تاج متدبسة فيه :D

السلام عليكم ورحمة الله

***************

انا دخلت النهاردة الصبح بالصدفة مدونة د/شادى ....فلاقيت تاج وفى اخره هبة سيد :D

اتدبسنا والحمدلله ههههههههههه

نبتدى بقى

اسمك ؟؟
هبة سيد

المشهور بيه وسط صحابك؟؟
هبة سيد برضو

سنك؟؟
22 سنة و 5 شهور بالتقريب

مجال الدراسه؟؟
ادارة اعمال..بس بصراحة ناوية اغير المسار ان شاء الله

اينعم حصلت على بكالوريوس ادارة الاعمال لكن مش عجبانى

اسم مدونتك؟؟
انا لى اربع مدونات حتى الآن

مدونتى دى : حياتى ...طريقى الى الله

مدونة القصص والروايات: صرخات انسية فى بحور الروحانية

مدونة دينية : كيف تكسب رضا ربك؟؟

مدونة للمأكولات والمشروبات : هى لتعليم الطهى بس مش لسه افتتحتها

صورتك الرمزيه بتعبر عن ايه؟؟
دى صورة لبنت فى مجلة الحجاب عجبتنى لفة طرحتها جدا

فحطيتها بس كده :D

فكرت تقفل المدونه؟؟
فكرت كتيييرر ... نتيجة لانى بشوف حاجات مش طبيعية فى المدونة ناس تتدخل ترمى كلام

ومش بتكتب غير اسماء ناس اخرى فبزهق وبضطر ارفع المدونة

ايه رد فعلك لو حد قل أدبه عليك فى تعليق ؟؟؟
بقول حسبنا الله ونعم الوكيل

أسوء مدونه؟؟
مدونة واحد بيخرف عن الاسلام

هيحصل ايه لايميلك بعد ما تموت؟؟
على راى الدكتور شادى ساعتها الشركة هتخلى المساحة لغيرى

والحى ابقى من الميت

اديت الباسوورد لحد قبل كده؟؟
اه ..بتاع الياهو والهوت لواحد زميلى

لانه فضل يحلفنى ليشوف الايميل وانا مش بحب اكسف حد

فاديتهوله فخربها بس

هههههههههههههه

السفر بالنسبه لك؟؟
جميل جدا طبعا

انا نفسى اصلا اسافر اسكندرية لوحدى

لانى عمرى ما روحتها ولوحدى لانى بحب اكبر دماغى ومش بحب الزن الصراحة

مجرد امنية يعنى :D

المود بتاعك ايه؟؟

انا متقلبة جدا وبتردد بطبيعتى

نتيجة لعدم ثقة فى الناس

بس ده من صغرى يعنى

بتعمل ايه فى اوقات فراغك؟؟
غالبا بقضى وقت فراغى فى اودتى على الكمبيوتر

او بالبلكونة لان هنا الجو الحمدلله هادى والناس اغلبها غير موجودة

الاكله المفضله؟؟
لا انا اكلات :D

بحب الكفتة..الجمبرى ...المكرونات بكافة انواعها

اللحمة الباردة

الصفات اللى خدتها من والدك؟؟
الذكاء ....الاصرار على الراى فى حالة انه راى سليم

الصفات اللى خدنها من والدتك؟؟
الكرم و فيا انا شبه منها كبير فى الشكل

اكتر 6 حاجات بتكرهم؟؟
الكذب

الانانية

الخداع

الاعجاب بالنفس

الغش

الابتزاز

ومعرفة المصلحة

اكتر 6 حاجات بتحيها؟؟
اهلى

اصحابى

دفعة محاسبة

حبة من ادارة

الشارع اللى انا فيه

الجاتوووووووووووووووووه:D

شخصيتك نوعها ايه؟؟
ناس كتير بيقولوا انى بغزالة

لانى كل شوية بحال وبفكر جديد

لماذا دخلت التدوين من الاساس؟؟
عادى...اصلا بحب الكتابة والناس وبما ان النت هيطلعنى من غرفتى على عالم اعم واشمل

وتواصل اكتر يبقى ليه لا

اهميه التعليقات بالنسبه لك ايه؟؟
مهمة طبعا لاى مدون ..مش انا بس

لان بحس فيها باهتمام الناس وباعجابهم وتقديرهم لصاحب المدونة وموضوعاته

احلى بوست كتبته ؟؟ ضع اللينك ثم اذكر السبب
احلى بوست كان بمدونتى دى

الراية السوداء

عشان حاسة فعلا ان الحقائق اللى فى الموضوع ده متعبة جدا

وتعبت غيرى كتيييييييييير

افضل مدونه قرأتها؟؟
كل المدونات طالما بدخلها وبقراها يبقى خلاص حلوة وملهاش حل من وجهة نظرى

