السلام عليكم
اهلا بكم جميعا معى من جديد وهو هو نفس الموضوع بتاع لازم تتجوزنى..اه ياخاين ياقليل الحياء
بس انا كتبت العنوان ده لانى هتكلم عن الحب الزائف والزواج العرفى
طبعا هحكى حاجات تفطش من الضحك وهبين ابعاد المشكلة الغريبة دى والى اى مدى انتشرت
اول موقف:-
كنت لسه داخلة اولى اعدادى بمدرسة ....ف2 الفترة التانية المسائية يعنى
ببولاق الدكرور ..اكيييد كنت مخضوضة من الجو الجديد ده بعد ما كان فى اختلاط ومدرسة خاصة
فجأة اروح مدرسة ميرى والاقى ماما بتنصحنى بلاش تكلمى اى ولد بالشارع
كبرت بقى وفى حاجات كتير متنفعش
دخلت الفصل ومديرة المدرسة اختارت لى فصل الى حد ما الناس اللى فيه كويسة
لكن بعد اسبوع واحد اكتشفت بلاوى
شلة من البنات تعاطى نوع معين من المخدرات والمدرسة مقلوبة ومكتب الاخصائية الاجتماعية
فى ناس زى الرز معلقتش فى عقل بالى وانا مالى
مفيش فى نفس اليوم بنت هربت من المدرسة ولاقيت الفصل كله برة الفصل فى الحصة الاخيرة
بيبصوا من فوق لبرة المدرسة فانا خرجت اتفرج
لاقيت واحدة من زميلات الفصل فى ايدها ولدين واحد على اليمين والتانى على الشمال
وبتتضحك لكل البنات اللى باصيين عليها من فوق
اتضح انها متزوجة حد فيهم عرفى والتانى صاحبه عايشة دور اللى بينادوا بيه
الحرية الامريكية
بابا كان ساعتها مسافر وعرف من الجرنان ان فى حالات كذا وكذا بالمدارس قال لماما خلى بالك من عيالك
طبعا دخل قلبى الخوف وتقريبا كنت كرهت خلفة البنات وبتمنى من ربنا اذا من عليه بالخلفة يبقى بنين وبس
لان البنات مشاكلهم كتير وتربيتهم صعبة
تانى موقف:-
كان يوم مادة السلوكية قعدت فى الجامعة انا ونورة فى شارع جوه الجامعه بنراجع فيه
قبل ما ندخل الامتحان هما بيسموه شارع العشاق سورى يعنى
بس انا قعدت جوه الجامعه يعنى مكان عام
وانا براجع طبعا معروف عنى اى بنت ولد محدش يكلمنى قبل الامتحان لان اعصابى بتبقى زفت
الاقى نورة بتقولى ارمى ودانك كده بقولها فى ايه؟؟ قالتلى ارمى بس؟؟
ومن غير ما ارمى ودانى الصوت كان عالى اصلا :D
لاقيت ولد وبنت وصوتهم عالى
هى تقوله لا لازم تيجى وتقابل بابا وتتجوزنى ...انت اظاهر اتجننت انت مش عارف انت عملت ايه
انا ونورة مبلمين قومنا وسكت قولتلها الله يسامحهم هما الاتنين
بجد اتخنقت وكنت على اخرى لان مهما وصل بالناس الحب ميوصلش للغلط
طبعا عشان مندخلش فى مواقف كتير
موضوع الزواج العرفى سألت فيه بابا عشان افهم عن النوع ده من الزواج وليه انتشر كده
قالى يابنتى ايام الرسول صلى الله عليه وسلم مكانش تقريبا الزواج بيوثق
لكن لازم الاشهار والعلانية فى الزواج
قالى الزواج العرفى فيه مشكلة واحدة بس هو مينفعش يتوثق او اثبات نسب الطفل
لانه غير معترف بيه
اما الشباب فبيستخدموه كوسيلة عشان اغراض فى دماغهم واغراض قذرة جدا
مش عشان حب لان اللى بيحب حد بيعمل عشانه المستحيل وبيخاف عليه
طبعا احترمت راى الحاج لان كده كده كنت واخدة فكرة سيئة عن هذا النوع من الزواج
واتمنى من الجميع اللى بيحب حد بجد يفكر يشتغل ويشقى ويتعب ويقول للطرف الاخر كفكرة ويروح لاهلها من
باب البيت ..انما غير كده يبقى وفر على نفسك الذنوب اللى ممكن تلمها فى كل لحظة
وانتشار هذا النوع من الزواج لتافه العقل والاستعداد السلبى وعدم القدرة المالية ونشر الفساد
ان شاء الله المرة الجاية هتكلم عن مواقف من حياتى
يلا ااااااااااااسلااااااااااااااااااااااااااااااااام
والقاكم فى الحلقة القادمة ان شاء الله
