قريباً

السلام عليكم ورحمة الله

انتظروا أول موضوع لى بعد غياب فترة طويلة لا بأس بها عن عالم المدونات

بعنوان "التحديات"..كونوا معانا وانتظروا قريباً بإذن الله

نصيحة رمضانية

السلام عليكم ورحمة الله و بركاته

------------------------

كل عام وأنتم بخير و بصحة وبسلامة وعافية وطيبة قلب و راحة بال وسعادة واستقرار ودائمين فى طاعة الله سبحانه وتعالى

ممسكين بدستوره السماوى تطبيقاً وبذكره دائماً بأذكاره قياماً و قعوداً وسيراً على نهج وسيرة رسولنا الكريم محمد صلى الله عليه وسلم

ربنا يتقبل منا ومنكم صالح الأعمال فى هذا الشهر الكريم ..شهر رمضان المبارك وأعادة علينا وعليكم بالخير واليمن والبركات

و يخرجنا منه جميعا تائبين متطهرين من الذنوب لا أحد منا خالى من الذنوب ولا المعاصى سواء كانت صغيرة او كبيرة فلا تقنطوا من رحمة الله لانه الرحيم ورحمته وسعت كل شىء قال الله سبحانه وتعالى فى كتابه العزيز :

بسم الله الرحمن الرحيم

"إنك لا تهدى من أحببت ولكن الله يهدى من يشاء"

وهذا لا يعنى ان واحد عاصى يستمر فى عصيانه عشان يقول لا ده ربنا عاوزنى كده

لا طبعا..المقصود هنا فى الآية الكريمة هو من يتقرب إلى الله بنية خالصة متوجهاً بقلب نشط أو يريد تنشيطه

تقرباً وحباً ووإلتماس رضا الله عز وجل قرب إليه الله الهداية وأدخل السكينة فى قلبه وتاب عليه

اللهم إنى أسالك حبك وحب من يحبك وحب عمل يقربنى إلى حبك يا رب العالمين

اللهم أنت ربى لا آله إلا أنت خلقتنى وأنا أمتك وأنا على عهدك ووعدك ما أستطعت أعوذ بك من شر ما صنعت أبوء لك بنعمتك علي

وأبوء لك بذنبى فاغفر لى فإنه لا يغفر الذنوب إلا أنت

استغفر الله العظيم الذى لا إله إلا هو الحى القيوم وأتوب إليه

اللهم إنى أشكو إليك ضعف قوتى وقلة حيلتى و هوانى على الناس أنت رب المستضعفين و أنت ربى إلى من تكلنى ؟ إلى بعيد يتجهمنى؟أم إلى عدو ملكته أمرى؟ ربى إن لم يكن بك على غضب فلا أبالى أعوذ بنور وجهك الذى أضاءت له الظلمات وصلح عليه امر الدنيا والآخرة

من ان تنزل بى غضبك أو يحل علي سخطك لك العتبى حتى ترضى ولا حول ولا قوة إلا بك

يا ناس أطعموا الطعام وصلوا الأرحام وأفشوا السلام وصلوا والناس نيام وصوموا رمضان وأخلصوا لله وأطيعوا الله ورسوله صلى الله عليه وسلم

فهذا ما أمركم به الله فى قرآنه و نوركم به محمد فى سيرته ومشواره فلا تنسوا الله حتى لا ينساكم وتكونوا نسيا منسيا

والسلام عليكم ورحمة الله وبركاته

مياة الشرب ..بمدينة أكتوبر

السلام عليكم ورحمة الله

----------------------

الواحد والله مش عارف فى ايه بالضبط؟؟؟؟!!!! المية مقطوعه فى الشغل قولت وماله!!! امى تتصل تقولى المية مقطوعه قولت وماله!!! اركب العربية السوزوكى عشان اروح شوفت منظر غريب بجد يمكن انى اول مرة اشوفه ناس فى الحى العاشر واقفين ورا عربية شايلة تانك مية ومكتوب عليها مياة الشرب ..توزيع مجانا!!!!!!!!!! اللى واقف بطشت واللى واقف بجرادل واللى واقفة بحلل وجراكن ..قام السواق يقولى اصل انتوا مش حاسين ..بيقولى بصى الارض عطشانة بصى الناس عطشانة ...قالى الارض لو عطشانة

ضحك و يقول.. كلنا مستنين شادية تيجى تفتح الهاويس...واصلا المية هتفضل على كده اربع ايام لشهر كمان

انا طبعا بحسب الراجل بيستظرف اصحابى بالعاشر اتصلوا بيه بيقولولى المية كل يوم بتقطع النهاردة مفيش خالص؟؟!!!

