السلام عليكم ورحمة الله وبركاته
اولا : بشكر الناس شكر جامد اللى بيعلقوا واللى بيقولولى رايهم على الميل عن المدونة وجمال كتابتى فى البوست
ثانيا: احب اخبركم عن الموضوعات ان شاء الله فى المرات القادمة هتكون عن تعدد الزوجات والاحساس والفرق بين السلفيين والاخوان
والفرق بينهم فى اللفظ بس على الرغم من اتباع الاخوان لاهل السلف الصالح
وهتكلم عن الحياة والظلم وكل ده قريب ان شاء الله
ثالثا:ولله الحمد نحمده ونشكر فضله دائما على نعمه التى لاحصر لها فبحاول اعود نفسى على التفكير فى اكتر من شىء
وفى جهات شتى فى وقت واحد عشان دماغى كمان تتبرمج على مود معين
وكنت مستنية حاجة كده بس شكلها مش هتتوفق فهغير باذن الله المسار خالص
ندخل بقى فى موضوع النهاردة زى ما وعدت انى هكتب عن يوم الخميس 14/2 اللى الناس بتسميه يوم الحب
وايه العنوان اللى انا كتباه النهاردة وياترى بيدور مضمونه حوالين ايه؟؟؟؟؟
انا طبعا كان الكمبيوتر تعبان حبة فنزلت كافية نت علشان اصلحه واكلم صاحبتى شيماء رنت عليه فدخلت كلمتها شوية
وقالتلى انا نفسى اتفسح ماتيجى ننزل يوم الخميس وكمان نفسى اشوفك قولتلها وانا اكتر والله
اتفقنا
المكان الباب الرئيسى لجامعة القاهرة
الزمان 5.30
نزلت انا وماما واختى هما راحوا نادى المهندسين وانا روحت الجيزة
طبعا روحت هناك بدرى قبلها بساعة لانى مش بضمن المحور وشوشو متنتظرنيش كتير
روحت لاقيت حفلة تخرج لكلية الهندسة والاحتفال بمئوية جامعة القاهرة
بس كان جامد بجد عقبال حفلة تخرج تجارة ان شاء الله
احنا بقى ماكوناش محددين مكان محدد نتفسح فيه فلاقيت شوشو جاية وبعد السلام والتحية
بدأنا فى الانطلاق وخدتنى على كوبرى الجامعة وبعد كده زى نادى بس بعد نادى هيئة اعضاء التدريس
لانى مشوفتش اسم النادى اللى احنا روحناه
المهم بقولها يابت دى جنينة فاضية مفهاش حد والدنيا ضالمة قالتلى استنى احنا لسه مدخلناش جوه
هتلاقى ناس استنى
المهم نزلنا السلالم ودخلنا على النيل بسم الله ما شاء الله كل عصفور واخد عصفورة وعلى مقعد وتحت شجرة
ولا كأنهم فى سينما ريفولى ههههههههه
فأنا وهى ضحكنا فى سرنا واختارنا مكان بعيد عن وجع القلب ده
عاوزين نشم هوا زى الخلق بس بأدب وبأحترام
ويومها الجو كان برد مميت فحتتتتتتت
دى كلمتها فحت دى هههههه
المهم جيه ضابط الامن بيمر على الناس فهزق واحد لانه كان قاعد بقلة احترام وبعد كده بص علينا كده وضحك وسلم من بعيد
وبيقول فى نفسه مصر لسه بخير ههههههههه
لان يعتبر احنا واسرة بس اللى كنا قاعدين باحترام الباقى بقى بيقضى الفلانتين
سبحانك يارب انتوا خليتوا للحب عيد يعنى استغفر الله العظيم ربنا ماكانش كفيل بأنه يعمل للحب عيد زى الفطر والاضحية
عارفين ليه؟؟؟؟؟؟؟
لان الحب عندنا بالفطرة وموجود من ولادتنا وفى كل وقت ده احساس وشعور متجدد
مش محتاج عيد لتذكره ممكن نقول يوم الحب علشان لو زوج حب يشترى حاجة لزوجته واولاده وهو راجع من الشغل
كده يعنى لكن مش عيد
المهم ...قعدت انا وشوشو نتكلم كتيييييييير اوى والوقت سرقنا بجد
فالمطرة مطرت بس على خفيف وانا كل شوية ببص للسماء بجد احب
وقت المطرة ..وماقبل العصر ..و السحر
الاوقات اللى رب العالمين بيسمح فيهم للعبد بأنه يدعوه بقلب طبعا الدعاء فى كل وقت
لكن بيقوله انا فى السماء الدنيا فاستغل الفرصة وادعى وشوف انا هستجيب ازاى
فيقول العبد يارب يارب يارب يارب
يقول الله لبيــــــــــــــــــــــك عبــــــــــــــــدى
وقعدنا ندعى ربنا وخدنا بعضنا وبنتمشى لغاية الجيزة فا واحنا ماشين جنب الجامعة كده
شيماء بتقولى هبة بصى هناك كده بقولها فين قالتلى شيفاه
انا طبعا زوهلت لانى شوفته بس كنت بحسبه ليزر لاقيت ملاك نوره ابيض بيطير ناحية القبة
فمقدرش اقولكم فرحت اد ايه ؟؟؟؟؟ لان عرفت ان ربنا بيحبنى وبيحبها وجعلها سبب انها تعرفنى ان النور اللى بشوفه فى السماء دائما
دول ملائكة والمفروض مخافش منهم فدعيت ليه ولناس كتير ويارب يكون دعائى وصلهم
