السلام عليكم ورحمة الله وبركاته
ازيكم كلكم واخباركم ايه وعاملين ايه ؟؟ طبعا النهاردة يوم جميل وملهوش حل
بس اكيد اللى بعده هيبقى اجمل واجمل
الشهر ده فيه ايام بحبها اوى
اولها يوم 7/12 يوم عيد ميلادى
يوم 8/12 يوم زواج نورة صاحبتى الانتيم
يوم 26/12 عيد جواز الحاج والحاجة ام هبة :D
يوم 31/12 يوم راس السنة الميلادية واليوم ده بستعيد فيه الذكريات الماضية
واصلح كل ما هو خاطىء فى حياتى واجدد حياتى واحاول انجز مالم يتم انجازه مسبقا
ايييييييييييييه دنيييييييييييييييا!!!!!!!!!!!!
يوم الجمعه انتظروا بوست جامد عن القران الكريم هيكون ان شاء الله ملهوش حل
عن فضل تلاوة القران وشفاعته يوم القيامة ودعاء للشيخ الامام شلتوت رحمه الله
وده هيكون باذن الله فى مدونتى التانية كيف تكسب رضا ربك؟؟( مدونتى الدينية )اوك
طبعا الكل قرا عن الاخ اللى اجاز لنا اننا نفتحها على البحرى وتبقى مبوسة هههههههههه
سورى ياجماعه بس خلاص الشعب بعضه بل معظمه وصل لقمة الانحراف الفكرى
فى البيت بيتك يقولولك ايه اللى حصل للمجتمع الاعلامية اتين الموجى محاولة الشروع فى قتلها
الرياضة فى الضياع والفنانين كلهم مابين سرقة وقتل
حاجة فى قمة الحزن والبؤس والاسى
والا السينما كمان بسم الله ماشاء الله مش عرض اهداف بقى عرض افلام لا تهدف الا للتشجيع على الاباحية
والمحزن ان اكثر الافلام ايرادات هى الافلام ذات المنظر والمناظر الغير لائقة بالمرة
نقول كام حاجة جيانى على الميل نضحكم شوية وندخل فى المواقف... معلش اصل بحب الفرفشة والمرح
واحدة بتقول لحبيبها ما تقولى حاجة توقع بيها قلبى ...قالها اخوكى ماشى ورانا
:D
ارمى حبيبك فى بلاعة يطلعلك مستحمى وفى بقه نعناعة
:D شعب فقر هههههههههههههههههه
فوق السطوح يهز الهوا فى كُمى كل العيال اتجوزوا وانا لسه قاعد جنب امى
نكتة اخيرة
واحد بيقول لمراته الحياة دى سايرة زى حديقة الحيوانات قالتله ليه ياحبيبى؟
قالها لانى بقوم من النوم زى الحصان واشتغل زى الحمار وارجع بليل الهث زى الكلب وانام وجنبى بقرة ههههههههههههه
قلة ادب مع فرفشة فظيعة قال بقرة قال
ربنا يهدى الجميع
ندخل فى المواقف بقى
كنت دخلت امتحان الانجليش فى تانية ثانوى تقريبا المهم منمتش وسهرانة ومرهقة
والسلوك ضاربة المهم شربت قهوة ودخلت الامتحان
فا فى قطعة اللغة لاقيت امستردام بالانجليش طبعا
انا اشبه على الكلمة مفيش.. مش عارفه.. اقول ده اكل ولا ايه يمكن نوع من انواع سندوتشات البرجر وانا معرفش
ههههههههههههه
ما دماغى ضايعة بقى .... فدعيت ربنا والحمدلله لان زى ما بيقال بركة تتصوروا ماذا حدث؟؟؟
لاقيت المدرسة بالكامل بتغنى اغنية همام فى امستردام قولت يا اللــــــــــــــــــــــــــــــــــــــــــــــــــــه
امستردام وساعتها افتكرت انها بلد وبيتكلموا عن عواصم والحمدلله جاوبت وكنت فرحانة وبغنى معاهم
و ده طبعا ممنوع باللجان لكن هيسكتوا مين ولا مين هههههههههههههههه
**********************************
كنت من كام يوم بقدم سى فى فى شركة ما المهم دخلت كان هيغمن عليه فى الاسانسير اولا
البنات مفيش واحدة توحد ربنا محجبة فى المكان ثانيا المعطر النسائى والميك اب فوق اللازم
والا الشباب زى ما يكونوا قاعدين فى البانيو سورى يعنى بقالهم اسبوع نضاف اوى تشوفهم تقول حقيقى
انك مش فى مصر :D
بحكى لناس اعرفها يقولولى يابنتى انتى خام اوى ولو ربنا بيحبك هيمنعك من الشغل هناك
عشان الفتنة ....لا اله الا الله
المهم كنت انا ومنى صاحبتى الانتيم
وكنت مطبقة ومنمتش وخدتها على 4 العصر وروحنا طلعت حرب
وقعدنا فى احلى كافتيريا حيث الموسيقى والروائح النفاذة واكلنا
طبعا انا وهى مدروخين لاننا منمانش كويس
واحنا خارجين من الكافتيريا واحد بيقولنا اتفضلوا كانت كافتيريا تانية بس طلعت مش كافتيريا للطعام دى شيشة
تفاح ومانجو ومش بعيد موز هههههههههههههههه قولنا العنوان غلط ولاول مرة اعرف ان عدد البنات
مساوى للرجال فى تناول الشيشة ههههههههههه
بس برضو هقول لسه مصر بخير و ربنا يهدى كل عاصى يارب
*****************
حاجة زعلتنى اوى امبارح روحت الجيزة فى مشوار الساعة 10 صباحا
المهم انا واختى راجعين فحبينا نشترى جرنان
فشوفت كتب للشيخ محمود خليل الحصرى وانا بصراحة بحب وبقدر الراجل ده جدا
الله يرحمه المهم بقول للرجل الجرنان بكام قالى ب2 جنية قولتله وكتاب الشيخ الحصرى قالى ب1 جنية
قولتله اخس على الدنيا بقى الجرنان وكتب الحب والعلم اغلى من العلم بتاع ربنا
خدت الكتاب وكنت حطاه فى عينى بعكس اى كتاب بشتريه
و برضو هقول ربنا يهدى الجميع ويحول امتنا الى امة اسلامية تمشى على منهاج الله وسنة رسول الله
صلى الله عليه وسلم
*******************************
كفاية كده وان شاء الله المرة القادمة هتكلم عن الفرق بين الشيوخ والدجالين والمشعوذين
كونوا معانا
مع هبة سيد وكل ماهو جديد وماوراء البحار هتلاقوه معانا
:D
القاكم بعد الفاصل ان شاء الله
السلام عليكم
