السلام عليكم ورحمة الله وبركاته
*********************
اولا: بالنسبة الرد على تعليق الاخ سقراط
الله يكرمك يا فندم ...لا هى العملية ومافيها نازل بوليسى جديدة
بعدم توظيف الاقارب من الدرجة حتى الدرجة الرابعة وكذلك النسب
وده مش فى كل البنوك ..ولكن من السهل لو ليك قريب يضمك ضمن ابناء العاملين والاقارب
عند ادراج منشور بتوظيف هذه الطبقة بس كده :D
ثانيا: الموضوع اللى هكتب فيه النهاردة حسيته اوى
اوى من حوالى اسبوع
وبالاخص يوم الثلاثاء بعد الساعة 5,55
انا بقالى فترة كبيرة جدا من شهر اغسطس بدأ عندى ظهور ضيق بالتنفس
وساعات بقعد مش بعرف اتنفس لدرجة بيوصل لونى لشبه الاختناق
وحصل الكلام ده مرات متقطعة على مدار اربع سنوات
لكن بدأ فى الزيادة من شهر رمضان اللى فات .كنت بتسحر مع اهلى فى آمان الله
لاقيت اللقمة مش عاوزة تنزل زورى وبعد ما بلعتها روحى كل شوية تتطلع
توقف فى البلعوم لعدة ثوانى وترجع تانى ووشى احمر
لدرجة بابا نفسه خاف اكون بودع
المهم فضلت معايا العملية دى ودخلت صليت وبقول يارب كل شوية بقول نفسى اموت
لكن مكنتش اعرف ان طلوع الروح صعب كده!!!
عيشت حياتى عادى مفيش شهرين تلاتة نفس الموضوع وبدأ يزيد
لغاية ماوصل الاسبوع اللى فات لاصعب مراحله وكل ما اروح لدكتور
يقولى يجوز جيوب انفية ملتهبة بتعمل مشاكل فى منطقة البلعوم
انا بصراحة قولت شكلها نهايتى قربت ولا ايه؟؟
ده مجهزتش حاجة حلوة اوى اقابل بيها ربنا
المهم سرحت الثلاثاء الصبح
قال تخيل كده ..روحت لدكتور وقال مش هعيش غير 6 شهور
وقبل ال 6 شهور جيه رمضان وكنت مع زميلاتى وزميلى بالدفعة
ودخلت اصلى بالجامع وقعت عليا حاجة جابت أجلى وكل اللى شوفته
دموع شيماء الجارحى وصوتها وهى بتقول هبة و زميلى احمد فوزى اول مرة اشوفه بيبكى
وابتسمت و توفيت
هههههههههههه
طبعا انا معرفش ايه الفيلم الهندى ده وايه اللى جابه كده
فبقول لماما بعد ما قومت وبتاع
هو انتى مش جيبالى كفن؟؟
قالتلى ليه بتقولى كده
قولتلها ماهو مش معقول اشترى حاجات فى جهازى وانزل اخد كورسات
وادور على شغل
ومش عملت حساب الكفن والمسك والحاجة بتاعت الدفن
قالتلى كلمة كويسة وكلمة متعبة
الكلمة الكويسة ان عملى هو اللى هيسرع دفنى وكفنى ويخلى حسابى زى الفل
الكلمة المتعبة قالتلى اياك تشترى كفن بالبيت لاحسن ابوكى يزعقلك
انتى هتفولى على نفسك!!!
طبعا يا جماعة الاعمار بيد الله ومحدش عارف هيموت امتى؟؟
لكن بجد انا ابتديت اخاف من كل حاجة حواليا ..اخاف احاسب علي اى شىء وهى فى نظرى كنت مستهترة بيها
كل واحد يفكر فى يوم الرحيل ويستعد ليه ..محدش بينفع حد
اللهم لا اله الا انت سبحانك انى كنت من الظالمين
اللهم لا اله الا انت سبحانك انى كنت من الظالمين
اللهم لا اله الا انت سبحانك انى كنت من الظالمين
استغفر الله العظيم الذى لا اله الا هو الحى القيوم واتوب اليه
استغفر الله العظيم الذى لا اله الا هو الحى القيوم واتوب اليه
استغفر الله العظيم الذى لا اله الا هو الحى القيوم واتوب اليه
اللهم انى اعوذ بك من الكفر والفقر وعذاب فى القبر وعذاب فى النار
واللهم ارزقنى بجنة الفردوس ورؤية الانبياء والصالحين والشهداء
ووجهك الكريم فرحا راضيا عنى وعن اعمالى
واللهم صلى وسلم على سيدنا محمد وعلى آله وصحبه أجمعين
آميييييييييييييين
ابقوا ادعوا كل نفر يدخل لنفسه بهذا الدعاء
السلام عليكم ورحمة الله وبركاته
