: انا عملت مدونتين واحدة هحط فيها خواطر اللى انا كتبتها والتانية لتعليم التجويد وتفسير القرآن الكريم

وانا عملتهم بس لسه تحت الانشاء

ثالثا: بالنسبة للتعليقات

ياشيماء والله احنا يابنتى مش مجانين انتى محسسانى ان الناس معندهاش حتت الثقة والمصداقية فينا

يلا ماعلينا وربنا يكرمك وميرسى لمرورك العطر

فينك يا مصطفى معلش هو العيب فيا لانى مش بدخل على الميل الا قليل ولو دخلت بيبقى خمس دقايق وبقفل بسرعة

بالنسبة لموضوع السلفيين والاخوانيين مش هكتبه بس احب اوضح انى كنت هكتب تعريفات واصول فقط لا اكثر ولا اقل

وميرسى لمرورك يا تيفا

نشوف موضوع النهاردة بقى

three

two

one

ههههههههههههه

طبعا احنا كلنا عارفين ان الدين قال ان تعدد الزوجات بيكون فى سبع حالات لا محالة هى:

1)حالات المطلقة

2)الارملة

3)العانس

5)العقيم

6)طبيعة الرجل وقدرته...

7)ظروف الحرب وماينتج عنها من نقص عدد الرجال

8)تشير التقارير الى ان عدد النساء فى السنوات القادمة سيكون ضعف عدد الرجال

وطبعا الآية بسورة النساء دالة على ذلك فى قوله تعالى :

(وان خفتم ألا تقسطوا فى اليتامى فانكحوا ما طاب لكم من النساء مثنى وثلاث ورباع فان خفتم ألا تعدلوا فواحدة أو ما ملكت ايمانكم ذلك أدنى

ألا تعولوا )

طبعا التعدد مباح ولكن بشروط:-

1)الشرط الاول : العدل

2)الشرط الثانى : القدرة على الانفاق

فالآية بتقول ان العدل شرط لاباحة التعدد فاذا خاف الرجل عدم العدل بين نسائه كان محظورا عليه

بالزواج باكتر من واحدة ويكفى واحدة فقط

وبرضو لو هو مايل بقلبه لواحدة من زوجاته دون الاخرى يبقى يكفى واحدة فقط حتى لا يقع فى الظلم للاخريات

وجهة نظر الناس: 1)سألت احد اقاربى فبقوله ايه رايك فى الموضوع ده وكده قالى والله ربنا وضع اسباب للزواج باخرى

يعنى لو مراته مريضة او مش بتقوم بواجباتها تجاه زوجها فمن حقه يتزوج غير كده يبقى الزوج انانى جدااااااااا

2)وناس قالت انه ظلم للزوجة الاولى لانه بيحب الثانية اكثر واولاده منها وبيلقى الظلم على الاولى واولادها وده

ممكن يحطم كيان اسرة باكملها ويسبب عدم استقرار فى جوها المعيشى

وجهة نظرى انا بقى

كلاكيت اول مرة

هههههههههه

اولا : انا من الناس اللى بتكره انانية الرجل يعنى ايه؟

يعنى الواحد يتجوز ويجيب اولاد واربيهم واحافظ على كرامة زوجى وسط اهلى واهله

واكبره قدام الناس واكون جنبه فى ازماته واربى عياله كويس ويكون جزائى انه يتجوز واحدة عليه

فأنا لو فى الوضع ده بعد الشر يعنى لو حصل كده

هقوله عاوز تتجوز يا سلاااااام ماشى وربنا يوفقك الكلام الجميل ده

واقوله بكل برود هطلب منك طلب صغير اوى هيقولى طبعا أمرى

هقوله اظن انت كفأت نفسك بأنك تتجوز بغيرى طيب فين مكافأتى انا

طبعا هو هيحسب مقابل زواجه باخرى انه يكافانى بفلوس ليه ولاولاده بالبنك او ذهب علشان ارضى وافضل على ذمته واربي عياله

لاطبعا مكافاتى ساعتها انه يطلقنى وياخد عياله واقوله ياريت تجوزنى حد من اللى بتثق فيهم

وتستأمن مراتك عليه ويعيشها حياة سعيدة وبكده احنا الاتنين خدنا مكافاتنا من الدنيا

ايه رايكم جامدة صح ههههههههههههههههههههههههههههه

طبعا الدين مش بيحرم زواج الزوجة بعد طلقها وان ده حق شرعى ليها ولا ايه

؟؟؟؟؟؟؟؟

ياريت محدش يزعل من رأيى بس ده رايى الشخصى لان كل واحدة بتختلف عن الاخرى

فى واحدة بترضى بالامر الواقع بس بتدعى على زوجها دعا وحش

وفى واحدة بتنتقم منه بطرقها الخاصة ان كيدهن عظيم

وكتتيييييييييييييييييييييييييير من المواقف اللى بسمعها وبشوفها فى الدنيا

ويارب الموضوع يعجبكم واشوف آراكم

كونواااا معاناا

مع

هبة سيد والحقيقة الغائبة