فلما ذكرت المصطفى - صلى الله عليه وسلم- وببص حواليه مالاقتش الملاك فبقولها الله
هو راح فين ببص فوقيه لاقيته بيطير فوقينا حتى شيماء بتقولى هو ايه الحكاية
قولتلها بس ده بيحرسنا فضلنا على كده لغاية ما وصلنا للجيزة ومرضتش ابص للسماء
الناس هيحسبونى مجنونة او تتضربنى عربية بدون قصد
ده بقى ايه وبيحصل ازاى وازاى تشوف الحاجات دى ؟؟؟؟؟؟؟ ده مش سر لكن حقيقة موجودة بس احنا مش بنعرف نستغل الامور
لو انت شخص طيب ومتسامح وقلبك ابيض من الحليب وبتحاسب نفسك او بأول وبتخاف على احساس
وشعور غيرك وذمتك كويسة وماشى فى الحلال فى كل شىء دائما ومحافظ على الفرائض
ده مش احتمال بل اكيد هتلاقى عندك شفافية وجسدك منور ازاى
؟؟؟؟؟
الشفافية هى رؤية الاخرين بالقلوب مش بالعيون انا ممكن اشوف حد من بعيد اعرف جواه او جواها ايه ده بقى الاحساس العالى
ومش موجود عند ناس كتير لان اكترنا بيشيل فى قلبه وبيحقد وبيفكر فى الانتقام دائما
بالاضافة للمراحل الاخرى بقى رؤية فى المنام
يعنى الحمدلله انا لما بتجيلى رؤية بتبقى صحيحة يعنى لو حد هيجيب تقدير جامد
او زواج او وفاة او حد بيفكر يأذينى ربنا بيبعتلى منامات صالحة
كتنبيه وتحذير علشان اخد بالى كويس
واللى جرب رؤيتى دى ناس فى محاسبة وادارة اعمال كمان واصحابى البنات بالاخص نورة
طيب انا هحكى موقف هيبين الامر ده على الرغم انى لما بحكى ممكن الحاجات دى متظهرش تانى
ليه ؟؟؟؟
لان ممكن حد يحسد بدون قصد طبعا بس انا قولت لناس كتير واللى حصل حصل خلاص
اعوذ بالله من كلمة انا علشان كررتها كتير انى لما بزعل ممكن ارد على الفاضى ومعرفش اجيب ولا حق ولا باطل
سواء بالقول او الفعل سايبة كل حاجة على الله فكنت ببكى بس بحرقة والكلام ده من الصغر
المهم انا بحب افتح الشباك فى بيتنا القديم بليل وقت السحر كده
فنوعى حب التأمل فى الكون وبالذات فى السماء فكل شوية اقول ايه؟؟؟؟؟؟
ياترى انت بتحبنى زى مابحبك ياترى راضى عنى طيب
شكلك ايه نفسى اشوف اللى بيحبنى واللى بيعطينى وحبب الناس فيه من سيرتى دون رؤيتى
المهم الكلام ده كنت بقوله بشكل يومى كان فى اجازة اولى جامعة وبداية تانية جامعة
فجيه يوم ومقولتش وقاعدة كعادتى وبتأمل بس مفتحتش فمى خااااالص
هوبا النور قطع من المنطقة كان يوم الاثنين فى شهر رجب الساعة 4 الا دقيقة بالاصح قبل آذان الفجر
فالناس طبعا اللى جريت تتدور على شمعة واللى بتفتح الكشاف
انا بقى كنت قاعدة ومقومتش ابص الاقى طالع طاقة نور من ورا البيوت حاجة فى ضوء الشمس
بل اقوى وواخدة جزء كبير من السماء وكنت بجد من شدة النور كنت هتعمى مش هشوف تانى بعينى
فندهلت لنهله اختى مجاتش بسرعة قولت لا اله الا الله ثوانى والنور اختفى مقعدش كتير
وبعدها الفجر اذن
طبعا حب الاستطلاع عندى وعدم تفقهى دينيا ساعتها
سألت مشايخ وناس اعرفهم
اللى قالى ليلة القدر واحنا مش فى رمضان اصلا
واللى قالى ده ملك النور ولو كنتى طلبتى شىء كان اجاب
المهم انا طلعت بخلاصة ان ربنا بيحب العبد القنوع المحب المطيع المظلوم ذات القلب الابيض دون نقاط سوداء
فأنا الفت خاطرة سميتها دعوة للتقرب الى الله
خرجت من بيتى يوما ما متحزنة
لكن دموعى فى عيونى وقلبى متجمعة
كنت ذاهبة فى ملكوت ربى متأملة
فى انتظار صديقتى لامر ربى مسلمة
وتلاقينا عند باب الجامعة
فمشينا سويا حتى الروضة متنزها
جلسنا امام النيل متفرجا
أخذنا نشكى لله كروبنا وهمومنا
فكانت استجابة ربى لعباده مسرعة
وجدت مطرا فوق رؤسنا متسايلة
والسماء بها نورا متوهجا
وملاكا يطير فى السماء متألقا
كنت لرؤيته كالطير على جناحى متطايرة
وعندما ذكرت المصطفى اصبح فوق رؤسنا
يطير يمينا ويسارا حارسا فرحا بنا
فيا عباد الله اذكروا الله بصورة متكررة
واجعلوا حبه كالشجر فى قلوبكم متفرعا
بسسسسسسسسسسسسسسس
كلاكيت عاشر مرة
ههههههههه
سورى للاطالة
يلا سلام وانتظرونى لاحقا
كونوااااااا معاناااااااااا
مع
هبة سيد والحقيقة الغائبة
