السلام عليكم ورحمة الله وبركاته
********************
الموضوع اللى هتكلم فيه النهاردة ان شاء الله شائك جدا ويعنى المفروض اصلا انى مكنتش اتحدث فيه بشكل او بآخر
كنت معتمدة على موضوع مكارم الاخلاق فى مدونة ايام من حياتى هو اه استوفى وبشكل عميق مش سطحى وجامد وبآيات وبأحاديث
بس انا معرفتش اعرض مواقفى هناك بالتعليقات لان مفيش روح تبادل النقاش هناك لضيق وقت الكاتب فى الرد على التعليقات
طيب
ملاحظة بقالى فترة كبيرة نتيجة لعدم رضا وقناعة الناس بما يجرى فى الواقع من ضيق وازمات داخل وخارج البلد
والضغوط النفسية تجاه العمل ..اصبح الظلم ماهو الا شبيه براعى الاغنام حيث يسوق امامه الناس بما لديه من جبروت وظلم دفين
تجاه الآخرين...الحيتان كترت والصغير حتى طلعله سنان والبيبى بيسن اسنانه لمقابلة ذئاب الجبال والطرقات
الدين ناس وخداه ستار .. وناس وخداه عن فطرة ومورث..وناس وخداه عشان تتجوز على غير ملتها وبعدين يرجعا لملتهم الاساسية
لمجرد متعة كام يوم وحاجة نفسه فيها يحققها وخلصت العملية على كده ...وناس بتقول احنا بنعرف ربنا وبترشى وبتاخد رشوة اللى
بيسموها كرامات ...وناس بتقول انها بتعرف ربنا وبتظلم زوجاتها واولادها واهلها ..وناس بتقول بنعرف ربنا وبيلعنوه وبيسبوا دينه استغفر الله ..واللى واخد الدين مصلحة واستغلال ولابتزاز الناس من خلاله..الخ
يعنى افعال مع اقوال على النقيض ومحيرة للغاية
ومنكرش ان فى ناس كتير كويسة لكن انا بناقش الجانب الوحش اللى المفروض فى مجتمع اسلامى ميكونش له وجود من الاساس
هحكى مواقف غريبة جدا
قبل ما اسيب منطقتى القديمة خرجت انا واهلى بالعربية ووقفنا بيها على المزلاقان حيث محلات الجزارة والسوق
لاقيت واحد جزار استغفر الله شتم الخالق ذاات نفسه
اتذكر من كتر عصبيتى ومش مدركة انا ساعتها المفروض بنت مش تجاذف وقوة اللى امامى
فتحت باب العربية وكنت هنزل اضربه ..بابا هزقنى وجرى بالعربية قالى انتى مجنونة ربنا يتولاه احنا مالنا وبتاع
يا بابا ازاى ده قال كذا ازاى نسكت على كده ..و زعلت منه فترة بجد لكنه خايف عليا ومن وجهة نظره ربنا يتولى الشخص ده
طيب مهما وصل حجم الخناقة او الشتيمة متوصلش العملية للتتطاول على ربنا ..للدرجة دى الناس متخلفة ولا ايه معرفش بجد
ده غير بقى اللى بيفتروا بالكذب على الله
واحد اعرفه بيقولى والله ياهبة ده فلان اللى قال وبتاع فبقوله طالما هو انسان حقير كده بتكلمه ليه
قالى اصلى بحبه قولتله اللى يحب حد يغيره لو انت شايف فعلا انه كده
المهم انا عارفه انه كذاب وسيباه براحته وبكلمه عادى ..لما يقسم بالله كذب
قولتله اقف عندك انت بدأت بظلم نفسك متحلفش المهم حلف ووالله الدنيا زى ما قلبها على غيره اتقلبت عليه
وسبحان الله اتحط فى نفس الموقف واصبح مظلوم وقالى سامحينى قولتله يا ابنى انا خلاص سامحتك المهم ربنا يسامحك
انت خرجت برة الحدود وانت مش فاهم حاجة لغاية ما ابتدى يتعدل وربنا كرمه
