قريبـــــــــــــــــــــــــا

السلام عليكم ورحمة الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛
كل سنة وانت طيبين وبخير وحلويين ومقطقطين كده و زى الفل
اولا: معلش مش هقدر اكتب اى حاجة خلال شهر رمضان الكريم لانشغالى الشديد بهذا الشهر وربنا يجعله شهر مبارك
علينا جميعا ما من عاصى الا وغفر له ربى وما من تائب الا و رحمه ربى وقبله وادخله فى رحمته التى وسعت كل شىء
ثانيا: بعلن عن انطلاق مدونة جديدة لاحدى صديقات عمرى بدفعة ادارة 2007 تابعة لاسم مؤلفتها جميلة المصرى
http://gamilaelmasry.blogspot.com

ثالثا:ان شاء الله هكتب موضوع موسع عن ظاهرة انتشرت بين الناس فى عالم الدنيا ذكرت بعض احداثها بالصحف
والباقى يحدث بالفعل فى بيوت الناس ومن حولنا جميعا الا وهو كيفية لفتاة لتحصل على زوج ما فى انها تثير غيرة رجل برجل
عن طريق فاتحة او خطبة او عقد قرآن وما يتسبب من ضرر للاطراف الاخرين فى حين يكون الطرف الفائز هو الفتاة

لانها اختارت رجل وهى تعلم بانها ستتركه وماهو الا وسيلة لاشعال قلب رجل آخر

هل هذا يقبله عقل...هل هذا ما قاله الدين الاسلامى!!

ومن هذا الرجل الذى يتقبل مثل هذا الوضع؟؟ ان يصبح مغفلا دون ان يرتكب ذنبا واحدا غير انه ارتبط بمثل هذه الفتاة

التى لا تبحث الا عن حب يملاء فراغ وجدانها ..مستهترة بمشاعر الاخرين

وكما قيل افعل يا ابن آدم ما شئت كما تدين تدان
اننى لا ادافع اليوم عن فتيات يجرون وراء الحب الزائف ولكنى الان ادافع عن رجالا يدفعهم الحب الاعمى الى انتشار فجوات بالمجتمع

تتسبب فى زيادة العنوسة واخذها الى طريق مسدود ليست العنوسة من جانب الفتيات اليوم ولكن من جانب الرجال
كونوا معانا بعد شهر رمضان الكريم والقاكم باذن الواحد القهار
بعد الفاصل

......................................................................

أنا بأتغير.....فريق بداية

السلام عليكم ورحمة الله وبركاته

********************

بالنسبة لتعليق استاذ محمد : هى العملية ومافى انى متأثرة اوى بالبيئة المحيطة وشايفة ناس بتعانى

من حولى سواء فى دايرة الاصدقاء او الاصحاب القدماء او فى الشارع ...الخ فكلامى مش من فراغ

وكمان الناس دلوقتى مش ضامنة بعضها فا بيكتبوا قايمة والعريس مش عاوز يكتب قايمة رغم انه حق شرعى

ليه بقى عشان هو فى طبعه الغدر وطبعا اول واحدة بتضر فى العملية دى الزوجة تترمى من غير مأوى ولا اكل ولا شرب لو اهلها فقدوا

لانهم مش ها يعيشوا ليها العمر كله لذلك اغلب وانا بقول اغلب واحاسب عليها اغلب الرجال معندهومش ضمير ولا بيتقوا الله فى

زوجاتهم

نورتينى يافندم ومتشكرة جدا لمرورك بمدونتى ورد حضرتك واتمنى متكونش اخر مرة

***********************

موضوع النهاردة عن التغيير وهو انا بأتغير وهو شعار تابع لفريق بداية

حضرته يوم 23 و 24 الشهر اللى فات بالساقية

كان جميل بس الجو كان حرارته مرتفعة ورغم ذلك تم الجلوس لنهاية انتهاء الندوة او المهرجان المقام

تحدثوا عن خلية التغيير the cell of change (model)

وقالوا ان الخلية دى تعتبر مثل اى خلية فى جسم الانسان بتحتاج مكونات معينة وتتكاثر ولا تتوقف لان دايما الانسان

متجدد وبطبيعته متغير

ومكونات التغيير :-

***********

1- العلم

2- البيئة

3- السمات

4- الادارة

و زى ما احنا عارفين ان التغيير مش بيكون جذرى لانه مستمر

بمعنى انا مثلا فيا عيب ومدركاه وعاوزة اغيره مش معنى كده هغير شخصيتى وكل افعالى وتصرفاتى بالكامل

لو اتكلمنا عن اول مكون وهو العلم

هنلاقيه بيتمثل فى - مقابلة الشبهات

تغيير الاخرين مش انا بس لا ده انا بغيرهم معايا لان عملية التغيير عملية جماعية-

- وياترى لماذا نحتاج الى خلية التغيير بداخلنا؟

- لماذا يرفض الناس التغيير؟

- كيف نعرف الخطأ من الصواب؟

-بُعد العين عن الهدف وظهور العوائق امامك

ليه بقى بنحتاج للتغيير...عشان كلما تغيرت الاشياء ..كلما ازدادت ثباتا

فبنحتاج التغيير عشان الاستقرار النفسى والعيش حياة افضل

- العالم يتغير من حولك ..انت لم تأت بجديد

( حكاية النملة والعالم)