افضل بوست قرأته؟؟
مش عارفة ..انا قرأت كتير ومدونات اكتر وماشاء الله الناس كتاباتها جميلة

الشغل بالنسبه لك؟؟
مهم ومش مهم

يعنى انا لو اشتغلت هتنازل عن فكرة الجواز نهائى ..ليه

عشان كل حاجة نفسى فيها هشتريها ولي كيان وهتبقى باسمى

اما الراجل ممكن يخنقنى او ينغص عليا حياتى ..ضمان مستقبلى وكله بيد الله

والشغل مش مهم اذا تزوجت رجل صالح يشدنى للخير دايما ومحترم نفسه ويحترمنى

الانترنت بالنسبه لك؟؟
حياتىىىىىىىىىىى

لانى اصلا لما بتخنق من الناس برة بدخل النت

تمرر التاج ده لمين؟؟
موناليزا

محاسن صابر

حسن حنفى

شيماء الجارحى

:D

السلام عليكم ورحمة الله وبركاته

الراية السوداء

*السلام عليكم ورحمة الله وبركاته*

____________________
اهلا بكم من جديد مع هبة سيد والحقيقة
:D
بحب اوى اسلوب التقديم التليفزيونى ده ...

المهم
بالنسبة للتعليقات فى موضوعى اللى فات:

دكتور واحد : نورتنى مقدرش اقولك ظهورك بالمدونة بيزيدنى نور اد ايه يافندم

طبعا رايك سليم ان فى حاجات غريبة بتحصل

ان واحد ياخد وضع غير وضعه لكن زى ما بقول الانسان يحاول يمشى فى التيار العكسى

يعمل حاجة جديدة لانه لو اتكل على استمراره بالوظيفة دى هيفضل طول عمره تحت

ومش هيطلع ابدا

وجزاكم الله خيرا على مرورك

مستر احمد: قرات رسالة حضرتك بالجيميل واتصلت مباشرة بمكتب حضرتك بالشركة

لكن حضرتك مكنتش موجود

اشكرك يافندم على الاهتمام

الموضوع اللى هتكلم فيه النهاردة عن مليون حاجة فياريت مع بعض ونركز اوى

اولا: انا قومت بتسميت الموضوع بالراية السوداء لان الراية دى وبهذا اللون بتُرفع فى حالة

الموت او بالاخص وجود غريق

ثانيا: لان العنوان بيدل على مغزى ومضمون فى دماغى....واحب اوى الناس الفهيمة اللى تفهم

ما بين السطور اكتر ما تفهم السطور نفسها

- اول حاجة هتكلم فيها ( البطالة ) هو ايه اللى جعل الظاهرة دى آيلة للظهور؟؟
ما اكيد لكل ظاهرة سبب؟؟
من وجهة نظرى وبعيدا عن المعدلات اللى بتعانى حتى منها الدول المتقدمة ومنها الولايات المتحدة
الا ان الانسان قادر على خلق عمل وانتاج ولو من المنزل....لكن هناك من يريد العمل على المكاتب
وان يكون العمل آتيا بشكل روتينى
ابتديت الاحلام الوردية للشاب تكون آيلة للسقوط ومفيش أمل ومفيش حب بل واصيب بحالة من اللاشعور
عنده يقعد يشتغل اى شىء وامه وابوه يصرفوا على مراته وتيجى وتعيش معاهم !!!!!!!!!وده مش منطقى
لان من ناحية تانية هيحصل طلاق
وقبل ما ادخل فى النقطة التانية نشوف حل للنقطة الاولى

الحل المقترح من دراستى للسوق هو انك تشتغل فى شىء مش متوقع يديرلك رزق ويجعلك صيت واسم وشهرة
وفلوس وبأقل مجهود
ازاااااااااااى؟؟ هو تنمية المهارات او المواهب الدفينة اللى ممكن تديير اموال عن شخص ليس له موهبة ومعتمد
على الشهادات العليا ومكاتب الشركات
عاوز تتدخل شركة زيه ومش قادر ويكون ليك مكانة ومستقبل افضل ...فكر بعكس الناس او فى الحاجة اللى
مش تيجى على بال حد وكل ما تفكر وتبتكر اكتر هتقدر تعمل حاجات اكتر من اللى على مكاتبهم
ودى تعتبر علامة لو محدش خد باله منها اكتر من نصف الشباب هيترفعلهم الراية السوداء
-موضوع الجواز والحب والكلام ده بقى ........ااااه جينا للحتة اللى الكل بيحبها :D
دراسات نفسية بتثبت ان البطالة هى السبب فى انحراف الشباب...يقولك وايه يعنى نظرة مع ابتسامة
مع كلمة حلوة مع ماشية افضل مليون مرة من انى اتجوز واشترى شقة منين ومستقبلى اللى بكونه عشان اكون راجل ملهوش حل
بس من وجهة نظرى الشباب مقسومين صنفين:

________________________
* صنف بجد دماغه شغالة وعاوز يوصل وبيكون نفسه ومستقبله ومرتبط واعرف منهم ناس فعلا عملت كده
منهم واحد نخليها مفاجأة قريبا ونبقى نقول هو مين؟؟
* وصنف تانى عاوز يمشى حاله يشبع نظره وروحه المعنوية ويحس انه حلو بقى وفى الاخر يقول هههههههههههه
السكة غلبت المحلة ..طريقك اخضر ياعسل
:D :D
دول بقى الحل معاهم ايه؟؟ نعمل فيهم الخير يا اخوانا ....افضل قوله انت حلو ياض
انت ملكش مثيل ..واديله الاسطوانة الناعمة وسيبه
فيفضل يتنفخ يتنفخ وهوبا واحدة تيجى تقوله نفس العبارة
السكة غلبت المحلة ..طريقك اخضر ياعسل
ههههههههههههههه
اه والله اتضح ان جزء كبير من الرجالة لما تنفخه بالكلام وفى الاخر واحدة تديله كلمتين على دماغه
بيفتكر ربه وبيمشى عدل
وطريقك اخضر ياعسل:D
بالنسبة للصنف الاول: عندهم طرق لمكافحة الدمار النفسى اللى بيجتاح الصنف الاخر من الرجال
عندهم ثقة بالنفس وليس اعجاب بالنفس ده رقم واحد
عندهم بيتهم هو كل حياتهم فبيعملوا المستحيل لبنائه وتحويطه بجدار يعزل اسرته عن اذى العالم الخارجى
عندهم....كتيييييييييير
فى ركن اسانيد الاحاديث وجدت حديث للامام حسن الالبانى رحمه الله
وده نفس الحديث اللى قاله الشيخ القرضاوى ربنا يكرمه على قناة الجزيرة
بيقول ايه الحديث
ثلاث مهلكات وثلاث منجيات
فقال ثلاث مهلكات: شح مطاع وهوى متبع و اعجاب المرء بنفسه
وقال ثلاث منجيات : خشية الله فى السر والعلانية والقصد فى الفقر والغنى والعدل فى الغضب والرضا

واكيد الحديث واضح ... ومش محتاج انى ادخل فى شرحه

- موضوع تانى حارق دمى بجد ومفيش حاجة حرقت دمى فى الدنيا دى اد الاستهتار وانعدام الضمير وعدم أخذ الدين

وتعاليم الله وتطبيقها!!!!!!!!!!

سمعت فلان الفلانى حب يستورد قمح تركى عشان سعره اقل؟؟

اتضح ان القمح مسرطن وتم كشف الصفقة عند دخولها مصر لانها كانت داخلة بطريقة غير مشروعة

طيب ده كلام؟؟؟

لما احنا مش عارفين نعالج الاطفال فى مستشفى الاورام والمعهد القومى للاورام

ندخل مواد غذائية مسرطنة؟؟؟

هنا مليون راية سوداء هتترفع بس للانذار لان بعد كده الشخص هيدخل الشاطىء وهاتك يا غرق

بلاش

- موضوع تانى يقولولك الصين تقريبا حبوا يعملوا شباشب ويصدروها فالشباشب دى مصنوعة من مواد

مسرطنة لانها كانت بقايا لمواد لا تصلح للاستعمال فى خط الانتاج

طيب ده ينفع يا اخوانا؟؟؟؟؟

واحنا بقى نلبس الشباب ونفرح بسعرها عشان احنا شعب بيموت فى الرخيص

made in china :D

وفى الاخر هيكون وضعنا فى الشرق

السكة غلبت المحلة ...طريقك اخضر ياعسل:D

والسلام عليكم ورحمة الله

مستقبلك فى ابعاد تفكيرك...