انا مش شايفة داعى للكذب والتزوير وقلة الادب والتطاول على ربنا
شىء غريب
يعنى ربنا سبحانه وتعالى يعلم ان فى شخص زى الفل متقدم لى وطوب الارض بتشكر فيه وعشان عرفت انه كان مرتبط ببنت والبت مازالت بتحبه رفضت الجوازة من اساسها ..رغم لو واحدة فى موقفى هتقولى ماهى اللى بتحبه وطلبنى انا ما اخده انا الكسبانة لان فعلا اخلاقه ودينه مش شوفتهم على حد
لكن لمجرد انى مش عايزة اكون سبب فى جرح شعور بنت زيى والله يا جماعه انا بخاف وانا بطلع اللحمة والفراخ لامى واختى
اخاف اطلع حتة لحد اكبر من حد مش لشىء غير اخاف احاسب عليها
ناس بتحسبنى بتبطر حتى والدى بيقسى عليا عشان كده وقولتله عليا النعمة لو قاسيت عليا اكتر من كده عشان اتزفت واتجوز هروح اى دار ايتام او مسنين اخدم فيها طول عمرى لغاية ما اموت ومش هتجوز خالص ومش هتشوف وشى تانى ومش يهمنى مخلوق فيكى يا ارض
كل واحد فى الدنيا عايز يحقق كل حاجة ومش يهمه غيره بس بلاش نتطاول على حقوق الاخرين لان كده برضو بتتطاول على الله
هتقولى ازاى هقولكم فى التطاول على شرعه ..ربنا سبحانه وتعالى شرع فى القرآن اشياء كتيرة لازم تتطبق مش مجرد كلام وخلاص
اى انسان عاوز يفرح باولاده لكن لكل شخص معايير ومواصفات خاصة للقدرة على التعايش والتأقلم مع الغير
كده اتكلمنا فى نقطة السب ..الكذب..العدل..التطاول على الشرع
النفاق بقى
ههههههههههههه من اكتر النقاط بصراحة اللى ضحكتنى ليه؟؟
معظم الناس اللى بكلمها بتبقى فى وشى حبيبه و يدوبك اقفل كلام معاهم او ادى دهرى للدنيا تشوف يا اعوذ بالله
حقد الدنيا فى قلبهم وكرهه من ناحيتى ..رغم انى مش عملت شىء وببقى عارفه وبكلمهم عادى
مرة واتنين وتلاتة وممكن توصل لعشرين حسب طاقتى معاهم اقول يمكن فكرتهم تتغيرلكن بعد كده بقى بضطر انى امسحهم خالص من حياتى
نمرتهم ..اكونت ..اى حاجة خاصة بمعرفتهم بصفة شخصية
اصل ليه النفاق يعنى زهقان من واحد يا تعاتبه يا تقوله انا مش طايقك ومتكلمنيش تانى من فضلك وانتهيت
المنافقين فى الدرك الاسفل من النار
ربنا يكفينا شرهم ومش يجعلنا منهم
طيب الظلم بقى
واحد مصاحب واحد فيقوله فلان مبهدلنى اقف جنبى انت صاحبى
المهم معظم الناس ماشية بمثل الصاحب ليه على صاحبه سلفة و كذبة وشهادة زور
:D:D:D
ويمشى ويشاركه فى الظلم ويقول انا وهو واحد ده صاحبى وانصر اخاك ظالما او مظلوما
والناس طبعا بتحلل وبتحرم على كيفها كالعادة وبتفهم غلط بمزاجها
تنصره ظالما بأنك بتوجه للصح والطريق السليم مش انك تشاركه فى الظلم
اما المظلوم تقف جنبه لغاية ما حقه يرجعله
واصلا حق المظلوم بيرجع من ربه لان دعوته مستجابة ونفاذة
لما عبد يقول يارب انا مظلوم كفاية اوى
ربك يقول وعزتى وجلالى لانصرنك ولو بعد حين
كفاية كده انا تعبت
بس ان شاء الله خلال الاسبوع ده هكتب فى رواية صرخات انسية التكملة
وهنزل موضوع فى كيف تكسب رضا ربك بعنوان عن المثل اللى بييقول العند يرث الكفر
ويلا السلام عليكم ورحمة الله وبركاته