يقال ان عالم شاف نمل بياخد السكر وبيمشى بانتظام وهكذا فحب انه يشوف نظام النمل ايه

فحط قطعة سكر فالنملة راحت اخبرت النمل عشان يجوا يشيلوا السكر

فالعالم شال السكر

فالنمل كله راح فملقاش شىء

وقام حط السكر تانى

وهكذا فلما النمل شاف الموضوع كده اقاموا الحد على النملة اظاهر كانوا بيحسبوهابتهزر:D

-ماهو آخر تغيير حدث فى حياتك

-اذا كان التغيير داخل مؤسسك اقل من التغيير خارجها فان النهاية وشيكة

زى شركة موبايل بتصنع موبايل اسفة فى حجم الشوزكده وشركة تانية بتصغر وبتجدد فى اشكال موبايلاتها

- اذا كان التغيير داخلك لا يجارى التغيير من حولك فان .....

كملوا

- هل انت لست فى حاجة للتغيير؟اين انت من هذه العلاقات؟ ( علاقتك باسرتك واقاربك وشريكواصدقائك وجيرانك

وزملاء عملك ومديرك ومرؤوسيك)

هويتك -مهنتك-مذاكراتك- بدنك-ثقافتك-

وتعد نقطة التوازن هى سمة من سمات التغيير

- اين انت من هذه الصفات ؟؟؟ا- المرونة 2- التفاؤل 3- الصدق

4- اللين 5- النجاح 6- وضوح الهدف 7- الالتزام

8- التوكل 9- الجدية 10- التواصل 11- البر

طبعا ياجماعه كل الاسئلة دى لازم تجاوبوا عليها

لانها بتبقى زى اسئلة كشف الطبقات يعنى اسئلة بتكشف ما بداخل الانسان وتحليل شخصيته

واجاباتها مش بتبقى موجودة عند حد غير الشخص نفسه

طيب

ياترى ايه هى الثمرة اللى الكل بيسعى ليها

اكيد هى ثمرة الرضا والسعادة وراحة البال ( كيف ترى الاحداث )

فالثمرة هى ثمرة راغباتنا وقدرتنا على ان نُضحى على مافى ايدينا الآن من أجل ما تريده فى النهاية

*************

لماذا يرفض الناس التغيير ؟

_ العادة comfort zone

لان دى عادة فيهم واحد يقولك هتغيير ليه ما انا زى الفل اهو

بمعنى اصح عاجبه حاله

- الشك فى من ينادى بالتغيير

- يظنون ان التغيير سيجعل الامور اسوأ

- الرفض الاجتماعى

- يخافون من فقدان الامن - المال- الجاه - الاصدقاء - الحرية

- مقاومة لتغيير مفروض

طيب فى حاجات بنقدر نأثر فيها وحاجات لا

يعنى السياسة مثلا لا نقدر نؤثر فيه

الصحة فى فريق بداية قالوا مش شرط نأثر فيها

بس من رايى ان فى ناس بتبقى عندها مرض ميئوس منه لكن بالارادة والعزيمة بيقدروا يشفوا انفسهم وبأملهم فى الله

اذن فى تأثير وشديد كمان

-هل انت على صواب ام خطأ؟؟؟؟

الكلام فى السؤال ده يتوقف على اربع حاجات:-

- البرهان والدليل

- من سيسعد بك

- حال المتكلم او الناصح

- تستفتى قلبك

فاذا كنت على خطأ :_

1- كيف حالك بعد 10 سنوات؟؟؟

2- ماهو مسير من استمر فى هذا العمل؟

3- كيف تنظر الى من يساعدك للقيام بما تفعل؟؟

4- هل تحب ان يراك من يحب على ما انت عليه؟

5-ربنا...راضى ام غير راضى؟؟

6- هل يساعدنى هذا السلوك للوصول للنجاح؟؟

7- ماذا لو كانت هذه آخر لحظة؟؟

معلش طبعا ده مختصر ليوم 23

لانى تعبت من الحر ومقدرتش احضر يوم 24 مش دلع والله لكن الحر بيأثر على جيوبى الانفية بس

:D

يلا السلام عليكم ورحمة الله وبركاته

القايمة...الخطوبة...الزواج...الطلاق

السلام عليكم ورحمة الله وبركاته

********************

اولا : وحشوتنى جدا جدا ...انا بس مستغربة موضوع وضع ارقام التليفونات فى الشات

ممكن تواصل عن طريق رسايل الميل وعينى وتحت امر الناس فى اى استفسار

ثانيا: كل سنة وانتم بخير وفى طاعتكم لله وعبادتكم له وربنا يتقبل ان شاء الله منكم ومنا صالح الاعمال