فالسواق بيقولى اصلا اصلا المية هتبتدى تتدخل محطة مياة الشرب بقدر معين سنويا والكلام ده هيحصل فى كل مدينة

قولتله قدر معين ؟؟...يعنى هيجيى علينا يوم ومش هنلاقى مية نشربها حتى:(

ارجع انا واقول احنا نستاهل سواء كان الكلام ده حقيقى او إشاعة إنتشرت

احنا مسرفين جدا فى المية ..بتتساب فى الحدائق مفتوحة ليل ونهار والناس اللى فاتحة المية على الفاضى والمليان

مفيش ترشيد فى الإستهلاك تمامااااااااااااا

وصحيح هو الناس لو واعية دينيا وثقافيا وملمة بظروفها اولا وبظروف المجتمع ثانيا ..كان بقى ده حالنا

عموما ربنا يهدى الجميع

البقاء لله ..ربنا يرحمك برحمته يا خالد يارب

البقاء لله وحده لا شريك له ، له الملك وله الحمد يحيى ويميت وهو على كل شىء قدير وبعباده لطيف خبير

.. وحسبنا الله ونعم الوكيل فى كل ظالم عنيد وسوف يكون كل ظالم فى جهنم خالدين فيها ابدا

ربنا هو المنتــــقم

الجزء الاول

السلام عليكم ورحمة الله وبركاته

-----------------------

انا كنت ناوية انشر الموضوع بالغد لكن مع الاسف أتضح انى بكرة مش اجازة

هبتدى أحكى بقى الحاجات الغريبة اللى اتعرضتلها ومحدش يستغرب

من حوالى سنة تقريبا كان طريقى ميسر جدا فى العبادة والحمدلله كنت حاسة براحة شديدة لم أشعرها من قبل

بدأت اتعب فى العبادة وبين يوم وليلة اتقلب حالى مليون درجة بصراحة معرفش السبب حتى الآن قولت يجوز لانى

بتكلم كتير انا بصلى وبقرأ قرآن وبتاع ولا اظاهر شياطين اترصدتنى وداخلولى من ثغرة وساوس معين

الله اعلم بس فعلا مكنتش هبة خاااااااالص ولا نوم عدل ولا طمأنينة قلبية وتعب نفسى اتشقلب حالى بدرجة غريبة جدا

وقولت خلاص همشى زى ما كنت ماشية فى الدنيا بعد ما كنت متفرغة للعبادة تفضيلا عن العمل بشكل كامل

---------

جيت فى شهر أغسطس عمالة اقول اه ربنا مش عاوزلى الهداية وعمالة اقول كلام غريب طيب نفسى يارب ادخل حتى

معهد قرآن المهم فى ناس عقدتها فى وشى انى لازم على الاقل عشان التحق باعداد الدعاة على الاقل اكون حافظة 6 أجزاء

طبعا ده كان غير ميسر لى لان ده كان عيب من وجهة نظرى من البيت المفروض كانوا من الصغر شدوا عليا

وودونى اى مكان لتعلم القرآن وان شاء الله ده هحققه مع عيالى ومش هيتكرر

المهم كنت بعيط بينى وبين نفسك ومبقتش ادعى كنت ابص للسما وقلبى يتكلم وبس

المهم جيت فى شهر اكتوبر روحت اشترى دواء من الصيدلية لانى بدأت مأكلش كويس والانيميا اشتدت عندى

فلاقيت ورقة عند الكاشير مكتوب معهد العالمين الى الجنة

لفت نظرى بصراحة واخدت ورقة وفضلت اقرئها طول الطريق فاتضح انها معهد بيأسس القرآن وتجويد وفى نفس الوقت

أخذ تفسير ودعوة واحاديث..الخ

قولت ما اقدم

هخسر ايه ؟؟ومحدش فى البيت ولا فى العيلة اصلا يعرف الحوار ده كنت بروح واجاى بحجة انى بروح دار الايتام

و ربنا يسامحنى فى هذا الاخفاء لان كل ما اتكلم مع والدى يقولى وايه المقابل يعنى وهو ليه تفكيره

وفى ناس بستهزأ بيا فقولت اهو لله ومش هقول غير لاصحابى فقط

قعدت شهر و أسبوعين بالضبط

بعدها حصل موال ابتديت اتعب نفسيا من كتر الضغط النفسى ومش برتاح غير وانا فى وسط اصحابى بالمعهد

وكنت كل ما ارجع البيت لازم وحتما اشد مع كل اللى بالبيت ربنا سبحانه وتعالى يعلم انى مش عاوزة اغضبه بشتى الطرق

