السلام عليكم ورحمة الله وبركاته
طبعا انا مكنتش متأكده بشكل تام من ان دكتور ابراهيم الفقى رايح ولا لا ؟ المهم انا كلمت صاحبتى شوشو وقولتلها تعالى نروح
حتى لو مفيش محاضرة كأننا بنشم هوا ونتكلم مع بعض طبعا انا روحت حجزت فى الاول واتعرفت على بنات من الازهر الشريف
وكانت الحياة حلوة بجد هناك بجد اللى كان فاضى وبيعمل قاضى كان يروح هناك ويتفرج على الناس شكلها وهى بتحجز وجاية
تستمع كانوا عاملين ازاى المهم الدكتور ابراهيم تقريبا جيه على الساعة 5 تقريبا وبدأ يتكلم عن المفاتيح العشرة للنجاح واساسا المحاضرة
دى حضرتها مرتين مرة فى الجامعة ومرة فى الازهر للمؤتمرات بمدينة نصر
فقال ايه بقى :
هو اتكلم فى البداية خالص عن اربع حاجات الا وهى:
1- علاقة الانسان بربنا سبحانه وتعالى ومدى ارتباطته به
جميل.....فبيقول ان ربنا بيحب الناس اللى بتتمنى وتحلم وتحقق يعنى بيسعوا وبيتوكلوا على الله
لكن الله لايحب نظام التواكل يعنى تتمنى وانت محلك سر
2-الاخلاق
يعنى الكره والحقد وطولت اللسان وحاجات كتير ........الخ اللى بتضم الاخلاق
قال مثال : انه كان راكب مع احد سائقى التاكسى وبيقولوا ايه رايك فى اللى بيشتروا المرسيدس
السائق قاله : دول حرامية بنفس اللفظ كده
قالوا يعنى لو انت معاك فلوس هتشترى عربية مرسيدس
قاله لو زى الحاج فلان الفلان : اه
طبعا هنا دكتور ابراهيم الفقى قال ان هو غيرله ادراكه فى لحظة
وان اللى كان جواه هو الحقد
3-الانتماء للوطن
ذكر دكتور ابراهيم الفقى ان كان هناك مجلة فرنسية سوف يتم اصدارها بشكل دائم له ولثالثة من اقوى رواد التنمية البشرية
ولكن طُلب منه تغيير اسمه ولكن دكتور ابراهيم رفض ولكنه ترك الشخص له فرصة للتفكير وقال له اسمه رباعى
وقاله انا عربى مسلم وهنا طبعا اظهر انتمائه الشديد لمصر الحبيبة
4-الابتكار
الدكتور ابراهيم قال عبارة ( معجزات الامس اصبحت تكنولوجيا اليوم )يعنى مبقاش فى حاجة اسمها مستحيل
ممكن تكلم الناس عن طريق الخاتم او يركب الموبايل ومتصل بالعين
الى غير ذلك ....الخ
مثال ذلك ايضا: ان واحد فى مونتريال حب يعمل محل للعرائس والالعاب ودرس المنطقة من خلال خطة تسويقية كان وضعها لنفسه
بص لاقى محل عملاق فتح جنبه على اليمين للعرائس والالعاب وذلك بعد مرور ستة اشهر من فتح محله
وبعد سنة تقريبا فتح محل اخر عملاق على الجانب الايسر
فماذا فعل ؟ هنا بقى الابتكار
كتب لافتة كبيرة على محله بأنه المدخل الرئيسى
طبعا الفكرة كانت جهنمية
يلا بينا نتكلم بقى عن المفاتيح العشرة يارب اعرف احطهم فى ميدالية واحدة ونخلص هههههههههه
المفتاح الاول : الدوافع
طبعا العقل البشرى لا يعى الفشل لكنه يعى الاتجاهات
يعنى كن حذر وانت بتكلم نفسك ومش طول ما انت قاعد تقول انا فاشل انا فاشل لان طبعا لو ما أخطأتش فى الاول يبقى مش هتنجح
لازم يكون فى تجارب وخبرات مريت بها سابقا
اما الفشل بيجيى نتيجة التفكير السلبى
عندنا دوافع ثلاثه:
أ- دافع البقاء
الدكتور قال هنا كل واحد ساعت لما يحس بأنه هيودع مش بيعرف اخوه حتى
مثال ذلك : واحد فى مونتريال كان عاوز ينتحر من اعلى الادوار ولما سمع حد بيقول حريقة جرى
(فيما معناه ان الروح حلوة )
ب- الدوافع الخارجية :
مشكلتها انها بتنتهى مسافة لما بنتلهى فى شىء آخر لذلك يجب الاندماج فيها والتأثر بها فى حالة انها ايجابية
ج- الدوافع الداخلية:
يجب استخدام الافكار الاستراتيجية العقلية يعنى لازم تكون حريص وانت بتقول لنفسك ايه علشان تعرف تكون افكار استراتيجية تمام
ولازم يكون فى تركيز على الهدف ساعتها بطاقة حركية وذهنية
التنفس فى اكسجين وجلوكوز
لازم نتنفس كويس علشان الدم يوصل للمخ والمخ يتغذى ويعرف يفكر بجد
