السلام عليكم ورحمة الله وبركاته
اخبار الجميع ايه فى ظل هذا الوقت العصيب؟؟؟ ربنا يقوى الجميع
معلش واسفة لعدم تواجدى خلال الاسبوعين الماضيين بس كنت بدخل على الميل تخاطيف كده
-بالنسبة لموضوع الماهية والوجودية مش هقدر اتدخل فيه اكتر من كده لاسباب كثيرة لكن
ممكن اقولكم توضيحه بشكل افضل
مثال:لو عندنا عجينة وقوالب عشان اشكل العجينة دى فى شكل بسكويت وكحك..الخ
هنلاقى ان الماهية بتتمثل فى الاشكال وتعددها اللى هى القوالب اما الوجودية هى العجينة نفسها
لانها بتتمثل فى الاصل ذاته ياجماعه بس هى دى كل الحكاية:D
-الاخبار الشخصية بقى مش ولابد بس الحمدلله عايشين ونتنفس هههه
1- التحقت بمنحة ال ICDL ب6اكتوبر تابعة لوزالاة الاتصالات
2-ان شاء الله فى حاجتين مؤجلين حاجة كده باذن الله فى شهر سبتمبر والاخرى بشهر نوفمبر
اذا اراد الرحمن وكله بتسهيلات ربنا
3-حالتى النفساوية الفترة اللى فاتت ومازالت مش متزنة نتيجة لخواطر بتيجى على بالى
بحسبها هواجس وكنت بكدب نفسى لكن تاكدت من صحتها وبسبب الكلام ده اثر عليه و وقفت مشروع كنت
هبدأ فيه وهيبقى ناجح بنسبة 99% بس ربنا يسهل واقدر انهض تانى واكمل البيزنس ده
4-خبطت فى الكلام مع ناس كتير منهم كريم وشغلانة كده وطول ما انا قاعدة اقول مليش كلام مع حد
ربنا يهدى النفوس لان انا تحت ضغط ابتلاءات بشكل شديد وربنا يرحمنا برحمته بقى
ومحدش بيقدر او هما كلهم على علم بكده وبيضغطوا برضو على اعصابى
5- اشتركت على الفيس بوك بعد مارجعت حسابى فى جروب حلو اوى اسمه تقريبا مشروع 100 يوم قبل رمضان
وهحاول اشارك فيه بشكل جامد وربنا يسهل ولان روح الناس حلوة اوى
6-الحمدلله مبقتش اتابع ولا جروب ادارة ولا اى شىء ولا مدونات مفيش تقريبا غير الفيس بوك
واكلم الناس وبخرج من النت واى حد بيبعتلى لينك مدونة هدخل وهشارك
غير كده مبقدرش ابحث يعنى مكبرة على الاخر
موضوع النهاردة بقى
طبعا كان يوم الاثنين من اسبوعين تقريبا وحبة كده
طلبت من الحاجة انى انزل اشترى جاتوه من الدمياطى واكل من احد المطاعم كنوع من الترفيه
ركبت عربية مخصوص ودى داخل اكتوبر عاملة زى عربية نص نقل بدل التاكسى
وقولتله عاوزة اروح الحصرى
طبعا قبل ما انزل لحظى الحلو صليت الظهر وعملت رقية شرعية بسيطة
وانا بطبعى بحب اقعد فى الاودة لوحدى اتعبد فيها ومحدش يدخل عليه
عملت اللى فيه النصيب ويمكن اللى عملته كان سبب فى انقاذى
المفروض راكبة واطلع من الحى الحادى عشر على العاشر واخد ناحية الكنيسة شمال
الباشا خدنى يمين قولتله انت ماشى غلط
قالى هندخل من مكان تانى اسرع واسهل فبصتله كده بقوله عاوز تودينى من ناحية الواحات
الحصرى!!!
سكت جيه يدخل فى الطريق الغير مرغوب واحنا بنلف الصينية العربية لفيت حوالين نفسها
طبعا هو اتجنن بصلى بخوف وجرى على الحصرى
واحنا رايحين ناحية الحصرى المفروض ندخل يمين فبقوله انت ماشى غلط
قام خابط عربية ملاكى شالها مالاقتش ليها اثر
قولت هيوقف خدنى وجرى قولتله اقف قالى لا
خبطنا فى مقطورة وكنت خلاص تقريبا قولت عزرائيل بيلف حواليه
وبدعى ربنا ان اهلى يلاقوا جثتى عشان متبهدلش اكرام الميت دفنه برضو
المهم خبط فى مليون حاجة وهو اتعور بس الحمدلله لم يصيبنى اى ضرر زى ما ركبت زى مانزلت
فضل يلف وقالى انزلى هنا فى الحى الثامن
وقالى مش عاوز فلوس ادعيلى بالهداية طبعا بصيت باستغراب واديتله فلوس اللى فيه
النصيب ومشيت
انا طبعا روحت رجلى مش قادرة امشى عليها من الذهول وكل الحوادث دى
بصيت لنفسى فى المراية قولت سبحان الله ولا خدشة
القرآن حقيقى فيه معجزات بس بقى اللى ربنا يعطيه ويعرف يطلع منه
مرة تانية
ركبت مخصوص برضو وفى طريقى للحصرى
قعد يتكلم وانا سامعه بس مش برد على الكلام الا قليل قوى
بيقولى ليه اقارب جامدين ده انا قتلت واحد ودفعت الدية
واتنازلوا عن القضية بمكالمة تليفون واسطة يعنى
فبصيتله بقوله وايه اللى يوصل الموضوع للقتل يقولى احنا لما يكون فى خناقة
لازم يكون فى قاتل ومقتول
قولتله اعوذ بالله
قالى وابن خالى اغتصب بنت فى اكتوبر وطلعناه زى الشعر من العجينة
انا اتخرست بجد
معرفش خوف ولا لان الواسطة مخلتش خير فى الدنيا
خلاص كل حاجة حلوة طعمها راح راح
وانقضـــــــــى
ده بقى ايه ناس شايلة السوء فى قلبها وناس بتعمل السوء وتحتمى فى غيرها من اقارب ووسايط
مصر خلاص راحت عليها
البنات اكتر من نصهم تركوا طريق الصواب والشباب بقوا بتوع اشتغالات ومش قادرين يكونوا
رجالة واصحاب مسئولية
والله الواحد بيدمع وبيحزن يوميا على الجيل اللى المفروض نفتخر به
يلا حسبى الله ونعم الوكيل
يلا سلام
هبة سيد والحقيقة الغائبة