رغم ان الطريق لكده ميسر جدا جدا والشيطان فاتحه على المصرعين مش مشى وحش بس اللى اقصده

لا

لكن فى البحث عن العمل الصالح والبعد عن اصدقاء السوء والبعد عن المال الحرام

لكن طبيعتى مبسكتش عن الحق وممكن اضيع فيها امم مع الاسف.. مع حسن الحظ لا اعلم

المهم والدى قالى مش هديكى كورسات يا شيخة هبة وبتاع ..طبعا فضلت فى الحوار ده فترة

لان بسببه كلمت ناس بالنت لمجرد انى اتعلم اللغة وانا محبش اعمل شىء غصب عنى

فنزلت الى ادنى درجة واشتغلت شغلانة مش بشهادة عشان اثبت لنفسى وللجميع انى قدها

وفى نفس الوقت برغبتى ويكون مال احله الله عز وجل

اشتغلت بمصنع فى اكتوبر كنت بقعد شوية على ماكينة اوفر وشوية تشطيب وقص مستلزمات طبية

وانا ليا الشرف والعلى انى كنت شغالة شغلانة زى كده

كنت بجيب جرنان من البيت وانزل من بيتى الصبح اقعد على الرصيف قدام مطعم الشرقاوى اقرا قرآن مع نفسى

عقبال ما الاتوبيس بتاع الشغل يجيى وطبعا بإزدال ومش بهدوم رسمية لانه مصنع

بقيت امسك القطاعه وابص لمستوى الناس اللى معايا كانت دموعى تقريبا فى عينى لا بتنزل ولا بتنشف

فضلت على الحال ده تلت ايام

وارجع البيت اعيط بجد بقى كل ده عشان مظهرش قدام اى مخلوق انى ضعيفة

كنت بسمع الشتيمة بين العمال والبنات استغرب واستغفر واقول يارب انا لا عايزة امشى فى شغل ادارى يتسببلى فى عصيانك

ولا عايزة شغل يبقى ماله حرام بضاعة مضروبة ولا نصب ولا بتاع

وكنت بسيب شغل كتير بسبب النظرات الغريبة والهزار بين الناس اللى بقى فوق الحد

فضلت بقى شغالة بالمصنع ده شهر بالضبط

والعيلة كلها بتلوم عليا انتى اتجننتى ..بقى بعد الانجليش وادارة الاعمال ونظافة مخك تنزلى عاملة جودة

وانا عندى لا مبالاة تجاههم

بس صراحة اتعلمت كتير

فى معهد القرآن اتعلمت التجويد صح وكان القرآن له مذاق خاص فعلا

واتعرفت على ملائكة متمثلة فى بشر والى حد كبير حاسة بتقارب ارواحنا من بعض

مش زى مجموعات الجامعة كنت لما بقعد فى وسط ناس متدينة مش بحس بأرواح اصلا

الله اعلم اذا كان بداخلهم فعلا حب الله ولا لا

انا فعلا دوقت طعم الروح والاحساس بيها ايمانيا عكس ما اتعاملت مع البشر اجمعين

اما بقى اللى اتعلمته وشوفته من المصنع كتييير

اولهم رغم تدنى اللغة بينا الا ان قلبهم طيب جدا جدا

المنافسة منعدمة ومفيش مناورات بينهم وبين بعض عند المشرف

فى حب بينهم لو حد وقع ..لكن المشكلة فقط فى لسانهم بس طبعا مقدرش احكم على الانسان

بلسانه لكن بقلبه وروحه وتعامله معايا فقط

وبصراحة رغم انهم حابوا تواجدى معاهم الا انهم ناصحونى اسيب المكان عشان متعبش واستهلك

دماغى فى مجالى افضل

وفعلا ده غرضى الاساسى انى اشتغل بالمصنع عشان اخد كورسات وبعدين اشوف شغل افضل

وانطلق

ربنا سبحانه وتعالى يسر لى الحال جدا بعدها

والمرة الجاية هكمل بقى :D:D

يوم عيد العمال

انتظرونى مع بوست طويل جدا

هيفرح ناس وهيزعل ناس وهيقطع قلب ناس وهتستجدعنى فيه ناس جدا

وفيه ناس هتلومنى فيه جدا وفيه ناس هيستغربونى فيه جدا وفى ناس هيقولوا دى اتجننت جدا جدا

كونوا معانا ان شاء الله

مع طريقى من شهر اكتوبر وحتى وقتنا هذا بشهر ابريل

وقت قصير لكن به مواقف شديدة جدا متناقضة ومختلفة حصلتلى واتعرضتلها واتعلمت منها وقاسيت فيها

سلامو عليكو بقى :D