طبعا قال ان الطب فى فرانسيسكو اثبتوا ان التحدث مع الذات 80% سلبى بيؤدى الى 75%من الامراض
لازم بقى ناخد بالنا من وضع الجسم والاحساسيس المرتبطة
وذلك من خلال الرابط يعنى ايه؟
الرابط ده يعنى مثلا شوفت واحد بيبص ليه بصة معينة البصة دى بتفكرنى بشخص تانى
كده يعنى او اغنية سمعتها افتكرت بيها شىء
.........الخ
فى الانسان ( الاستدلال يعنى بيدور حواليه وبيبحث عن لماذا خلق - المعرفة عنطريق ما انزل فى كتاب الله وما قاله الرسل من قوانين
آلهية يجب ان نلتزم بها ونتبعها
المفتاح الثانى : الطاقة
هناك ثلاث انواع من الطاقة
أ- طاقة جسمانية
وهنا اتكلم عن الناس اللى بتهمل فى صحتها
وهنا كيف بيتم فقد الطاقة؟؟؟؟؟؟؟؟؟؟؟
بالتفكير السلبى بيضيع الطاقة وبيخليها تنفذ من الجسم على الفاضى
زى الجلوس امام النت والتليفزيون وكمان التفكير فى الاشياء المحزنة
علاجها:
-التفكير الايجابى
-التنفس سواء ( التنفس التفريغى ) وهو الاستنشاق من الانف حتى العد الى 4 واملاء الرئتين بالهواء
واحتفظ بالهواء داخل الجسم حتى العد الى 10
فرغ الهواء ببطء من الفم حتى العد الى 5
او ( التنفس لتوليد الطاقة ) وده بقى استنشاق من الانف حتى العد الى 4
فرغ الهواء من الفم حتى العد الى 4 وكأنك تقوم باطفاء شمعة
قم بهذا التمرين 10 مرات
وذلك التمرين يفضل تكراره
- نظام التغذية يعنى تأكل كل ما يفيد الجسم وكمان مش بشراهة علشان ده بيسبب همدان للجسم
- تمارين رياضية خفيفة
- شرب المياه كثيرا
ب- الطاقة العقلية
وهو بالقراءة لامداد العقل بالطاقة التى تعطيه الحيوية للتفكير الايجابى بشكل مستمر
ج- الطاقة العاطفية
الجلوس فى هدوء وتأمل فى ملكوت ربنا كده وانت فى هذه الحالة فكر فى انسان تحبه اثناء القيام بذلك
وستشعر بالهدوء وارتفاع الطاقة العاطفية
المفتاح الثالث:المهارة
يجب لاكتسابها القراءة لمدة على الاقل عشرين دقيقة او الاستماع لشرائط او سى دى
المفتاح الرابع:التصور
التصور والتخيل هو بداية الابتكار
المفتاح الخامس:الفعل
هو اللى بيفرق بين السعادة والحزن
والنجاح والفشل
افعل اكثر من انك تتكلم ( ضع مهاراتك فى الفعل ) لان الاقوال الحماسية بتقلل من الفعل.
المفتاح السادس: التوقع
تفائلوا بالخير تجدوه) اى حاجة تتوقعوها بأحاسيس تحصلك بنفس التوقع
المفتاح السابع : الالتزام والاصرار
بيقول مرة واحد اترفض من وظيفة وعاوز يشتغل يعمل ايه
؟؟؟؟؟
بعت 2000 سى فى لمختلف الاماكن ويترفض
وبعت تانى
لغاية لما مكتب البريد زهق من كتر ما بيبعتلوا الرفض وقاموا موظفينه فى مكتب البريد
هههههههه
مثال آخر:
واحد كان رايح يصلى الفجر وكان لما يخرج من بيتهم كان بيوقع فى بركة قدام البيت فبيرجع يتوضأ تانى
فضل على الحال ده مرتين
وفى المرة التالتة واحد سنده ووصله للمسجد قاله مش هتتدخل الجامع قاله انا الشيطان
الراجل قاله ازاى وانت وصلتنى وفادتنىمن البركة
قاله لان اول مرة لما وقعت ورجعت اتوضأيت ربنا غفرلك ذنوبك
ولما وقعت ورجعت تانى ربنا غفر لاهلك
ولما اصريت ورجعت تانى ربنا غفر للحى
فقولت بدام ربنا يغفر للعالم كله اوصلك انا بنفسى بقى
اعوذ بالله من الشيطان الرجيم بجد
المفتاح الثامن:المرونة
المفتاح التاسع:الصبر
الاخذ بالاسباب
مثال ذلك محمد حسان اللى عدى المانش وهو فاقد رجلية الاتنين
فالمصور وقع منه الكاميرا لانه استغرب ازاى محمد حسان عدى المانش
فا محمد حسان قاله ( المعاق معاق فى افكاره وليس فى جسده ) احسن كلمة قالها الصراحة
المفتاح العاشر : الانضباط
واتكلم عن الاعتقاد ان الواحد لازم يكون عنده اعتقاد فى الله وفى قدراته الخاصة به
واخيرا الاستمرارية
معلش للاطالة ويارب تكون المعلومات عرفت اقولها
يلا سلام