ثالثا: ارجو الدعاء لى عيانة بالبرد الشديد واحد زميلى بيقولى روحى اكشفى لتطلع انفلونزا الخنازير

قولتله يلا نريح ههههههههههههههه

موضوع النهاردة بقى

قرات بالصدفة عن القايمة فى احدى المنتديات وصراحة معجبنيش اراء بعض الناس

يعنى من وجهة نظرى واحد اعجب بواحدة هيكون رد الفعل يطلب ايدها من اهلها ..تمام

تبتدى الناس تسأل عن الولد ده والله كويس خير وبركة ..المفروض بقى القايمة يتم الاتفاق عليها من الاساس

وعلى حسب ظروف الشخص المتقدم

يعنى مش يروح ابو العروسة يرفع فى المؤخر والواد ينتحر مثلا

ولانها مش بيعة وشروة

ولكن

ولكن

القايمة حق شرعى للزوجة ..واظن ده حقها ..اااه ممكن الراجل يطلع ندل ويكفر سيئاتها عشان تتنازل

وينفصلوا

والنوع ده من الرجالة بعتبره شخص زبالة يلا عشان بالمرة اغسل ذنوبى فى رمضان وهو داخل علينا :D

حق شرعى ليها ليه بقى

عشان لو مش بتشتغل تلاقى ليها شىء باسمها تعيش منه لو لا قدر الله طُلقت

ووالدها ووالدتها مش على قيد الحياة

وده اتعمل عشان الراجل يشعر بقيمة اللى تعب فيها

مش حاجة سهله زى ماخدها سهله تترمى سهله

والرجالة مش زى بعض

لكن المعظم والله لا اقدرهم ببصلة

و دى كلمة يحاسبنى عليها الله ..فى ناس مععظمهم من غير مأوى وملبس وفلوس واكل بسبب ازواجهم

فالقايمة حقها ده غير اسباب كتير بقى

الخطوبة بقى

عملوها عشان يشوفوا اخلاق بعض.. التفكير وتقاربه ..مدى توافق المستوى الثقافى والدينى والفكرى معا

مدى الالتزام بتطبيق تعاليم الله وليس قال الله والرسول وعدم القيام بالتطبيق

انا بصراحة حد كده كان سألنى بيقولى ايه اللى بيعجبك فى الرجالة

قولتله اللى واخد الدنيا فى وشه ومش بيهمه حد غير ربه والجراة بقى

وحاجات كتير بس يعتبر اللى قولته معظم البنات بتحترم كده فى الرجال يعنى

يعنى العملية كلها مش حب فى حب

فى حاجات ابدى ورسالات مهمة الزواج مش سهل .. دى اسرة بتتبنى ومرحلة تانية غير اى مرحلة اخرى قبلها

الحب بيجى واحدة واحدة المهم الارتياح والقبول فى فترة الخطوبة دى بالذات

فى حالة حدوث خلل فى النقاط الاساسية ينتهى الامر ومن ثم حدوث ما يسمى فركششش الخطوبة

صراحة ربنا مش بحب اتخطب عمال على بطال ليه بقى

يعنى اشوف الشخص من اول وهلة سبحانك يارب خلاص الموضوع يا بيتم يا ينتهى

فى حالة الواد تمام التمام واثبت بقى بكل المقاييس ملهوش حل

الواحد يكمل وبقلب جامد

الزواج

اه ..المرحلة دى بصراحة صعبة جدا لان الدنيا بتبقى جديدة لكن المسئوليات بتزيد

ولكن معظم العاتق بيبقى على المراة لكن الراجل بيشتغل وبس

قليل لما بيساهم فى تربية عياله اساسا

فى معلش فى الكلمة نساء بتهتم بمظهرها ونساء لا

فبيضطر الراجل ينظر برة

وبيتخرب البيت

وفى رجالة مهما يتعمل على راى اللى بيقال الواطى هيفضل طول عمره واطى

ههههههههههههههههه

اه والله

معلش استحملوا صراحتى وكلامى لان فى نوعية تستحق هذا الكلام

ده انا كده بكرمهم :D

الطلاق وربنا ميجيبش حاجة وحشة ان شاء الله ليا وليكم وللجميع

ده بقى يا اما العيب فى الست مش قدرت تفهمه وطفشته

او العيب فى الراجل ومش قدر يفهمها

او حد فيهم طلع ندل والمعظم بيكون الوضع فى الرجالة

لان الراجل عقله صغير زى الطفل لو حد ضحك عليه بكلمه شكرا

تقريبا مش شوفت راجل متزن حتى الان

حتى اللى توقعتهم مش بيوقعوا لاقيتهم محدش سمى عليهم

:D

بس مش عليا على ناس اخرى

طبعا انا اتكلمت كله فى مقتطفات كده

عشان بقالى كتير مش كتبت

المرة الجاية ان شاء الله هكتب جزء من انا بتغير لفريق بداية اللى حضرته

وربنا ييسر الحال للجميع ويهدى يارب

السلام عليكم ورحمة الله