السلام عليكم ورحمة الله

**********************
عاملين ايه جميعا؟؟ اتمنى ان الناس كلها تكون بخير http://novels-stories-of-hebasayed.blogspot.com/

تعديـــــــــــــــــــــــــــــــــــــــــــل .... لينك مدونة القصص فوق ان شاء الله هنزل الفصل التانى

ياريت يا اخوانا اللى ليه فى التخطيط وعمل دراسات جدوى يرسل لى

على الجيميل لامر هام جدا بالنسبة لى

وربنا يسهل هخبركم لاحقا بأهم اخبارى الفنية :D

وانتظروا خلال هذا الاسبوع موضوع جامد

باسم الراية السوداء

وهيكون طويل شوية وبلاش ياجماعة تتسرعوا فى الحكم على الاشياء

لان القصة هتحكى عن الشباب وافعالهم وليس التصوف فقط

موضوع النهاردة ملاحظات شخصية عن سوق العمل حاليا وطريقة التفكير اللى تكاد انها توصلنى
لمرحلة ماقبل الجنون
انا اعوذ بالله من كلمة انا خريجة ادارة اعمال
المجال مفتوح على مصرعيه محاسبة فى اى بنك او شركة او سكرتيرة او سكرتيرة تنفيذية
مبيعات ماشى .. تسويق مفيش مشكلة .. خدمة عملاء مايضرش...الخ
ابتديت امسك الجرنان واقرا اهرام اخبار جمهورية
ابص الاقى الشركات مركزة على ايه؟؟
1- اجادة الانجليزية (فلونت ).ولو فى اى لغة تانية خير وبركة
2- كمبيوتر
3-خبرة ماتقلش عن 3 سنوات وساعات بتوصل لعشرة
ده بالنسبة للشغل التقيل
الباقى بقى يا مندوبى مبيعات يا تسويق من الجنسين
واتفرج على المواقع والجرايد مطلوب سكرتيرة فورا
لا عاجلا
لا بكرة الصبح هتشتغل
لدرجة انى قولت خلاص زمانا ده زمن السكرتارية وكل عام وانتم بخير بقى :D

المهم انا هتكلم عن ابعاد التفكير

انا قاعدة مع نفسى بفكر فى حالى وحال الدنيا

لاقيت نفسى اتشتت روحت شركة مالتى ناشونال وقولت اشتغل ومش كل شوية اتبطر على النعمة

الاقى حاجة احسن

فمعرفش ده طمع منى ولا هدفى غير محدد مسبقا ولا ايه؟؟

فبدأ الواحد يحسبها وينظر نظرة بعيدة

لاقيت كل الشركات حتى اللى بالسعودية والدول العربية هتتدخل فى حوارالشركات متعددة الجنسيات

وبين يوم وليلة الشاب اللى مش عامل زى ما بيقولوا بنية تحتية لنفسه

يعنى لغات وكمبيوتر وكورسات فى مجاله وتتطور مستمر

يبقى شكرا اخره سنتين تلاتة فى الشغلانة وهيرجع بيتهم تانى

لان حتى البنوك بداخلها مش خارجها كمان ماشيين بموضوع التارجت

حققته تمام مش حققته يبقى خصومات من مرتبك

فضلت على حالك يبقى برة ونجيب اللى يحققلنا التارجت ده

دى نظرة لشكل السوق فى خلال سنة او سنة ونصف

يااما نمشى فى الحوار ده

او نمشى زى ما بيقولوا عكس التيار

يعنى نشتغل فى حاجة تجيب الرزق وفى نفس الوقت محدش يتوقعها وتتطور على مراحل

مش عارفه

حاجة تانية فى خبر لفت نظرى بالجرنان

ان القطن حصل فى سوقه كساد وركود

ومنتظر المشترى

فواضح والله اعلم دخول العنصر الاجنبى مش هيساعد الاقتصاد المصرى على اد ما هيدمره

لان بكده كل مصانع الغزل والنسيج هتوقف وبالتالى البطالة هتزيد

عشان اتجاهنا ماشى مع المستورد وبص ياض انا جايب حتت قميص وماركة وبتاع ..سيبك البنات هيغمن عليها

ههههههههههههههه

ولون القطن المصرى مفيش احسن منه

وبالتالى لما المنتج المحلى هيتلاشى هتحصل عواقب وخيمة محدش حاسس بيها

فى ناس كتير بتشترى جرايد ياجماعه

لكن هل حد بينتظر حتى يقرأ ما بين السطور

هو ده فعلا سر النجاح

حاجة تانية موضوع انفلونزا الخنازير

بسببها توقف الناس عن الذهاب للبيت الحرام عشان أقامة الشعائر

ليه لان الناس خايفة من تواجد اكبر عدد ممكن من الناس من العالم وبالاخص الدول المصابة

فالعدوى احتمال انتشارها اكثر لان تم ملاحظة انتشارها زى انتشار الانفلونزا الموسمية بالضبط

بس هيترتب عليه وقف النشاط السياحى وعمال مصانع لحوم الخنازير والاقتصاد بالنسبة للدول المربية ليها

فبصراحة ربنا يعدى الايام دى على خير

يلا ونلقاكم المرة القادمة ان شاء الله مع موضوع جديد

السلام عليكم ورحمة الله